Авиментин

Авиментин

Жоқ

Суспензия дайындауға арналған ұнтақ 200 мг/28.5 мг және 400 мг/57 мг

Жүйелі қолдануға арналған бактерияға қарсы препараттар. Бактерияға қарсы бета- лактамдық препараттар, пенициллиндер. Пенициллиндер бета-лактамазалар тежегіштерімен біріктілімде. Амоксициллин және бета-лактамаза тежегіші.

АТХ коды J01CR02

Дәрілік препарат ересектер мен балаларда келесі инфекцияларды емдеу үшін қолдануға арналған

- жедел бактериялық синуситте

- жедел ортаңғы отитте

- созылмалы бронхиттің өршуінде

- ауруханадан тыс пневмонияда

- циститте

- пиелонефритте

- тері мен жұмсақ тіндердің инфекциялары (атап айтқанда, тері асты шелінің қабынуы - целлюлитте, жәндіктер шаққанда, жедел абсцесстер мен жақсүйек-бет маңының флегмоналарында)

- сүйектер мен буындардың инфекцияларында, атап айтқанда остеомиелитте

Бактерияға қарсы дәрілерді дұрыс қолдану жөніндегі ресми нұсқаулықты қарастыру керек.

Қолдануды бастағанға дейін қажетті мәліметтер тізбесі

- амоксициллинге, клавулан қышқылына немесе қосымша заттардың кез-келгеніне аса жоғары сезімталдық

- басқа бета-лактамды антибиотиктерге (цефалоспориндер, карбапенемдер, монобактамдар) белгілі аса жоғары сезімталдық

- амоксициллин/клавулан қышқылы біріктірілімін қабылдау аясында дамыған сарғаю немесе бауыр функциясының бұзылуы

- фенилкетонурия (препараттың құрамында аспартамның болуына байланысты)

- 2 айға дейінгі балаларға

Сақтықпен: бауыр қызметінің бұзылулары.

Қолдану кезіндегі қажетті сақтандыру шаралары

Авиментин препаратымен емдеуді бастар алдында пенициллиндерге, цефалоспориндерге немесе басқа аллергендерге бұрын болған аса жоғары сезімталдық реакцияларына қатысты толық анамнез жинау қажет.

Пенициллинмен ем қабылдап жүрген пациенттерде аса жоғары сезімталдықтың, кейде өліммен аяқталатын (анафилактоидтық және терінің ауыр жағымсыз реакцияларын қоса алғанда) ауыр реакцияларының дамығаны туралы хабарламалар алынды.

Аллергиялық реакциялар туындаған жағдайда Авиментин препаратымен емдеуді тоқтату және сәйкесінше баламалы емді бастау керек. Аса жоғары сезімталдықтың елеулі реакцияларында тез арада эпинефринді енгізу керек. Сондай-ақ оксигенотерапия, глюкокортикостероидтарды вена ішіне енгізу және интубацияны қоса тыныс жолдарының өткізгіштігін қамтамасыз ету қажет болуы мүмкін.

Егер инфекцияның амоксициллинге сезімтал микроорганизмдерден туындағаны дәлелденсе, ресми нұсқаулыққа сәйкес амоксициллин/клавулан қышқылынан амоксициллинге көшу туралы мәселені қараған жөн.

Инфекциялық мононуклеозға күдік туындағанда Авиментин препаратын тағайындау ұсынылмайды, өйткені аталған ауру бар пациенттерде амоксициллин қызылша тәрізді бөртпе туындатуы мүмкін, ол аурудың диагностикасын қиындатады.

Болжалды патогендердің бета-лактам агенттеріне төзімділігі жоғары, яғни клавулан қышқылының тежелуіне сезімтал бета-лактамазалар арқылы болмайтын қаупі жоғары болған кезде препаратты қолдануға болмайды. Препараттың бұл түрі пенициллинге төзімді S. рneumoniae емдеу үшін қолдануға болмайды.

Ұзақ мерзімді пайдалану кейде сезімтал емес микроорганизмдердің шамадан тыс өсуіне әкелуі мүмкін.

