Альбумин­-Биофарма 50 мл (10%)

• русский
• қазақша

• Скачать инструкцию медикамента

Саудалық атауы

Альбумин-Биофарма

Халықаралық патенттелмеген атауы

Жоқ

Дәрілік түрі

10% және 20% инфузияға арналған ерітінді

Құрамы

1 құтының ішінде

белсенді зат –донордың қан плазмасының альбуминді фракциясының сулы ерітіндісі, альбуминнің мөлшері 95%-дан кем емес

қосымша зат –1 г ақуызға 30 мг натрий каприлаты.

Сипаттамасы

Сарыдан ашық-қоңыр түске дейінгі мөлдір тұтқыр сұйықтық, жасылдау рең болуына жол беріледі.

Фармакотерапиялық тобы

Плазма алмастырғыш және перфузиялық ерітінділер. Қан плазмасының препараттары және плазма алмастырғыш препараттар. Альбумин

АТХ коды B05A A01

 

Фармакологиялық қасиеттері

Фармакокинетикасы

Ерітіндіні көктамыр ішіне енгізгеннен кейін альбуминнің толық таралуы 10-15 минуттан соң жүреді. 50% альбумин организмнен 24 сағат өткенде шығарылады, 1-4 тәулік ішінде оның мөлшері бір деңгейде қалып, бесінші тәуліктің соңына қарай қарқынмен азаяды. Альбуминнің амин қышқылдарға дейін ыдырап, кейін олардың организмнің өз ақуыздарының синтезі үшін пайдаланылуы 50-60 тәулік құрайды. Сондықтан ерітіндіні парентеральді қоректену үшін пайдалану мақсатқа сай емес.

Әдеттегі жағдайларда альбуминнің жартылай шығарылуының орташа уақыты 19 күнге жуықты құрайды. Синтезі мен ыдырауы арасындағы тепе-теңдікке, әдетте, кері байланыс принципі бойынша реттеу есебінен жетеді. Шығарылуы көбіне жасуша ішінде лизосомалық протеазалар белсенділігі есебінен жүреді.

Енгізілген альбуминнің 10%-дан азы оны құйғаннан кейін алғашқы 2 сағатта тамырішілік компартаменттен шығады. Плазма көлеміне құю әсерінің едәуір жекеше айырмашылықтары бар. Кейбір емделушілерде плазма көлемінің ұлғаюы бірнеше сағат бойына сақталуы мүмкін. Алайда ахуалы ауыр емделушілерде альбуминнің тамыр кеңістігінен шығу жылдамдығы болжауға келмейді.

Фармакодинамикасы

Альбумин – адам қанының ақуыз фракциясының құрамдас бөлігі болып табылатын табиғи ақуыз. Альбуминнің молекулалық массасы – 69000 дальтон. Онкотикалық қысым альбуминнің 10% ерітіндісінде, қан плазмасы онкотикалық қысымынан гөрі, жоғары. Альбумин-Биофарма 10% ерітіндісі генезі әртүрлі гипоальбуминемияны, коллоидты-онкотикалық қысымның қалпына келуін, бұзылған орталық және шеткергі гемодинамиканы, су-электролиттік тепе-теңдікті реттейтін зат болып табылады. Гиповолемия (қан жоғалту) жағдайларында препарат артериялық қысымды және айналымдағы қан көлемін жылдам қалпына келтіреді.

Альбумин-Биофарма ерітіндісінің организмде атқаратын жүгі поливалентті, бірақ негізгі функциялары сіңіру-тасымалдау және гемодинамикалық әрекеттер болып табылады. Альбумин организмнің негізгі ақуыз қоры болып саналады. Альбумин ерітінділерін клиникада пайдалану, негізінен, осы әсерлердің біреуіне немесе олардың жиынтығына жетуге бағытталған. Альбумин уытсыздандыру ықпалын да тигізеді. Ол пигменттерді (билирубин), май қышқылдарын, дәрілік заттарды байланыстырады және тасымалдайды. Кейбір металдардың: магний, никель, қорғасын, сынап иондарын, сондай-ақ ацетаттарды, бикарбонаттарды, нитраттарды, цитраттарды байланыстырып, оларды организмнен шығарады. Бұдан басқа, альбумин әрі бактериялық тектегі, әрі зат алмасу үдерісінде түзілген уыттарды байланыстырып, оларды әсерсіздендіреді. Альбумин артериялық қысымды жоғарылатады, қан арнасында тін сұйықтығын тартуға және ұстап тұруға ықпал етеді.

