Актинак 100

Актинак 100

Ацеклофенак

Үлбірлі қабықпен қапталған таблеткалар, 100 мг

Бір таблетканың құрамында

белсенді зат – 100 мг ацеклофенак

қосымша заттар: микрокристалды целлюлоза (Сhemicel PH -112), кремнийдің коллоидты қостотығы (Аэросил R972 Фарма/Кабосил TS610), натрий кроскармеллозасы, магний стеараты

үлбірлі қабық: инстакоат Сол (IC-S-168) көгілдір1, тазартылған су2

1 – құрамында: гипромеллоза (АҚШФ*), полиэтиленгликоль (АҚШҰФ*), тазартылған тальк (АҚШФ*), титанның қостотығы Е171 (АҚШФ*), бриллиантты көк бояғышы FCF Е133 (фирманың БМ).

2 - тазартылған су БФ/АҚШФ/ЕФ/ИФ/МФ спецификацияларына сәйкес келеді

Дөңгелек пішінді, екі беті дөңес, ашық-көгілдірден көгілдір түске дейінгі үлбірлі қабықпен қапталған таблеткалар.

Қабынуға қарсы және ревматизмге қарсы препараттар. Қабынуға қарсы стероидты емес препараттар. Сірке қышқылы туындылары. Ацеклофенак

АТХ коды M01AB16

Фармакокинетикасы

Ішке қабылдаудан кейін ацеклофенак өзгеріссіз күйде тез және толық сіңеді. Плазмадағы ең жоғары концентрацияларына ішке қабылдаудан кейін шамамен 1,25-3 сағат ішінде жетеді. Ацеклофенак синовиальді сұйықтыққа өтеді, онда оның концентрациясы қан плазмасындағы концентрациясының 57% деңгейіне жетеді. Таралу көлемі шамамен 30 л құрайды. Плазмадан орташа жартылай шығарылу кезеңі 4 сағатқа жуық құрайды. Ацеклофенак ақуыздармен белсенді байланысады (99%). Айналымда, ең алдымен, өзгеріссіз күйде болады, оның негізгі метаболиті 4-гидроксиацеклофенак болып табылады. Қабылданған дозаның үштен екі шамасы көбінесе байланысқан гидроксиметаболиттер түрінде несеппен шығарылады.

Егде жастағы адамдарда ацеклофенак фармакокинетикасында ешқандай өзгерістер байқалмайды.

Фармакодинамикасы

Ацеклофенак – қабынуға қарсы стероидты емес дәрі, фенил-сірке қышқылының туындысы. Айқын қабынуға қарсы, ауыруды басатын және қызу түсіретін әсер иеленеді. Ацеклофенактың әсер ету механизмі простагландиндер синтезін реттейтін ЦОГ 1 және 2 бәсеңдетумен байланысты. Ацеклофенак простагландиндер синтезін бәсеңдетеді, осылайша, қабыну патогенезіне, ауыру мен қызбаның пайда болуына әсер етеді. Ревматизм ауруларында ацеклофенактың қабынуға қарсы және ауыруды басатын әсері ауыру айқындылығының, таңертеңгі сіресудің, буындар ісінуінің елеулі азаюына ықпал етеді, бұл пациенттің функционалдық жағдайын жақсартады.

Күніне екі рет 100 мг, таңертең және кешке бір таблеткадан. Препарат дәрігердің бақылауымен ересектердің ішке қабылдауына арналған. Таблеткаларды көп мөлшердегі сумен ішіп, бүтіндей жұтқан жөн.

Асқазан-ішек: жағымсыз құбылыстар бәрінен жиірек асқазан-ішек жолы тарапынан байқалады. Қабынуға қарсы стероидты емес препараттар (ҚҚСП) қабылдағанда, әсіресе, егде жастағы пациенттерде кейде өлімге алып келетін пептидті ойық жара, ойық жараның ойылуы немесе асқазан-ішектен қан кету дамуы мүмкін. ҚҚСП енгізуден кейінгі жүрек айну, құсу, диарея, метеоризм, іш қату, диспепсия, іштің ауыруы, мелена, қан аралас құсу, ойық жаралы стоматиттің дамуы, колит немесе Крон ауруының өршуі туралы хабарламалар бар. Сонымен қатар, аз жиілікте гастрит байқалды.