Колиттер

Бактерияға қарсы препараттарды қолданумен байланысты колиттер амоксициллинді қоса алғанда, бактерияға қарсы агенттердің барлығымен дерлік тіркелген және ауырлық дәрежесі бойынша жеңілден өмірге қауіп төндіретінге дейін өзгеруі мүмкін. Сондықтан кез келген антибиотикті қабылдау кезінде немесе қабылдағаннан кейін диарея бар пациенттерде осы диагнозды ескеру маңызды. Антибиотиктермен байланысты колит туындаған жағдайда амоксициллин/клавулан қышқылын қабылдауды дереу тоқтату, дәрігермен кеңесу және тиісті емін бастау керек. Бұл жағдайда антиперистальтикалық дәрілік заттарды қолдануға болмайды.

Емдеудің ерте сатысында пустуламен байланысты фебрильді жайылған эритеманың пайда болуы жедел жайылған экзантематозды пустулездің (AGEP) симптомы болуы мүмкін. Бұл реакция препаратты тоқтатуды талап етеді және амоксициллинді кейіннен енгізуге болмайды.

Авиментин препаратымен ұзақ уақыт емдеу кезінде бүйрек, бауыр және қан түзу функциясын мезгіл-мезгіл бағалап отыру ұсынылады.

Амоксициллин/клавулан қышқылын қабылдаған пациенттерде протромбин уақыты ұзаруы мүмкін. Егер антикоагулянттар бір мезгілде қабылданса, тиісті бақылау жасалуы тиіс. Пероральді антикоагулянттардың дозасын түзету антикоагуляцияның қажетті деңгейін демеп отыру үшін қажет.

Асқазан-ішек жолы тарапынан жағымсыз әсерлердің даму қаупін төмендету мақсатында препаратты ас ішудің басында қабылдау керек.

Ауыз қуысының күтімі тістердің түсі өзгеруінің алдын алуға көмектеседі, өйткені бұл үшін тісті тазалау жеткілікті.

Егде жастағы пациенттерде қолданылуы

Егде жастағы пациенттерге Авиментин препаратының дозасын төмендету талап етілмейді, дозалары ересектерге арналғандай. Бүйрек функциясының бұзылулары бар егде жастағы пациенттерде дозасын бүйрек функциясының бұзылулары бар ересектердегідей түзету керек.

Балаларда қолдану

2 айдан кіші балаларға препаратты қолдануға болмайды.

Бауыр жеткіліксіздігі

Емді сақтықпен жүргізеді, бауыр функциясына ұдайы мониторинг жүргізу керек. Пациенттердің осы санатында дозалау режиміне түзету жүргізу үшін деректер жеткіліксіз.

Гепатобилиарлық бұзылыстар көбінесе, ерлерде және егде пациенттерде тіркелген және ұзақ емделумен байланысты болуы мүмкін. Бұл оқиғалар туралы балаларда өте сирек мәлімделеді. Барлық популяцияларда белгілері мен симптомдары әдетте, емдеу кезінде немесе емдеуден кейін көп ұзамай пайда болады, бірақ кейбір жағдайларда емдеуді тоқтатқаннан кейін бірнеше аптадан кейін көрініс беруі мүмкін. Олар әдетте қайтымды. Гепатобилиарлық реакциялар елеулі болуы мүмкін және аса сирек жағдайларда өлім жағдайлары тіркелген. Олар әрдайым дерлік ауыр ауруы бар немесе бауырға әсер ететіндігі белгілі қатарлас препараттарды қабылдаған пациенттерде туындаған.

Бүйрек жеткіліксіздігі

Препараттың дозасы бұзылудың дәрежесіне қарай түзетілуі тиіс. Бүйрек функциясының бұзылуы бар пациенттерде Авиментин препаратының дозасын бұзылудың дәрежесіне байланысты төмендету керек. Бүйрек функциясы бұзылған немесе препараттың көп дозаларын қабылдаған пациенттерде құрысулар пайда болуы мүмкін.