Науқастың ішіне енгізілген әр 50 мл 20% альбумин шамамен 200 мл цитраттық плазмаға баламалы онкотикалық қысымның көтерілуін қамтамасыз етеді. Талапқа сай гидратацияланған нысанда көктамырішілік қолданылған кезде 50 мл 20% альбуминнің онкотикалық (коллоидты осмостық) әсері мынадай: ол тамырдан тыс тіндерден қан айналу жүйесіне 15 минут ішінде шамамен 125 мл сұйықтықты тартады, сол арқылы айналымдағы қан көлемін көбейтіп, гематокритті және ажыратылмаған қанның тұтқырлығын төмендетеді.

Альбумин ерітіндісін АИВ және гепатит жұқпалары жоқ адам қанының плазмасынан, плацентасынан оны фракциялау жолымен дайындайды.

Қолданылуы

- генезі әртүрлі гипопротеинемия мен гипоальбуминемияда (альбуминнің плазмадағы мөлшерінің азаюы 30 г/л-ден төмен)

- коллоидты-онкотикалық қысым деңгейі 15 мм сынап бағанынан төмен азайғанда

- жалпы ақуыз мөлшері 50 г/л-ден төмен кемігенде

- геморрагиялық, гиповолемиялық, жарақаттық, уытты шокта, қанды көп жоғалтқанда (айналымдағы қан көлемінің 25-30%-дан астам азаюы)

- іріңді-септикалық жай-күйлерде

- жедел бауыр жеткіліксіздігі; жедел бауыр некрозында (әрі плазманың онкотикалық қысымын ұстап тұру мақсатында, әрі қан плазмасында бос билирубиннің шамадан тыс мөлшерін байланыстыру мақсатында)

- бүйрек ауруларында (нефриттер, нефротикалық синдром)

- күйік ауруында

- жасанды қан айналдыруды пайдаланумен жасалатын операцияларда (аорто-коронарлы шунттау)

- емдік плазмаферез, гемодиализде

- жаңа туған нәрестелердің гемолитикалық аурулары, гипербилирубинемияны төмендету үшін қанды алмастырып құю кезінде

- операция алдындағы гемодилюция және ауто-қан компоненттерін дайындау үшін

- ми ісінуінде

Қолдану тәсілі және дозалары

Стационар жағдайында ғана қолдану керек!

Альбумин-Биофарма ересектер мен балаларға көктамырішілік тамшылатып немесе сорғалатып енгізіледі. Қан плазмасындағы альбумин концентрациясына мониторинг жүргізу, гемодинамика көрсеткіштеріне бақылау жасау ұсынылады. Құю жылдамдығын емделушінің жағдайына және көрсетілімдерге қарай таңдаған дұрыс. Плазманы алмастырып құю кезінде құю жылдамдығы жоғары болуы мүмкін, әрі шығарылу жылдамдығына сәйкес келуі тиіс.

Альбумин-Биофарманы минутына 5 мл жылдамдықпен тамшылатып немесе 10% ерітіндіні минутына 50-60 тамшыдан асырмай және минутына 1-2 мл-ге дейін немесе 20% ерітіндіні минутына 40 тамшыдан асырмай к/і енгізеді. Ең жоғары енгізу уақыты – 3 сағат. Үлкен көлемдерді енгізгенде Альбумин-Биофарманы пайдалану алдында оны бөлме температурасына дейін немесе дене температурасына дейін жылытқан жөн.

Қолдануға дайындық

Құтыны ашпас бұрын қақпағының үстін сәйкес антисептикке батырылған тампонмен сүрту қажет. 10, 20% Альбумин-Биофарма ерітіндісін құяр алдында дәрігер препаратты және ол құйылған ыдыс ішінде қатты бөлшектердің және түс өзгерісінің бар-жоғын қарап тексеруге тиіс. Препарат көзбен қарағанда мөлдір болуы және ішінде бөлшектер мен шөгінділер болмауы тиіс. Препарат бөтелкелердің жарылған жерлері болмай, тұмшаланып жабылу және тығындалу, заттаңбасының бүлінбеу шарттары сақталған жағдайда пайдалануға жарамды болып саналады. Көзбен тексеру нәтижелері және заттаңба деректері (препараттың атауы, дайындаушы мекеме, серия нөмірі) ауру тарихына тіркеледі.