ҚҚСП емінің аясында ісіну, артериялық гипертензия және жүрек жеткіліксіздігі байқалды.

Клиникалық зерттеулер нәтижелері және эпидемиологиялық деректер кейбір ҚҚСП (әсіресе, жоғары дозаларымен ұзақ уақыт емделгенде) артериялық тромбоз асқынуларының (мысалы, миокард инфарктісі немесе инсульт) қаупін арттырады деп жорамалдауға негіз бере алады.

- әсер етуші затқа немесе қосымша заттардың кез келгеніне аса жоғары сезімталдық

- осыған ұқсас әсері бар қосылыстар (мысалы, ацетилсалицил қышқылы немесе басқа ҚҚСП) демікпе ұстамаларын, бронх түйілуін, жедел ринит немесе есекжемді немесе осы препараттарға аса жоғары сезімталдықты туындататын пациенттер

- анамнезінде ҚҚСП еміне байланысты асқазан-ішектен қан кетулер немесе ойық жараның ойылуы; анамнезінде белсенді, болжамды немесе қайталамалы пептидті ойық жара немесе он екі елі ішектің ойық жарасы/қан кетуі (асқазан немесе ішектің расталған ойық жарасы немесе қан кетудің екі немесе одан көп жекелеген көріністерімен) бар пациенттер

- белсенді қан кетуі немесе қан ұюының бұзылуы (геморрагиялық диатез немесе қан ұюының бұзылуы) бар пациенттер

- жүрек жеткіліксіздігі (NYHA бойынша II-IV функционалдық класс), ишемиялық жүрек ауруы, шеткері артериялар аурулары немесе цереброваскулярлы аурулар

- бауыр немесе бүйрек функциясының ауыр бұзылулары

- жүктілік және лактация кезеңі

- балаларға және 18 жасқа дейінгі жасөспірімдерге

Варфаринмен өзара әрекеттесу зерттеулерін қоспағанда, дәрілік өзара әрекеттесулеріне зерттеу жүргізілмеген.

Ацеклофенак P450 2C9 цитохромы жүйесінде метаболизденеді және, in vitro зерттеулерінің деректеріне сай, ацеклофенак осы ферментті тежеуі мүмкін. Сондықтан фенитоин, циметидин, толбутамид, фенилбутазон, амиодарон, миконазол және сульфафеназолмен фармакокинетикалық өзара әрекеттесу қаупі болуы мүмкін. ҚҚСП тобына жататын басқа препараттар жағдайындағы сияқты, метотрексат пен литий сияқты бүйрекпен белсенді шығарылатын басқа препараттармен фармакокинетикалық өзара әрекеттесу қаупі де бар. Ацеклофенак қан плазмасы ақуыздарымен толық дерлік байланысады, демек, ескеру керек болатын орын алмасу типі бойынша қан плазмасы ақуыздарына тектестігі жоғары басқа препараттармен өзара әрекеттесу ықтималдығы бар.

Фармакокинетикалық өзара әрекеттесу зерттеулері жеткіліксіз болғандықтан, төменде берілген ақпарат басқа ҚҚСП үшін алынған деректерге негізделген:

Препараттардың келесі біріктірілімдерінен сақтану керек

ҚҚСП метотрексаттың өзекшелік секрециясын тежейді, одан бөлек, метотрексат клиренсінің төмендеуіне әкелетін болымсыз дәрілік өзара әрекеттесу орын алуы мүмкін, сондықтан метотрексаттың жоғары дозаларымен емделу кезінде үнемі ҚҚСП тағайындаудан сақтану керек.

Литий және дигоксин: кейбір ҚҚСП литий мен дигоксиннің бүйректік клиренсін тежейді, бұл қан сарысуында осы препараттар концентрацияларының артуына алып келеді. Литий мен дигоксин концентрацияларына жиі мониторинг өткізуге болатын жағдайларды қоспағанда, препараттардың осы біріктірілімінен аулақ болу керек.