Диурезі төмендеген пациенттерде аса сирек жағдайларда, көбінесе препаратты парентеральді қолдану кезінде кристаллурия дамығаны туралы хабарланды. Амоксициллиннің жоғары дозаларын енгізу кезінде сұйықтықтың жеткілікті мөлшерін қабылдау және амоксициллин кристалдарының түзілу ықтималдығын азайту үшін талапқа сай диурезді демеп отыру ұсынылады.

Авиментин препаратын ішке қабылдау несептегі амоксициллин мөлшеріннің жоғарылығына алып келеді, бұл несептегі глюкозаны анықтау (мысалы, Бенедикт сынамасы, Фелинг сынамасы) кезінде жалған оң нәтижелерге алып келуі мүмкін. Бұл жағдайда несептегі глюкоза концентрациясын анықтаудың глюкозооксиданттық әдісін қолдану ұсынылады.

Препарат құрамында клавулан қышқылының болуы IgG мен альбуминнің эритроциттердің жарғақшаларымен спецификалық емес байланысуын тудыруы мүмкін, бұл Кумбс сынамасының жалған оң нәтижесіне әкеледі.

Кейінірек аспергиллез инфекциясы табылмаған амоксициллин/клавулан қышқылын қабылдаған пациенттерде Bio-Rad Laboratories Platelia Aspergillus EIA тестін қолдана отырып, оң сынақ нәтижелері туралы есептер болды. Bio-Rad Laboratories platelia Aspergillus EIA тесті арқылы аспергиллге жатпайтын полисахаридтермен және полифураноздармен айқаспалы реакциялар туралы хабарланды. Демек, амоксициллин/клавулан қышқылын қабылдайтын пациенттерде тесттің оң нәтижелерін абайлап түсіндіру және басқа диагностикалық әдістермен растау керек.

Қосымша заттар

Құрамында 6.83 мг және 10.40 мг мөлшерде фенилаланин (аспартам (Е951) бар, фенилкетонуриясы бар пациенттерге қолдануға болмайды.

Басқа дәрілік препараттармен өзара әрекеттесуі

Пероральді антикоагулянттар

Пероральді антикоагулянттар мен бактерияға қарсы пенициллиндік препараттар іс жүзінде өзара әрекеттесуі туралы хабарларсыз кеңінен пайдаланылып келді. Алайда, әдебиеттерде амоксициллин курсы тағайындалған аценокумаролмен немесе варфаринмен емделген пациенттерде халықаралық қалыптасқан қатынастардың (ХҚҚ) жоғарылағаны туралы жағдайлар бар. Егер бірге енгізу қажет болса, протромбин уақытын және амоксициллинді қосқандағы немесе тоқтатқандағы ХҚҚ мұқият бақылау керек. Бұдан өзге, пероральді антикоагулянттардың дозасын түзету қажет болуы мүмкін.

Метотрексат

Пенициллиндер метотрексат экскрециясын төмендетіп, уыттылығының артуы ықтималдылығын тудыруы мүмкін.

Пробенецид

Пробенецидті бір мезгілде қабылдау ұсынылмайды. Пробенецид амоксициллиннің бүйректік өзекшелік секрециясын төмендетеді. Пробенецидті бір мезгілде қабылдау қандағы амоксициллин деңгейінің жоғарылауына және ұзаруына алып келуі мүмкін, бірақ клавулан қышқылында олай емес.

Микофенолат мофетил

Микофенолат мофетилді қабылдаған пациентерде амоксициллин/клавулан қышқылын пероральді қабылдау басталғаннан кейін микофенол қышқылының (МФҚ) белсенді метаболиті концентрациясының 50%-ға дейін төмендегені тіркелді. Дозаны енгізгенге дейінгі деңгейдің өзгеруі МФҚ-ның жалпы әсерінің өзгерістерін дәл көрсетпеуі мүмкін. Сондықтан, әдетте, трансплантат дисфункциясының клиникалық белгілері болмаған кезде микофенолат мофетилдің дозасын өзгерту талап етілмейді. Дегенмен, біріктірген кезде және антибиотиктермен емдеуден кейін көп ұзамай мұқият клиникалық мониторинг жүргізу керек.