Препараттың ең жоғары бір реттік дозасы альбумин ерітіндісінің концентрациясына, науқастың бастапқы жағдайына және жасына байланысты. 10% Альбумин- Биофарма ерітінділерін 1-2 мл/кг есебінен немесе 200-300 мл дозада енгізеді, осындай дозаны күн сайын немесе күнара, әсер еткені біліне бастағанша құяды, қажет болса, 10% ерітінді дозасын 500 мл-ге дейін жоғарлатуға болады. 20% Альбумин - Биофарма ерітіндісінің ең жоғары бір реттік дозасы 100 мл-мен шектелуі мүмкін. Альбумин-Биофарма ерітінділерін генезі әртүрлі шоктарда артериялық қысымды жылдам көтеру үшін сорғалатып енгізуге болады. Егде жаста концентрацияланған (20%) ерітінділерді қолданбаған және 10% Альбумин - Биофарма ерітіндісін жылдам енгізбеген дұрыс, өйткені бұл жүрек-қан тамырлары жүйесіне артық жүк түсуіне әкелуі мүмкін.

Балаларға дозалау Альбумин-Биофарма ерітінділерінің концентрациялары негізінде дене салмағының әр килограмына миллилитрмен есептелуге тиіс (баланың дене салмағының әр кг-на 1-2 мл-ден аспайды).

Гиповолемия Гиповолемиялық шокты емдеу үшін қолданылатын инфузия көлемі мен жылдамдығы нақты емделушінің жауабына сәйкес болуға тиіс. Қан айналу жүйесінің волемиялық жүктемеленуіне жол бермеу мақсатында емделушінің гемодинамикалық көрсеткіштерін бақылау, әдеттегі сақтану шараларын қадағалау қажет.

Ересектер: бастапқы орташа доза - 25 г, 250 г-ден асырмай 48 сағат ішінде енгізеді. Белсенді қан кету жоқ болған кезде жалпы доза қалып шегінде байқалатын альбумин деңгейінен аспауға тиіс (дене салмағының әр кг-на 2 г жуық).

Балалар: шұғыл жағдайларда бастапқы доза - 25 г, қалған жағдайлардағы доза ересектерге арналған дозадан 2-4 есе аз және альбумин ерітінділерінің концентрациясын есепке алумен дозалау дене салмағының әр килограмына миллилитрден есептелуге тиіс (баланың дене салмағының әр кг-на 3 мл-ден аспайды).

Егер жасушадан тыс дегидратация орын алса, онда альбуминнен кейін тұзды ерітіндіні құю керек.

Егер 10% Альбумин-Биофарма айналымдағы қан көлемі аздап тапшы болғанда (10 -15%) қолайлы болса, соңынан тұзды ерітінді құйылатын 20% Альбумин - Биофарманың АҚК айқын төмендегенде (20%-дан астам), айналымдағы ақуыз тапшылығында, торпидті шокта және трансфузиялық емді кеш бастауға тура келген кезде едәуір емдік артықшылықтары бар. Бауыр циррозына шалдыққан емделушіден асциттік сұйықтықты алып тастау жүрек-қан тамырлары жүйесі қызметіндегі өзгерулермен және тіпті гиповолемиялық шоктың дамуымен қатар жүруі мүмкін. Осындай жағдайларда альбуминді құю айналымдағы қан көлемін ұстап тұру үшін қажет. Күйіктерді емдеу

