Акупан

• русский
• қазақша

• Скачать инструкцию медикамента

Саудалық атауы

Акупан

Халықаралық патенттелмеген атауы

Нефопам

Дәрілік түрі

Инъекцияға арналған 20мг/2мл ерітінді

Құрамы

2 мл препараттың құрамында

белсенді зат - 20 мг нефопам гидрохлориді,

қосымша заттар: натрий дигидрофосфат дигидраты, динатрий гидрофосфат додекагидраты, инъекцияға арналған су.

Сипаттамасы

Иісі жоқ, мөлдір, түссіз ерітінді

Фармакотерапиялық тобы

Басқа да анальгетиктер және антипиретиктер.

АТХ коды N02BG06

Фармакологиялық қасиеттері

Фармакокинетикасы

Нефопамның бір реттік 20 мг дозасын бұлшықет ішіне енгізгеннен кейін қан сарысуында ең жоғары концентрация 30 – 60 минуттан соң байқалады және 25 нг/мл құрайды. Қан плазмасы ақуыздарымен байланысуы 71-76% құрайды. Биотрансформациясы едәуір, үш метаболит идентификацияланған: десметилнефопам; нефопам N-оксид; N-глюкуронид нефопам.

Десметилнефопам мен нефопам N-оксид бауырда глюкуронизирленбейді, анальгетикалық белсенділік көрсетпейді. Бұлшықет ішіне енгізгенде жартылай шығарылу кезеңі орта есеппен 5 сағатты құрайды. Көктамыр ішіне енгізгеннен кейінгі жартылай шығарылу кезеңі 4 сағатты құрайды. Енгізілген дозаның 87%-ы бүйректер арқылы шығарылады, енгізілген дозаның 5%-дан азы өзгермеген күйінде шығарылады.

Несептен табылған метаболиттер көктамыр ішіне енгізілген дозаларға сәйкес 6%, 3% және 36% құрайды.

Фармакодинамикасы

Акупан – басқа анальгетиктерден құрылысы жағынан айырмашылығы бар есірткілік емес анальгетик. Орталық әсері бар, ол дофаминді, норадреналинді және серотонинді синапстар деңгейінде кері қармап қалуды тежеуге негізделеді. Нефопам глутаматтың пресинапстық деңгейде босап шығуының тежелуі және N-метил-D-аспартат рецепторларының постсинапстық деңгейде белсенділенуі есебінен антиноцецептивтік белсенділікке ие.

Нефопам клиникалық зерттеулерде операциядан кейінгі дірілде оң әсер көрсетті.

Нефопам қабынуға қарсы немесе антипиретикалық әсер бермейді, тынысты баспайды және ішектің жиырылуына ықпалын тигізбейді. Нефопамның аздаған антихолинергиялық әсері бар.

Қолданылуы

- этиологиясы және қарқындылығы әртүрлі ауыру синдромында (жарақаттар, хирургиялық операциядан кейінгі ауыру, босану кезіндегі ауыруды сездірмеу, тіс ауыру, миалгия, бүйрек және бауыр шаншулары)

- ауыртатын медициналық емшаралар алдындағы премедикацияда.

Қолдану тәсілі және дозалары

Доза ауыру синдромының қарқындылығына және емделушінің реакциясына сәйкес келуі тиіс.

Бұлшықетішілік енгізу

Акупанды бұлшықет ішіне терең етіп енгізген жөн. Бір енгізуге ұсынылатын доза – 20 мг. Қажет болғанда енгізуді әрбір 6 сағат сайын қайталайды. Ең жоғары тәуліктік доза – 120 мг.

Көктамырішілік енгізу

Акупанды ұзақтығы 15 минуттан кем емес көктамырішілік инфузиялар түрінде енгізген жөн, емделуші жатқан күйде болуы тиіс.

Бір енгізуге ұсынылатын доза – 20 мг. Қажет болғанда енгізуді әрбір 4 сағат сайын қайталайды. Ең жоғары тәуліктік доза – 120 мг.

Енгізу әдістемесі

Акупанды инфузияға арналған әдеттегі ерітіндіде енгізуге болады (натрий хлоридінің изотоникалық ерітіндісі немесе 5% глюкоза ерітіндісі). Сұйылтқан кездегі тиімді арақатынасы – инфузияға арналған 50 мл ерітіндіде 2 мл препарат ерітіндісі.