Аллопуринол

Амоксициллинмен емдеу кезінде аллопуринолды бір мезгілде қолдану терінің аллергиялық реакцияларының дамуы ықтималдылығын арттыруы мүмкін. Аллопуринол мен амоксициллин тригидраты/калий клавуланаты біріктірілімінің бір мезгілде қолданылғаны туралы деректер жоқ.

Арнайы сақтандырулар

Педиатрияда қолдану

2 айға толмаған балаларға препаратты қолдануға болмайды.

Жүктілік

Клиникаға дейінгі деректер жүктілікке, шарананың эмбриональді дамуына, босануға немесе босанғаннан кейінгі дамуға қатысты тікелей немесе жанама зиянды әсерлерді көрсетпейді. Адамдарда жүктілік кезінде амоксициллин/клавулан қышқылын қолданудың шектеулі деректері туа біткен даму кемістіктерінің жоғары қаупін көрсетпейді. Амоксициллин/клавулан қышқылымен профилактикалық емдеу жаңа туған нәрестелерде некроздық энтероколиттің даму қаупінің жоғарылауымен байланысты болуы мүмкін. Тек ана үшін болжамды пайдасы бала үшін ықтимал қауіптен жоғары жағдайларды қоспағанда, жүктілік кезінде Авиментин препаратын қолдану ұсынылмайды.

Емшекпен емізу

Авиментин препараты емшек сүтіне шығарылады. Демек, емшек сүтімен қоректенетін нәрестеде диарея және шырышты қабықтың зеңдік инфекциясы мүмкін. Сенсибилизация мүмкіндігін ескеру қажет. Амоксициллин/клавулан қышқылы емшек сүтімен емізу кезінде пайда-қауіп бағаланғаннан кейін ғана қолданылуы керек. Емшек сүтімен қоректенетін нәрестелерде жағымсыз әсерлер пайда болған жағдайда, емізуді тоқтату керек.

Препараттың көлік құралын немесе қауіпті механизмдерді басқару қабілетіне ықпал ету ерекшеліктері

Автомобиль басқару және машиналарды пайдалану қабілетіне әсер етуіне ешқандай зерттеулер жүргізілген жоқ. Препарат жағымсыз әсерлерді (мысалы, аллергиялық реакциялар, бас айналу, құрысу) тудыруы мүмкін болғандықтан, көлік құралдарын және қауіптілігі зор механизмдерді басқару кезінде пациенттерге сақтық шаралары туралы ескерту қажет.

Қолдану жөніндегі нұсқаулар

Дозалану режимі

Дозалар препараттың жеке компонентінің бірліктерінде көрсетілген жағдайларды қоспағанда, амоксициллин/клавулан қышқылы мөлшері бойынша көрсетілген.

Инфекциялық ауруды емдеу үшін таңдалған дозада келесілер ескерілуі тиіс:

- күтілетін патогендер және олардың бактерияға қарсы агенттерге ықтимал сезімталдығы

- аурудың ауырлығы

- пациенттің жасы, салмағы және бүйрек функциясы

Баламалы дозаларды (мысалы, амоксициллиннің неғұрлым жоғары дозаларын және/немесе амоксициллиннің клавулан қышқылына әртүрлі арақатынасын қамтамасыз ететін) пайдалануды қажет деп қарастырған жөн.

Емдеу ұзақтығы пациенттің реакциясына байланысты анықталуы тиіс. Кейбір инфекциялар (мысалы, остеомиелит) емдеудің ұзағырақ кезеңдерін талап етеді. Емдеуді 14 күннен артық ұзартпау керек.

Балалар

12 жасқа дейінгі немесе дене салмағы 40 кг аз балалар

Дозаны, жас шамасына және салмағына қарай, тәулігіне дене салмағының мг/кг немесе дайын суспензияның миллилитрлерімен көрсетеді.

Ұсынылған дозалау режимі:

- тәулігіне 25 мг/3,6 мг/кг-ден тәулігіне 45 мг/6,4 мг/кг дейін, 2 қабылдауға бөлінген, жеңіл және орташа инфекцияларда (қайталанатын тонзиллит, тері және жұмсақ тіндер инфекциялары)

- тәулігіне 45 мг/6,4 мг/кг-ден тәулігіне 70 мг/10 мг/кг дейін, 2 қабылдауға бөлінген, күрделі инфекцияларды (ортаңғы отит, синусит, төменгі тыныс жолдарының инфекциялары) емдеу үшін.