Антикоагулянттар: ҚҚСП тромбоциттер агрегациясын тежейді және асқазан-ішек жолының шырышты қабығын зақымдайды, бұл антикоагулянттар қабылдайтын пациенттерде антикоагулянттар белсенділігінің жоғарылауына әкеліп, асқазан-ішек жолынан қан кету қаупін арттыруы мүмкін. Мұқият мониторинг өткізілетін жағдайларды қоспағанда, ацеклофенак пен ішке қабылданатын кумаринді топ антикоагулянттарының, тиклопидин, тромболитикалық препараттар және гепарин біріктірілімін тағайындаудан сақтану керек.

ҚҚСП-мен біріктірілген антиагрегантты препараттар және серотонинді кері қармаудың іріктелген тежегіштері асқазан-ішек жолынан қан кету қаупін арттыруы мүмкін.

Төменде берілген препараттар біріктірілімдері дозаны түзетуді және сақтық шарасын қадағалауды талап етуі мүмкін.

Метотрексат: Метотрексаттың төмен дозаларымен емдегенде, әсіресе, бүйрек жеткіліксіздігі бар пациенттерде ҚҚСП мен метотрексат арасында болуы мүмкін өзара әрекеттесуді де ескеру керек. Біріктірілген емді қолдану қажет болатын жағдайларда бүйрек функциясын бақылап отыру керек. ҚҚСП да, метотрексат та 24 сағат бойы бірге енгізілетін жағдайларда сақ болу қажет, өйткені метотрексат концентрациясы артуы мүмкін, бұл оның уыттылығының артуына алып келеді.

Циклоспорин, такролимус: Бір мезгілде ҚҚСП және циклоспорин немесе такролимус қолдану бүйрекпен простациклин синтезделуінің төмендеуіне орай бүйректік уыттану қаупін арттырады деп саналады. Сондықтан біріктірілген ем кезінде бүйрек функциясын мұқият бақылап отыру өте маңызды.

Басқа ҚҚСП: Ацетилсалицил қышқылы мен басқа қабынуға қарсы стероидты емес препараттарды бір мезгілде қолдану жағымсыз құбылыстар жиілігін арттыруы мүмкін, сондықтан сақ болу керек.

Диуретиктер: Ацеклофенак, басқа да ҚҚСП сияқты, диуретиктер белсенділігін тежеуі, фуросемид, буметанидтің диурездік әсерін және тиазидтердің гипотензиялық әсерін төмендетуі мүмкін. Калий жинақтаушы диуретиктермен бір мезгілде емделу калий мөлшерінің көбеюімен байланысты болуы мүмкін, демек, қан сарысуында калий мөлшерін бақылап отыру қажет.

Басқа диуретиктермен дәрілік өзара әрекеттесуін жоққа шығаруға болмайтынына қарамастан, бендрофлуазидпен бір мезгілде енгізілгенде ацеклофенактың артериялық қысымды бақылауға ықпал етпейтіні көрсетілген.

Гипотензиялық препараттар: ҚҚСП белгілі бір гипотензиялық препараттар тиімділігін төмендетуі де мүмкін. ҚҚСП-мен біріктірілген АӨФ тежегіштері немесе ангиотензин II рецепторларының антагонистері бүйрек функциясының бұзылуына әкелуі мүмкін. Бүйрек функциясы төмендеген кейбір пациенттерде, мысалы, егде жастағы пациенттерде немесе сусыздануы бар пациенттерде әдетте қайтымды болатын жедел бүйрек жеткіліксіздігінің қаупі орын алуы мүмкін. Демек, осы препараттарды ҚҚСП-мен біріктіріп қолданғанда, әсіресе, егде жастағы пациенттерді немесе сусыздануы бар пациенттерді емдегенде сақ болу қажет. Пациенттер жеткілікті дәрежеде гидратациялануы тиіс, одан бөлек, біріктірілген ем басталған соң, сондай-ақ кейіннен мезгіл-мезгіл бүйрек функциясына мониторинг өткізу қажеттілігін ескеруге кеңес беріледі.

Басқа диуретиктермен өзара әрекеттесуі жоққа шығарылмайтынына қарамастан, бендрофлуазидпен бір мезгілде енгізілгенде ацеклофенактың артериялық қысымды бақылауға ықпал етпейтіні көрсетілген.