Күйік зақымынан кейін (әдетте 24 сағаттан көп уақыт өткенде) құйылатын альбумин мөлшері мен осмостық коллоидты қысымның артуы арқылы алынатын плазманың арасында дәл сәйкестілік бар. Плазма альбуминінің 2,5±0,5 г/л концентрациясын 20 мм сынап бағанасына тең плазманың онкотикалық қысымымен (ақуыздың 5,2 г/л-ге тең жалпы концентрациясына баламалы) ұстап тұру қабілеті мақсатталуға тиіс. Емдеу ұзақтығы ақуыздың күйіп қалған аймақтардан және несеппен жоғалуына қарай белгіленеді. Бұдан басқа, амин қышқылдарымен сүңгі арқылы немесе парентеральді қоректендіруді бастау қажет, өйткені альбуминді ұзақ уақыт қолдану қорек көзі болып есептелмейді. Ауқымды күйіктерді трансфузиялық емдеудің оңтайлы тәртібі (коллоидтарды және тұзды ерітінділерді тағайындау) белгіленген жоқ. Әдетте, термиялық зақымданудан кейін алғашқы 24 сағатта интерстициальді (жасушадан тыс) сұйықтықтың азайған көлемін қалпына келтіру үшін тұзды ерітінділердің үлкен көлемдері құйылады. 24 сағат өткен соң Альбумин-Биофарманы плазманың коллоидты-онкотикалық қысымын ұстап тұру мақсатында қолдануға болады.

Тіндердің ісінуі бар немесе онсыз гипопротеинемия

Егер гипопротеинемияға әкеп соқтыратын негізгі патология ретке келтірілсе, альбуминнің қолданылуын таза симптоматикалық немесе демеуші ем орнына есептеу қажет. Альбумин-Биофарманың ересектерге арналған әдеттегі тәуліктік дозасы 50-ден 75 г-ге дейін (0,5-1 г/кг), ал балалар үшін 25 г құрайды. Альбуминнен айырылуы жалғаса беретін күшті гипопротеинемиясы бар емделушілерге көп мөлшерлер қажет болуы мүмкін. Гипопротеинемияға шалдыққан емделушілерде әдетте қан көлемі шамамен қалыпты болатындықтан, Альбумин-Биофарма инфузиясының жылдамдығы минутына 2 мл-ден аспауға тиіс, өйткені өте жылдам инфузия қан айналымының бұзылуын және өкпенің ісінуін туындатуы мүмкін. Ауқымды хирургиялық операция барысында емделушілер қан арнасында айналатын альбуминнің жартысынан астамынан айрылуы мүмкін, ол ісік синдромын дамытатын немесе онсыз онкотикалық қысымның төмендеуімен қатар жүреді. Осыған ұқсас жағдай қарқынды емдеу бөліміндегі науқастарда болатын сепсис кезінде де байқалады. Мұндай жағдайларда Альбумин-Биофарманы қолдану көрсетілген. Аорто-коронарлы шунттау

Қазіргізамандық жасанды қан айналдыру аппараттары (ЖҚА) салыстырмалы түрде шағын көлемдерді толтыру үшін қажет. Емделушілерде операция алдында альбуминді және кристаллоидтарды пайдаланумен қол жеткізілетін гемодилюцияның қауіпсіз әрі жақсы көтерімді екені көрінді. Плазма гематокриті мен альбуминінің деңгейін қауіпсіз төмендете беруге болатын шек белгіленбеген, алайда альбумин мен кристаллоидтарды 20% гематокриттің және плазма альбуминінің 2,5 г/л концентрациясының деңгейіне жеткенше ЖҚА толтыру үшін қолдану жалпыға ортақ тәжірибе болып табылады.

Жедел бауыр жеткіліксіздігі

Команың дамуы бар немесе онсыз бауыр функциясының жылдам айырылу сирек жағдайда (бауыр энцефалопатиясы) Альбумин-Биофарманы қолдану онкотикалық қысымды ұстап тұру және плазма билирубинін байланыстыру мақсатын көздейді.

Жаңа туған нәрестелердің гемолитикалық ауруы

Альбумин-Биофарманы жаңа туған нәрестелердің гемолитикалық ауруын емдегенде сарғаюдан және гемолизден болатын асқынулар қаупін азайту үшін бос билирубинді байланыстыру мақсатында плазма алмастыруды пайдаланған кезде тағайындауы мүмкін. Дене салмағының әр килограмына 1 г доза алмастыратын трансфузия емшарасын бастаудан шамамен бір сағат бұрын тағайындалады. Балаларда бастапқы гиперволемия болған кезде сақ болу қажет.

Ақуызға бай сұйықтықтарды шығару

Бауыр циррозы, жүрек жеткіліксіздігі, перитонит, сондай-ақ экссудативті плеврит салдарынан болатын асцитті көбіне алып тастау қажет болады. Осы орайда жоғалатын ақуыздың, соның ішінде альбуминнің шамасы үшінші кеңістікте көлемді толықтыруға немесе онкотикалық қысымды ұстауға бағытталған емді талап етуі мүмкін, ол Альбумин-Биофарма инфузиясының көмегімен жүзеге асырылады.