Авиментин препаратының бір реттік дозасын дене салмағына қарай таңдау кестесі.

* Препараттың 5 мл артық бір реттік қабылдануын болдырмау үшін, дене салмағы >8 кг балалар үшін 400 мг/57 мг Авиментин препаратын пайдаланыңыз.

2 жасқа толмаған балаларда Авиментин препаратының тәулігіне 45 мг/6,4 мг/кг асатын осы дозасын қолданудың клиникалық деректері жоқ.

Дене салмағы 40 кг аз балалар үшін ең жоғары тәуліктік дозасы 1000-2400 мг амоксициллин/143-600 мг клавулан қышқылын құрайды. Амоксициллиннің жоғарырақ тәуліктік дозасын тағайындау қажет болған жағдайда, клавулан қышқылының жоғары дозасының қажеттілігінсіз қабылдануына жол бермеу үшін, Авиментин препаратының басқа дозасын тағайындау керек.

Жасы 2 айға толмаған балаларда қолдануға болмайды.

Егде жастағы пациенттер

Дозасын түзету қажет деп саналмайды.

Ем сақтықпен жүргізіледі; ұдайы бауыр функциясына мониторинг жүргізіледі.

Дозаларды түзету амоксициллиннің ең жоғары ұсынылған дозасына және креатинин клиренсі мәніне негізделген.

Енгізу әдісі мен жолы

Ішке қолданылады.

Асқазан-ішек жолына потенциальді жақпаушылығын азайту үшін Авиментин препаратын тамақтану кезінде қабылдау керек.

Суспензия бірінші қолданар алдында бірден сұйылтылады.

Пайдаланар алдында қақпағының бүтіндігін тексеріңіз. Ұнтақ бар құтыны шайқаңыз. Ұнтақты бөлме температурасына дейін салқындатылған қайнаған суда ерітіп, біртіндеп шайқап, құтыдағы белгіге дейін су қосу керек. Суспензияның дайын көлемі 100 мл тең. Құтыны төңкеру және толық ерігенге дейін мұқият сілку керек. Құтыны әрбір пайдаланар алдында шайқау керек. Препаратты дозалау үшін өлшегіш стақанды пайдалану керек, оны әрбір қолданғаннан кейін жақсылап шаю керек. Суспензияның аздаған көлемдерін дәлірек дозалау үшін, әсіресе, 3 айға толмаған балаларда, стандартты бір реттік медициналық шприцті пайдалану қажет. 2 жасқа дейінгі балаларды емдеуде Авиментин препаратының дайын суспензиясын жартылай сумен сұйылтуға болады.

Артық дозалану жағдайында қабылдау қажет болатын шаралар

Симптомдары: асқазан-ішек симптомдары және сұйықтық пен электролиттер теңгерімінің бұзылуы айқын болуы мүмкін. Кейбір жағдайларда бүйрек жеткіліксіздігіне әкелетін амоксициллин кристаллуриясы байқалды. Бүйрек функциясының бұзылулары бар немесе жоғары дозаларын қабылдап жүрген пациенттерде құрысулар туындауы мүмкін.

Амоксициллиннің көбінесе үлкен дозаларын вена ішіне енгізуден кейін қуық катетерлерінде шөгетіні хабарланды. Өткізгіштік күйін жүйелі тексеріп отыру керек.

Емі: асқазан-ішек симптомдарын су-электролит теңгеріміне көңіл бөле отырып, симптоматикалық емдеуге болады. Амоксициллин/клавулан қышқылын қан ағымынан гемодиализ арқылы шығаруға болады.

Дәрілік препаратты қолдану тәсілін түсіну үшін медицина қызметкерінен кеңес алуға бару жөнінде нұсқаулар

Егер сізде осы дәрілік препаратты қолдану жөнінде қандай-да бір қосымша сұрақтар туындаса, өз дәрігеріңізге немесе фармацевтке жүгініңіз.

