Снип
Инструкция
-
русский
-
қазақша
Саудалық атауы
Снип
Халықаралық патенттелмеген атауы
Жоқ
Дәрілік түрі
Таблеткалар
Құрамы
Бір таблетканың құрамында
белсенді заттар - 361.00 мг парацетамол ДС 90** (325.00 мг парацетамолға баламалы), 15.00 мг псевдоэфедрин гидрохлориді, 1.00 мг хлорфенирамин малеаты
қосымша заттар: микрокристалды целлюлоза 101, микрокристалды целлюлоза 105, ұнтақ тәрізді целлюлоза, натрий кроскармелозасы, магний стеараты
Сипаттамасы
Дөңгелек пішінді, тегіс беткейлі, бір жағында сызығы және екінші жағында «SNIP» таңбасы бар, диаметрі 10.5 мм, ақ түсті таблеткалар.
Фармакотерапиялық тобы
Басқа да анальгетиктер - антипиретиктер. Анилидтер. Парацетамол басқа да препараттармен біріктірілімде.АТХ коды N02BE51
Фармакологиялық қасиеттері
Фармакокинетикасы
Парацетамол асқазан-ішек жолынан тез және толықтай дерлік сіңеді. Плазмадағы ең жоғарғы концентрациясына 10-60 минут ішінде жетеді. Снип таблеткаларын бір рет қабылдағаннан кейін плазмада парацетамолдың концентрациясы 6 сағаттан соң 2,1 мкг/мл жетеді;
Парацетамолдың 25%-ы қан плазмасы ақуыздарымен байланысады. Жартылай шығарылу кезеңі 1,5-3 сағатты құрайды, қабылданған дозаның 80-85% глюкуронды- немесе сульфо-ковалентті байланысқа ұшырайды. Парацетамолды қабылдағаннан кейін 24 сағат бойы парацетамол бос және ковалентті байланысқан түрде несеппен шығарылады.
Басқа да антигистаминді препараттар сияқты хлорфенирамин малеаты жылдам сіңеді, қабылдағаннан кейін қан плазмасындағы ең жоғары деңгейі 2 сағат ішінде байқалады, бауырда метаболизденеді және негізінен метаболиттер түрінде несеп арқылы, тек 3-18% өзгермеген түрде бөлінеді. Жартылай шығарылу кезеңі – 20 сағат, егде емделушілер мен балаларда, әдетте төмендейді.
Жалған эфедрин аздаған мөлшерде бауырда метаболизденеді. Жартылай шығарылу кезеңі 3-6 сағатты құрайды.
Бүйрек арқылы, негізінен өзгермеген түрде шығарылады.
Фармакодинамикасы
Снип – біріктірілген препарат, анальгетикалық, ыстық түсіретін және антигистаминдік әсер береді. Құрамында есірткілік емес анальгетик - парацетамол, антигистаминді дәрі - хлорфенирамин малеаты және ісінуге қарсы (деконгестивті) дәрі – жалған эфедрин гидрохлориді бар.
Жалған эфедрин тікелей және жанама симпатомиметикалық белсенділікке ие бола отырып, жоғарғы тыныс алу жолдарының ісінуін, эфедринге қарағанда елеулі аз дәрежеде түсіріп, тахикардияны және қан қысымы жоғарылауын туғызады.
Хлорфенирамин антигистаминдік дәрі бола отырып, асқазан-ішек жолдарын және тыныс алу жолдарын қоса тегіс бұлшықетіне гистаминнің әсерін бөгейді, қан тамырларының кеңеюін қайтарады, ісінудің азаюына әкеле отырып, қылтамырлар өткізгіштігін төмендетеді.
Парацетамол – анальгетик, антипиретик. Әсер ету механизмі гипоталамуста көбіне термореттегіш орталыққа әсер етуінің салдарынан простогландиндер синтезін тежеуге байланысты.
Қолданылуы
-
бас ауыруы, қызба, қалтырау, түшкіру, тұмау, мұрынның бітелуі және мұрынның қышынуы қатар жүретін тұмауға ұқсас жұқпаларда және суық тию аурулары кезінде; сондай-ақ аллергиялық риниттер мен полиноздарда симптоматикалық дәрі ретінде қолданылады.
Қолдану тәсілі және дозалары
Ішке қабылдау үшін
Ересектер:
Қажетінше әр 4-6 сағатта 1-2 таблеткадан, ең жоғары тәуліктік доза 8 таблеткадан аспауы тиіс.
Жасөспірімдер (12 жастан асқан):
Қажетінше әр 6 сағатта 1-2 таблеткадан, ең жоғары тәуліктік доза 6 таблеткадан аспауы тиіс.
Емдеу ұзақтығы 3-5 күн.
Жағымсыз әсерлері
Жиі (> 1/ 100, <1/10)
- жүрек айну
- құсу
- тәбеттің болмауы
Жиіден аздау (>1/1000, <1/100)
- аллергиялық реакциялар
- тері бөртпесі
- бас айналуы
Сирек (>1/10000, <1/1000)
- ауыздың және тыныс алу жолдарының құрғауы
- ұйқының бұзылуы
- ұйқышылдық
- гипотония
- диспепсия
Өте сирек (< 1/ 10000)
- ұзақ уақыт үлкен дозада қабылдағанда бүйрек және бауыр функциясының бұзылуы
Қолдануға болмайтын жағдайлар
- парацетамолға, хлорфенираминге, жалған эфедринге немесе препараттың кез келген басқа құрамдастарына аса жоғары сезімталдық
- артериялық гипертензияның ауыр түрі, жүректің ишемиялық ауруы
- моноаминоксидаза (МАО) тежегіштерін бір мезгілде немесе пайдалануды тоқтатқаннан кейінгі 2 апта ішіндегі кезеңде қолдану
- туа біткен глюкозо - 6 - фосфат дегидрогиназа тапшылығы
- алкоголизм
- бронх демікпесі
- құрамында парацетамол бар басқа препараттарды бір мезгілде қолдану
- жедел бауыр немесе бүйрек жеткіліксіздігі
- жүктілік және лактация кезеңі
- 12 жасқа дейінгі балалар
Дәрілермен өзара әрекеттесуі
Моноаминооксидаза тежегіштері, тыныштандыратын препараттар, этанолдың әсерін күшейтеді.