Емделу курсы – 8-10 күннен аспайды.

Жағымсыз әсерлері

- бас айналу, үрейлену, қатты қозғыштық, ұйқышылдық/ инсомния, астения, көрудің бұлдырауы

- тершеңдік, ұйқышылдық, жүректің айнуы, құсу

- атропин тәрізді реакциялар (ауыздың құрғауы, естен тану, несептің іркілуі, тітіркенгіштік, қозу)

Сирек

- тахикардия және артериялық қысымның жоғарылауы

- асқын сезімталдық, есекжем, Квинке ісінуі, анафилактикалық шок

- құрысулар, елестеулер, дәрі-дәрмекке тәуелділік

Қолдануға болмайтын жағдайлар

- нефопамға немесе препараттың басқа компоненттеріне асқын сезімталдық

- МАО тежегіштерін бір мезгілде қабылдау

- құрысулар немесе олардың сыртартқыда болуы, эпилепсия

- уретраның және қуықасты безінің зақымдануымен байланысты несептің іркілуі

- жедел глаукома

МАО тежегіштерімен бір мезгілде қабылдау

- жүктілік, лактация кезеңі

- 12 жасқа дейінгі балалар

Дәрілермен өзара әрекеттесуі

Акупанның жағымсыз әсерлерін күшейтетін симпатомиметиктермен және антихолинергиялық препараттармен: атропинге ұқсас спазмолитиктермен, паркинсонға қарсы антихолинергиялық препараттармен, имипраминді антидепрессанттармен және фенотиазинді нейролептиктермен, Н1-гистаминдік рецепторлар блокаторларымен, дизапирамидпен, МАО тежегіштерімен бір мезгілде тағайындауға болмайды.

Айрықша нұсқаулар

Акупан морфин тәрізді препараттарға және апиындар антагонистеріне жатпайды. Акупанды морфин тәрізді препаратпен емдеуді тоқтату аясында тағайындау апиынға тәуелді емделушілерде тоқтату синдромының пайда болу қаупін арттырады.

Акупанмен емдегенде қаупі/пайдасы арақатынасына ұдайы баға беріп отыру керек.

Акупанды бас ауыру сияқты созылмалы ауыру синдромдарын емдеу үшін тағайындамаған жөн.

Бауыр, бүйрек қызметінің жеткіліксіздігі бар емделушілерге, егде жастағы емделушілерге тағайындағанда сақ болған жөн.

Тахикардиясы бар емделушілерге тағайындағанда сақ болған жөн.

Депрессиясы бар емделушілерге немесе сыртартқысында қандайда болсын дәрілік тәуелділігі бар емделушілерге қауіпті болуы мүмкін.

Дәрілік заттың көлік құралдарын немесе қауіпті механизмдерді басқару қабілетіне ықпал ету ерекшеліктері

Емделу кезінде автокөлікпен және зейінді жұмылдыруды қажет ететін механизмдермен жұмыс жасамау керек.

Артық дозалануы

Симптомдары: тахикардия, құрысулар, елестеулер.

Емдеу: симптоматикалық ем, стационар жағдайында кардиологиялық және респираторлы мониторинг.

Шығарылу түрі және қаптамасы

2 мл препарат шыны ампулаларға құйылған.

Поливинилхлоридті үлбірден және ПЭТФ/ПЭ үлбірден жасалған пішінді ұяшықты қаптамаға 5 ампуладан салынған.

Пішінді ұяшықты 1 қаптама медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткен препаратты қолдануға болмайды!

Дәріханадан босатылу шарттары

Рецепт арқылы

Өндіруші

БИОКОДЕКС

Мекенжайы: 7, авеню Гальени, 94250 Жантилли – Франция.

Тіркеу куәлігінің иесі

БИОКОДЕКС, Франция

 

Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы

ҚР, «Казфармпромоушн» ЖШС

Алматы қ-сы, Қабдолов к-сі 22 б, кеңсе 2

тел.:+7 (727) 356-47-01, 250-72-70

e-mail: bruphbe@brupharm.skynet.be