ДП стандартты қолдану кезінде көрініс беретін жағымсыз реакциялардың сипаттамасы және осы жағдайда қабылдау керек шаралар

Өте жиі

- диарея

Жиі

- терінің және шырышты қабықтардың кандидозы

- жүрек айнуы, құсу

Жүрек айнуы препараттың жоғары дозаларын қолданғанда көбірек кездеседі. Көрініс беру дәрежесін төмендету үшін препаратты ас ішер алдында қабылдау ұсынылады.

Жиі емеc

- бас айналуы, бас ауыруы

- диспепсия

- бауыр ферменттері АЛТ/АСТ деңгейінің орташа жоғарылауы (бета-лактамдық антибиотиктермен ем қабылдап жүрген пациенттерде байқалады, алайда, оның клиникалық мәні белгісіз)

- тері бөртпесі, қышыну, есекжем

Сирек

- қайтымды лейкопения (нейтропенияны қоса), тромбоцитопения

- мультиформалы эритема

Белгісіз

- дәрілік заттарға, эозинофилиямен және жүйелі симптомдармен жүретін реакция (DRESS-синдром)

- қайтымды агранулоцитоз және гемолиздік анемия, қан кету уақыты мен протромбиндік уақыт индексінің артуы

- ангионевроздық ісіну, анафилаксия; сарысу құю ауруына ұқсайтын синдром, аллергиялық васкулит

- қайтымды жоғары белсенділік және құрысулар, асептикалық менингит

- антибиотикпен астасқан колит (жалғанжарғақшалы және геморрагиялықты қоса)

- қара түкті тіл (тілдің жіпше тәрізді бүртіктерінің созылмалы гиперплазиясы)

- гепатит, холестаздық сарғаю

- сезімтал емес микрофлоралардың шамадан тыс көбеюі

- Стивенс-Джонсон синдромы, уытты эпидермалық некролиз, буллёзді эксфолиативтік дерматит, жедел жайылған экзантемалық пустулёз, асептикалық менингит (аталған симптомдар дамыған жағдайда препаратты дереу тоқтату қажет).

- несептегі кристалдар жедел бүйрек жеткіліксіздігіне әкеледі

- ортасында қыртысы бар шеңберде орналасқан көпіршіктері бар бөртпе немесе інжу тізбегі (IgA сызықтық ауруы)

- ми мен жұлынның айналасындағы қабықтың қабынуы (асептикалық менингит)

- интерстициальді нефрит, кристаллурия

- тіс түсінің өзгеруі.

Аталған белгілер мен симптомдар әдетте, емдеу үдерісінде немесе ем аяқталғаннан кейін бірден кездеседі, алайда, жекелеген жағдайларда ем аяқталғаннан кейін бірнеше апта бойы көрініс бермеуі мүмкін. Жағымсыз құбылыстар, әдетте қайтымды. Ауыз қуысына күтім жасау тіс эмалі түсінің өзгеруінің алдын алуға көмектеседі, өйткені бұл үшін тісті тазалау жеткілікті.

Бауыр тарапынан жағымсыз құбылыстар ауыр болуы мүмкін, өте сирек жағдайларда өлімге соқтырғаны туралы хабарлар болды. Барлық жағдайларда дерлік бұлар елеулі қатарлас патологиясы бар адамдар немесе гепатоуытты болуы ықтимал препараттарды бір мезгілде қабылдап жүрген адамдар болды.

Аллергиялық реакциялар кезінде назар аудару керек жағдайлар:

• тері бөртпесі

• қан тамырларының қабынуы (васкулит), ол теріде қызыл немесе күлгін дөңес дақтар түрінде көрінуі мүмкін, бірақ дененің басқа бөліктеріне де әсер етуі мүмкін

• қызба, буын ауруы, мойын, қолтық немесе шап бездерінің ісінуі

• ісіну, кейде бет немесе тамақ (ангионевроздық ісіну) тыныс алуды қиындатады

• коллапс

• аллергиялық реакциялар аясында кеудедегі ауырсыну, бұл аллергиядан туындаған миокард инфарктісінің симптомы болуы мүмкін (Кунис синдромы)

Егер сізде осы симптомдардың бірі пайда болса, дереу дәрігерге қаралыңыз.