Эритроциттерді ресуспензиялау

Ерітілген, жуылып-шайылған эритроциттердің үлкен көлемдерін құю шамадан тыс гипопротеинемияның дамуымен қатар жүреді. Мұны болдырмау мақсатында Альбумин-Биофарманы ерітілген, жуылып-шайылған эритроциттерді трансфузиялау алдында тікелей пайдалануға болады.

Жедел нефроз

Циклофосфанмен немесе стероидтармен емдеу нәтижесі болмағанда немесе стероидтармен емдеу кезінде ісіну синдромы нашарлағанда 7-10 күн бойы, диурездің және қан плазмасындағы калий концентрациясының бақылануымен, күн сайын 100 мл 20% Альбумин-Биофарма мен диуретиктердің қосылған тағайындалымын қолдануға болады. Осыдан кейін стероидтарды қайталап тағайындау тиімді болуы мүмкін. Гемодиализ Альбумин созылмалы бүйрек жеткіліксіздігінде стандартты гемодиализ жүргізу хаттамасының міндетті бөлігі болып табылмайды, бірақ ол осы емделушілерде шок немесе гипотония дамыған кезде қолданылуы мүмкін. Әдетте мұндай жағдайларда 100 мл 20% Альбумин-Биофарма құйылады. Осындай науқастарда жиі байқалатын волемиялық жүктемеден аулақ болу қажет (сондықтан да, олар тұзды ерітінділердің үлкен көлемдерімен жасалған инфузияны көтере алмайды).

Ми ісінуі Ми ісінуін емдеу үшін Альбумин-Биофарманың гиперонкотикалық 20 ерітіндісі пайдаланылады. Ең жоғары енгізу уақыты – 3 сағат.

Жағымсыз әсерлері

Кейде

• дене температурасының қысқа мерзімді көтерілуі, қалтырау

Сирек

• белдің ауыруы

• есекжем, анафилактикалық шок

• ентігу

• жүрек айну

• бас ауыру, сананың шатасуы

Қолдануға болмайтын жағдайлар

• альбуминді жекеше көтере алмаушылық (соның ішінде сыртартқыдағы)

• гиперволемия

• өкпенің ісінуін

• бақыланбайтын артериялық гипертензия

• айқын жүрек жеткіліксіздігі (II В-III дәрежелі)

• тромбоз

• миға қан құйылу

• ішкі қан кетулер

• ауыр анемия

- ренальді және постренальді анурия

- өңеш көктамырларының варикозды кеңеюі

Дәрілермен өзара әрекеттесуі

Альбумин-Биофарма ерітіндісін салицилаттармен, сульфаниламидтермен, барбитураттармен, пенициллиндермен, фенилбутазонмен бір мезгілде қолдану альбуминнің емдік әсерінің әлсіреуіне әкеледі.

Айрықша нұсқаулар

Альбумин-Биофарманы ақуыз гидролизаттарымен, амин қышқылы ерітінділерімен және спирті бар препараттармен араластыруға болмайды. Альбумин ерітінділерін инъекцияға арналған сумен сұйылтуға болмайды, өйткені ол реципиенттерде гемолизді туындатуы мүмкін.

Альбумин-Биофарма ерітінділерін, егер олар мұздатып қатырылған немесе лайланған болса, қолдануға болмайды. Толық пайдаланылмаған құтылар қайталап қолдануға жатпайды. Алдын ала ашылған немесе бүлінген, жарылуы бар құтыларды, бактериялық ластануы мүмкін екендіктен, қолдануға болмайды.

Сусызданған кезде сұйықтықтың жеткілікті болуын алдын ала қамтамасыз еткеннен кейін ғана енгізуге (ішке, парентеральді) болады.

Реакциялар немесе асқынулар пайда болған жағдайда Альбумин-Биофарма ерітіндісін енгізуді дереу тоқтатып, қажет болғанда, инені көктамырдан суырмай тұрып, антигистаминдік, кардиотоникалық дәрілерді, глюкокортикоидтарды, вазопрессорлы препараттарды енгізген жөн.