Антидепрессанттар, паркинсонға қасы дәрілер, психозға қарсы дәрілер, фенотиазин туындылары – несеп іркілісі, ауыздың құрғауы, іш қатулардың даму қаупін жоғарылатады. Глюкокортикостероидтар глаукоманың даму қаупін арттырады. Парацетамол диуретикалық препараттардың тиімділігін төмендетеді. Моноаминооксидаза тежегіштерімен, фуразолидонмен бір мезгілде хлорфенирамин гипертониялық кризге, қозуға, гиперпирексияға әкелуі мүмкін. Үшциклді антидепрессанттар фенилэфриннің адреномиметикалық әсерін күшейтеді, галотанды бір мезгілде тағайындау қарыншалық аритмияның даму қаупін арттырады. Гуанетидиннің гипотензивтік әсерін төмендетеді, ол өз кезегінде фенилэфриннің альфа-адреностимуляциялаушы белсенділігін күшейтеді.
Снипті барбитураттармен, дифенинмен, карбамазепинмен, рифампицин және бауыр микросомальді ферменттерінің басқа да индукторларымен бір мезгілде тағайындағанда парацетамол гепатоуытты әсерінің даму қаупі жоғарылайды.
Препаратты МАО тежегіштерімен бір мезгілде және МАО тежегіштерімен емдеуден кейінгі екі апта ішінде пайдалануға болмайды. Қатар қолдану ауыр гипертониялық кризге, бас ауырына, гипертермия мен ауыр жүрек аритмиясына әкелуі мүмкін. Симпатомиметиктер сияқты, псевдоэфедрин норадреналиннің босап шығуын тікелей әсер етпеу жолымен көтермелейді, бұл ретте МАО тежегіштері катехоламиндердің ыдырауын баса отырып, адренергиялық нейрондарда норадреналин мөлшерін арттырады. Бір мезгілде пайдалану норадреналиннің қол жетімді мөлшерін арттырады және симпатикалық жүйке жүйесінің белсенділігін күшейтеді.
Жалған эфедрин мен метилдопаны бір мезгілде қолдану артериялық қысымды реттеудің бұзылуына, кейін гипертониялық кризге әкелуі мүмкін.
Дигидроэрготамин және жалған эфедринді бір мезгілде қолдану артериялық қысымның айтарлықтай жоғарылауына әкелуі мүмкін. Псевдоэфедрин мен несеп сілтілендіргіш заттарды, (мысалы, натрий гидрокарбонаты) бір мезгілде қолдану псевдоэфедриннің шығарылуын едәуір баяулатады.
Айрықша нұсқаулар
Препаратты қолдану кезеңінде жеңіл немесе орташа ауырлықтағы бауыр немесе бүйрек жеткіліксіздігі бар емделушілер дәрігердің бақылауында болулары тиіс.
Снип жүрек аурулары, гипертензиясы, қалқанша без аурулары, қант диабеті немесе несеп шығарудың проблемалары бар науқастарда (қуық асты безінің ұлғаюына байланысты) қолданылмайды, сондай-ақ тыныштандыратын дәрілер, антидепрессанттар, психостимуляторлар, симпатомиметиктер қабылдайын емделушілерге тағайындалмайды.
Препаратты созылмалы жөтелде (қақырықпен), емделушіде ентігу және бронх демікпесі болғанда қолдануға болмайды.
Бауыр жеткіліксіздігі бар, алкогольді шамадан тыс қолданатын, сондай-ақ өзін тамақтанудан күрт шектейтін адамдардың қолдануы бауырдың зақымдану қаупін арттырады.
Снипті 5 күннен артық қолданбаған жөн.
Зертханалық тестілердің нәтижелеріне әсер етуіСнип спортшыларда допинг-тестілердің нәтижелеріне әсер етуі мүмкін.
Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері
Психомоторлық реакция жылдамдығына әсер етуі ықтимал ұйқышылдықтың даму мүмкіндігін ескере отырып, автокөлік құралдарын басқарғанда және қауіптілігі зор механизмдермен жұмыс істегенде сақ болу керек.
Артық дозалануы
Симптомдары: қалғу, енжарлық, бас айналу, атаксия, гипотония, тыныстың тарылуы, терінің және шырышты қабықтың құрғауы, тахикардия, тітіркенгіштік, конвульсия және несеп шығуының қиындауы
Емі: жасанды құстыру, препаратты қабылдағаннан кейін алғашқы 1-3 сағатта асқазанды шаю.
Шығарылу түрі және қаптамасы
10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынған. 2 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапшаға салынады.
Сақтау шарттары
Құрғақ, жарықтан қорғалған жерде, 25°C-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
5 жыл
Жарамдылық мерзімі өткеннен кейін препаратты қолдануға болмайды!
Дәріханалардан босатылу шарттары
Рецепт арқылы
Өндіруші
«Медокеми Лтд», КИПР
Constantinoupoleos Street, 3011, Limassol, Cyprus
tel.00352725867600, fax.0035725560863
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:
“Медокеми Лтд” өкілдігі
Алматы қ., Мұканов к-сі, 241 1Б кеңсе тел/факс: 313-73-76
E-mail : medochemie@mail.ru