Гипогликемиялық препараттар: Клиникалық зерттеулерде диклофенакты ішке қабылданатын гипогликемиялық препараттармен бір мезгілде, олардың клиникалық тиімділігіне ықпал етусіз қолдануға болатыны көрсетілген. Алайда, осы препараттың гипогликемиялық және гипергликемиялық әсері туралы жекелеген хабарламалар бар. Демек, ацеклофенакқа қатысты, гипогликемияны туындатуы мүмкін препараттар дозасын түзету мүмкіндігін ескеру керек.

Зидовудин: ҚҚСП мен зидовудин бір мезгілде қолданылғанда гематологиялық уыттану қаупі артады. Гемофилиядан зардап шегетін әрі зидовудинмен және ибупрофенмен қатарлас ем қабылдайтын АИТВ-оң пациенттерде гемартроз және гематомалардың түзілу қаупінің артуы туралы деректер бар.

Препаратты, циклооксигеназа-2 іріктелген тежегіштерін қоса, басқа ҚҚСП-мен бір мезгілде қолданбау керек.

Егер емдеу ұзақтығы ауру симптомдарын бақылауға қажетті ең қысқа ұзақтыққа дейін барынша қысқартылса, жағымсыз құбылыстарды азайта түсуге болады.

Асқазан-ішек жолына әсері

Кез келген ҚҚСП қабылданғанда, емдеу аясындағы кез келген уақытта, анамнезінде күрделі асқазан-ішек асқынуларының бар-жоғына қарамастан, үрейлі симптомдармен қатар жүретін немесе қатар жүрмейтін, өлімге әкелуі мүмкін асқазан-ішектен қан кету, асқазан немесе ішек ойық жарасының түзілуі немесе ойық жараның ойылуы туралы хабарламалар бар.

Анамнезінде асқазан немесе ішек ойық жарасы бар пациенттерде, әсіресе, егер ол қан кетумен немесе ойылумен асқынса, сондай-ақ егде жастағы пациенттерде асқазан-ішектен қан кету, ойық жара түзілуі немесе ойық жараның ойылу қаупі ҚҚСП жоғары дозаларымен емделу кезінде жоғары. Осы пациенттерді емдеуді ең аз тиімді дозадан бастау керек. Сонымен қатар, пациенттердің осы топтарын және ацетилсалицил қышқылын аз дозаларда немесе асқазан-ішек асқынуларының даму қаупін арттыруы мүмкін басқа препараттарды бір мезгілде қолдану қажет болатын пациенттерді емдегенде қорғаныс препараттарымен (мысалы, мизопростолом немесе протон помпасының тежегіштері) біріктіріп емдеу мүмкіндігін қарастыру керек.

Анамнезінде асқазан-ішек уыттануы бар пациенттер, бірінші кезекте, егде жастағылар емдеудің ерте сатыларындағы симптомдарға барынша көңіл бөліп, іш аумағындағы кез келген әдеттен тыс симптомдар туралы (әсіресе, асқазан-ішектен қан кету жөнінде) хабарлауы тиіс. Жүйелі әсер ететін кортикостероидтар, антикоагулянттар, мысалы, варфарин, серотонинді кері қармаудың іріктелген тежегіштері сияқты ойық жараның түзілуі немесе қан кету қаупін арттыруы мүмкін қатарлас дәрілік препараттарды немесе ацетилсалицил қышқылы сияқты антиагрегантты препараттарды қабылдайтын пациенттерді емдегенде сақ болу қажет.

Актинак 100 қабылдайтын пациенттерде асқазан-ішектен қан кету немесе ойық жараның түзілуі білінген жағдайда емдеуді тоқтату керек.

Ацеклофенак төменде атап көрсетілген аурулары бар пациенттерге сақтықпен және мұқият медициналық қадағалаумен тағайындалу керек, өйткені олардың ағымы нашарлап кетуі мүмкін:

- асқазан-ішек жолының жоғарғы және төменгі бөлімдерін қоса, асқазан-ішек жолы ауруларын көрсететін симптомдар

- анамнездегі асқазан немесе ішектің ойық жарасы, қан кетуі немесе ойық жараның ойылуы

- ойық жаралы колит

- Крон ауруы

- гематологиялық аурулар, жүйелі қызыл жегі (ЖҚЖ), порфирия және қан түзудің бұзылуы

Жүрек-қантамыр жүйесіне әсері және мидың қанмен қамтылуы

ҚҚСП емінің аясындағы сұйықтық іркілісі мен ісінудің дамуы жөнінде хабарламалар бар болғандықтан, айқындылығы әлсізден орташаға дейінгі артериялық гипертензиясы және/немесе іркілісті жүрек жеткіліксіздігі бар пациенттерді емдегенде тиісінше қадағалау және нұсқаулар беру қажет.