Тоқ ішектің қабынуы

Әдетте қан мен шырыш аралас сулы диареяны, іштің ауыруы және/немесе қызбаны тудыратын тоқ ішектің қабынуы.

Ұйқы безінің жедел қабынуы (жедел панкреатит)

Егер сізде асқазан аймағында қатты және тұрақты ауырсыну болса, бұл жедел панкреатиттің белгісі болуы мүмкін. Дәрілік индукцияланған энтероколит синдромы (DIES):

DIES жағдайлары негізінен амоксициллин/клавуланатпен емделген балаларда байқалды. Бұл қайталанатын құсудың жетекші симптомы бар аллергиялық реакцияның бір түрі (препаратты <қабылдаудан> <енгізуден> <қолданудан> кейін 1-4 сағаттан кейін). Басқа симптомдарға іштің ауыруы, дімкәстік, диарея және төмен қан қысымы кіруі мүмкін.

Егер сізде осы симптомдар пайда болса, мүмкіндігінше тезірек дәрігерден кеңес сұраңыз.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

5 мл суспензияның құрамында

белсенді заттар: 241.038 мг және 482.08 мг амоксициллин тригидраты, 200 мг және 400 мг амоксициллинге баламалы; 74.671 мг және 149.35 мг сұйылтылған калий клавуланаты, 28.50 мг және 57.00 мг клавулан қышқылына баламалы

қосымша заттар: коллоидты кремнийдің қостотығы, Trusil құлпынай хош иістендіргіші, аспартам, гидроксипропилметилцеллюлоза, кремнийдің қостотығы, ксантан шайыры, янтарь қышқылы.

Сыртқы түрінің, иісінің, дәмінің сипаттамасы

Ақ немесе ақ дерлік түсті ұнтақ.

Қалпына келтірілген суспензия - ақ немесе ақ дерлік түсті, өзіне тән иісі бар

Шығарылу түрі және қаптамасы

Препаратты тығыздығы жоғары полиэтиленнен жасалған, сыйымдылығы 100 мл, дәл сондай материалдан жасалған бұралатын қақпағы бар құтыларға салады.

1 құтыдан өлшегіш стақанмен және медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

2 жыл.

Жарамдылық мерзімі өткеннен кейін қолдануға болмайды!

Құрғақ, жарықтан қорғалған жерде, 30º С-ден аспайтын температурада сақтау керек.

Қалпына келтірілген суспензияны тоңазытқышта 20 С-ден 80С-ге дейінгі температурада сақтау және 7 күн ішінде пайдалану керек. Мұздатып қатыруға болмайды!

Балалардың қолы жетпейтін жерде сақтау керек!

Рецепт арқылы.

Өндіруші туралы мәліметтер

MEDICEF PHARMA, Үндістан

Plot No. 28, 29&48, Phase-I, EPIP Jharmajri,

Baddi, Distt. Solan (H.P.), Үндістан

Тел./факс: +91 9654337600

Электронды пошта: info@medicefpharma.com

Тіркеу куәлігінің ұстаушысы

AVIMED REMEDIES LLP, Үндістан

302, Vatika Professional Point,

Golf Course Extension Road, Sector-66

Gurugram-122001, Haryana-India

Тел./факс: +91124 4222244

Электронная почта: direct@avimedremedies.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын жауапты ұйымның атауы, мекенжайы және байланыс деректері (телефон, факс, электронды пошта)

«Авицена-ЛТД» ЖШС, Қазақстан

050010, Алматы қ., Радлов к-сі, 65 үй, 6 т.е.

Тел./факс: (727) 344 19 90/91/92/93

Электронды пошта: direct@avitsena.kz

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«СonsultAsia» ЖШС

Қазақстан,

050061, Алматы,

Шевченко к-сі, 165Б

Тел.: +7705-1708825/+7(727) 379 42 58

Электронды пошта: pv@consultingasia.kz