Салыстырмалы үлкен көлемдерді алмастыру қажет болса, қанның ұюын және гематокритті бақылау талап етіледі. Қанның басқа компоненттерін (ұю факторлары, электролиттер, тромбоциттер және эритроциттер) сәйкесінше алмастыруды қамтамасыз ету керек.

Адам қанынан және плазмасынан жасалған препараттарды қолданған кезде жұқпалы ауруларды жұқтыру ықтималдығын түгел жоққа шығаруға болмайды. Жұқпалы агенттер трансмиссиясының қаупін азайту үшін донорлар және алынған препараттар тиянақты тексеріледі. Өндірісте тек донор плазмасының антиген-теріс үлгілері ғана пайдаланылады.

Альбуминді қолдану негізделмеген жай-күйлер

Созылмалы нефрозда альбуминнің құйылатын ерітіндісі, бүйрек тінінің негізгі зақымына әсер етіп үлгерместен, бүйрекпен жылдам шығарылады. Анда-санда альбумин жедел нефрозда қолданылады. Бауырдың созылмалы циррозы, ішекте сіңуінің бұзылуы, созылмалы панкреатиті немесе дене салмағының ашығудан болатын тапшылығы бар науқастарда альбумин инфузиясын ақуыздық қорек көзі ретінде қарастыру жөнсіз.

Педиатрияда қолданылуы

Балаларда плазманың физиологиялық көлемі жас ерекшелігіне байланысты екенін ескеру қажет.

Жүктілік және лактация кезеңі

Альбумин-Биофарманы жүктілік және емшек емізу кезеңінде ана үшін зор пайдасы ұрыққа немесе нәрестеге төнетін болжамды қауіптен басым болған жағдайда ғана қолдануға болады.

Дәрілік заттың көлік құралдарын немесе қауіпті механизмдерді басқару қабілетіне ықпал ету ерекшеліктері

Препарат стационарлық жағдайларда ғана қолданылатындықтан ондай деректер жоқ.

Артық дозалануы

Симптомдары: тым жоғары дозада және жылдам құйған кезде бас ауыру, ентігу, жарма веносының толып кетуі, артериялық қысымның көтерілуі, орталық көктамырлық қысымның жоғарылауы сияқты гиперволемияның немесе жүрек-қан тамырлары жүйесі жүктемесінің белгілері пайда болады, өкпенің ісінуі мүмкін.

Емі: құюды дереу тоқтатып, емделуші гемодинамикасының сипатын мұқият бақылаған дұрыс. Белгісіне қарай ем жүргізіледі.

Шығарылу түрі және қаптамасы

20 мл 10% ерітіндіден резеңке тығындармен тығындалған, алюминий қалпақшалармен қаусырылған шыны құтыларда. 50, 100 мл 10% ерітіндіден резеңке тығындармен тығындалған, алюминий қалпақшалармен қаусырылған қанға, трансфузиялық және инфузиялық препараттарға арналған шыны бөтелкелерде.

100 мл 20 % ерітіндіден резеңке тығындармен тығындалған, алюминий қалпақшалармен қаусырылған қанға, трансфузиялық және инфузиялық препараттарға арналған шыны бөтелкелерде.

20 мл-лік 1 құтыдан (10% ерітінді) немесе 50 және 100 мл-лік (10% ерітінді) және 100 мл-лік (20% ерітінді) 1 бөтелкеден медицинада қолданылуы жөніндегі мемлекеттік және орыс тілдеріндегі нұсқаулықпен бірге қораптық картоннан (хром-эрзац) жасалған пәшкелерге салады.

Сақтау шарттары

Құрғақ, жарықтан қорғалған жерде, 2ºС-ден 8ºС-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецепт арқылы

Өндіруші «Биофарма» ЖАҚ, Украина

03680, Киев қ., Н.Амосов к-сі, 9,

Тіркеу куәлігінің иесі

«Биофарма» ЖАҚ, Украина

Қазақстан Республикасы аумағында тұтынушылардан өнім сапасы жөніндегі шағымдарды қабылдайтын ұйымның мекенжайы:

Тлеубергенова Г.С. ЖК, Қазақстан Республикасы, 010000 , Ақмола обл. Астана қ., Бозінген к-сі, 8 үй. aldokinakbar@mail.ru