Клиникалық зерттеулер нәтижелері мен эпидемиологиялық деректер кейбір ҚҚСП (әсіресе, жоғары дозаларда және ұзақ уақыт емдегенде) артериялық тромбоз асқынуларының (мысалы, миокард инфарктісі немесе инсульт) даму қаупінің артуын туындатуы мүмкін деп жорамалдауға негіз бола алады. Ацеклофенак қолдану кезіндегі осы қауіпті жоққа шығару үшін деректер жеткіліксіз.

Жүрек-қантамыр жүйесіне тән қауіп факторларымен (мысалы, артериялық гипертензия, гиперлипидемия, қант диабеті және шылым шегу) бақыланбайтын артериялық гипертензиясы, іркілісті жүрек жеткіліксіздігі (NYHA бойынша I функционалдық класы) бар пациенттерде ацеклофенак қолдану кезінде ерекше сақ болу керек.

Анамнезінде церебро-васкулярлы қан кету болған пациенттерге ацеклофенак тағайындалғанда сақтық шарасын қадағалап, мұқият медициналық бақылау да орнату керек.

Бауыр мен бүйрекке әсері

ҚҚСП емі дозаға тәуелді простагландиндер синтезінің азаюын туындатып, бүйрек жеткіліксіздігіне түрткі болуы мүмкін. Жүрек немесе бүйрек функциясының бұзылулары, бауыр дисфункциясы бар пациенттерде, диуретиктермен ем қабылдайтын немесе қуыс ішіне жасалған операциядан кейін қалыпқа келетін пациенттерде, сондай-ақ егде жастағы пациенттерде бүйрек қан ағымын демеу үшін простагландиндердің маңыздылығын назарға алу қажет.

Бауыр немесе бүйрек функциясының бұзылулары бар пациенттерде, сондай-ақ сұйықтық іркілісіне бейімдейтін басқа ауруларға шалдыққан пациенттерде сақ болу керек. Осы пациенттерде ҚҚСП емі бүйрек функциясының бұзылуына және организмде сұйықтық іркілуіне әкелуі мүмкін. Препарат диуретиктермен ем қабылдайтын пациенттерге немесе, керісінше, гиповолемия қаупі бар пациенттерге тағайындалғанда да сақ болу қажет. Ең төмен тиімді дозасын тағайындау және бүйрек функциясын жүйелі бақылап отыру қажет. Препараттың бүйрек функциясына әсері, әдетте, ацеклофенакты тоқтатудан кейін қайтымды.

Егер бауырдың функционалдық тестілер көрсеткіштерінің қалыпты мәндерден ауытқуы сақталған немесе бауыр жеткіліксіздігінің дамуына сәйкес клиникалық симптомдар білінгенде жоғарылаған жағдайда немесе өзге көріністер (мысалы, эозинофилия, бөртпе) білінген жағдайда ацеклофенакпен емдеуді тоқтату керек.

Гепатит алдыңғы симптомдарсыз дамуы мүмкін.

Бауыр порфириясы бар пациенттерде ҚҚСП қолдану аурудың өршуіне түрткі болуы мүмкін.

Аса жоғары сезімталдық және тері реакциялары

Басқа ҚҚСП қолданған жағдайдағы сияқты, препараттың ерте экспозициясында, анафилаксиялық/анафилактоидты реакцияларды қоса, аллергиялық реакциялар білінуі мүмкін. Өте сирек жағдайларда, эксфолиативті дерматитті, Стивенс-Джонсон синдромын және уытты эпидермалық некролизді қоса, күрделі тері реакциялары байқалды, олардың кейбірі өлімге әкелуі мүмкін. Пациенттер емдеу курсының басында осы реакциялардың аса көп жоғары даму қаупіне бейім, көпшілік жағдайларда реакциялар емдеудің алғашқы айында манифестацияланады. Тері бөртпесінің, шырышты қабықтар зақымдануының бірінші белгілерінде немесе аса жоғары сезімталдықтың кез келген басқа симптомдарында Актинак 100 емін тоқтату қажет.

Айрықша сирек жағдайларда желшешек тері және жұмсақ тіндер тарапынан күрделі инфекциялық асқынуларға түрткі болуы мүмкін. Қазіргі сәтте осы инфекциялық аурулар ағымының нашарлауында атқаратын ҚҚСП рөлін жоққа шығаруға болмайды. Демек, желшешекте Актинак 100 тағайындамауға кеңес беріледі.

Гематологиялық көрсеткіштерге әсері

Ацеклофенак тромбоциттер агрегациясын қайтымды тежеуі мүмкін.

Тыныс алу жүйесі тарапынан бұзылулар

Препарат бронх демікпесінен зардап шегетін немесе анамнезінде бронх демікпесі бар пациенттерге тағайындалғанда сақ болу қажет, өйткені осындай пациенттерде ҚҚСП бронх түйілуін туғызуы мүмкін екені туралы хабарламалар бар.

Егде жастағы пациенттер

Егде жастағы пациенттерді емдегенде сақ болу керек, өйткені осы жас тобында ҚҚСП емімен байланысты жағымсыз құбылыстардың, әсіресе, өлімге соқтыруы мүмкін асқазан-ішектен қан кету және ойық жараның ойылу жиілігі жоғары. Бұдан бөлек, егде жастағы пациенттер көп дәрежеде бүйрек, бауыр немесе жүрек-қантамыр жеткіліксіздігіне бейім.

Ұзақ уақыт емдеу

Жалпы қан талдауын, бауыр мен бүйректің функционалдық тестілеірн жүйелі орындай отырып, қабынуға қарсы стероидты емес препараттармен ұзақ уақыт ем қабылдайтын барлық пациенттерді мұқият қадағалау қажет.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері:

Препаратпен емделу кезінде әлсіздікті, бас айналуын, бағдардан жаңылуды немесе орталық жүйке жүйесі тарапынан басқа бұзылуларды сезінетін пациенттер көлік құралдарын басқармауы және механизмдермен жұмыс істемеуі тиіс.

Симптомдары: жүрек айну, құсу, асқазанның ауыруы, бас айналу, ұйқышылдық, бас ауыру.

Емі: антацидтер қажеттілігіне қарай және артериялық гипотензия, бүйрек жеткіліксіздігі, құрысулар, асқазан-ішек жолының тітіркенуі және тыныстың тарылуы сияқты асқынулардың демеуші және симптоматикалық емінің басқа түрлері.

Алюминий фольгадан (Аlu/Alu) жасалған пішінді ұяшықты қаптамада 10 таблеткадан.

Пішінді 2 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Құрғақ, жарықтан қорғалған жерде, 25 С-ден аспайтын температурада сақтау керек.

Балалардың қолы жетпейтін жерде сақтау керек!

3 жыл

Жарамдылық мерзімі өткеннен кейін қолдануға болмайды!

Рецепт арқылы

Өндіруші

«Аджанта Фарма Лимитед»

Аджанта Хаус, Чаркоп, Кандивли (З),

Мумбай 400067, Үндістан

Қаптаушы ұйымның атауы мен елі

Аджанта Фарма Лимитед, Үндістан

Тіркеу куәлігі иесінің атауы және елі

Аджанта Фарма Лимитед, Үндістан

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын ұйымның мекенжайы:

Қазақстан Республикасы, 050009,

Алматы қ., Аносов к-сі, 54 / 28 (Төле би к-сі)

Тел./факс: 8 (727) 374-79-50, 277-79-56;

E-mail: puneet.kapur@ajantapharma.com

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

ConsultAsia ЖШС

Алматы қ., Шевченко к-сі, 165 Б, 307 кеңсе

тел: +77778051116/+77051708825/+77051708876 (24-сағат бойы қолжетімді)

факс: +727-379-42-58

e-mail: pv@consultingasia.kz

info@consultingasia.kz