Войти

Ай-Фос Ибандроновая кислота

Производитель: Маклеодс Фармасьютикалз Лимитед
Анатомо-терапевтическо-химическая классификация: Ibandronic acid
Номер регистрации: № РК-ЛС-5№022405
Дата регистрации: 05.10.2016 - 05.10.2021

Инструкция

Саудалық атауы

Ай-Фос

Халықаралық патенттелмеген атауы

Ибандрон қышқылы

Дәрілік түрі

Үлбірлі қабықпен қапталған 150 мг таблеткалар

Құрамы

Бір таблетканың құрамында

белсенді зат - 160.33 мг ибандронат натрий моногидраты

(150.00 мг) (ибандрон қышқылына баламалы),

қосымша заттар: лактоза моногидраты, кросповидон (А типі), повидон (PVP K-25), сусыз коллоидты кремнийдің қостотығы, микрокристалды целлюлоза (РН 101), микрокристалды целлюлоза (РН 102), магний стеараты, Instacoat White (A05G10010)**

** Instacoat White (A05G10010) құрамы пайызбен:, HP2910/гипромеллоза 6сРs – 65.0 %, полиэтиленгликоль 400 6.00 %, полиэтиленгликоль 6000 – 6.00 %, тальк – 5.00 %, титанның қостотығы (Е171) – 18.00 %.

Сипаттамасы

Ақ немесе ақ дерлік түсті, үлбірлі қабықпен қапталған, сопақша пішінді, екі жақ беті дөңес, бір жақ бетінде «L 71» өрнегі бар және басқа жақ беті тегіс таблеткалар.

Фармакотерапиялық тобы

Сүйек ауруларын емдеуге арналған препараттар. Сүйектің құрылымына және минералдануына ықпалын тигізетін препараттар. Бисфосфонаттар. Ибандрон қышқылы

АТХ коды М05ВА06

Фармакологиялық қасиеттері

Фармакокинетикасы

Ибандрон қышқылы тиімділігінің қан плазмасындағы заттың концентрацияларына тікелей байланыстылығы анықталған жоқ.

Сіңірілуі

Пероральді қабылдаудан кейін ибандрон қышқылы асқазан-ішек жолының жоғарғы бөлімдерінде тез сіңеді. Қан плазмасындағы концентрациясы дозаны 50 мг-ге дейін арттырған кезде дозаға байланысты жоғарылайды және дозаны әрі қарай арттырғанда ол едәуір көбірекке жоғарылайды. Ашқарынға қабылдағаннан кейін 0,5–2 сағ. соң (медиана – 1 сағ.) ең жоғары концентрацияға жетеді, абсолюттік биожетімділігі – 0,6%. Тамақты және сусындарды (жай судан басқа) бір мезгілде қабылдау ибандрон қышқылының биожетімділігін 90%-ға төмендетеді. Ибандрон қышқылын тамақтан 60 мин бұрын қабылдағанда биожетімділігінің маңызды төмендеуі байқалмайды. Ибандрон қышқылын қабылдағаннан кейін 60 минутқа жетпей тамақ немесе сұйықтық ішу оның биожетімділігін және сүйектің минералды тығыздығының (СМТ) артуын төмендетеді.

Таралуы

Жүйелік қан ағынына түскеннен кейін ибандрон қышқылы сүйек тінінде тез байланысады немесе несеппен бірге шығарылады. Қан айналымындағы препарат мөлшерінің шамамен 40–50%-ы сүйек тініне жақсы өтеді және сонда жиналады. Таралуының болжамды ақырғы көлемі – 90 л. Қан плазмасы ақуыздарымен байланысуы – 85%.

Метаболизмі

Ибандрон қышқылының метаболизмі жөнінде деректер жоқ.

Шығарылуы

Ибандрон қышқылының сіңірілген фракциясы айналымдағы арнадан сүйектік сіңірілу арқылы (менопаузадан кейінгі әйелдердің шамамен 40-50%-да), ал қалған бөлігі өзгермеген күйінде бүйрек арқылы шығарылады. Қанға түспеген препарат бөлігі өзгермеген күйінде нәжіспен бірге шығарылады.

Дені сау әйелдерде менопаузадан кейін пероральді түрде енгізгенде Ибандрон қышқылының 150 мг таблеткаларының байқалған ақырғы жартылай шығарылу кезеңі 37-ден 157 сағатқа дейінді құрайды. Вена ішіне енгізуден және пероральді қабылдаудан кейін, сәйкесінше, 3 және 8 сағаттан соң препараттың қандағы концентрациясы тез төмендейді және ең жоғары мөлшердің 10%-ын құрайды.

Ибандрон қышқылының жалпы клиренсі төмен болады және 84–160 мл/мин құрайды. Бүйректік клиренсі (менопаузадан кейін дені сау әйелдерде шамамен 60 мл/мин) жалпы клиренстің 50–60%-ын құрайды және креатинин клиренсімен байланысты. Болжамды жалпы және бүйректік клиренсі арасындағы айырмашылық сүйек тінінің заттарды сіңіруінен білінеді.

Пациенттердің ерекше топтарындағы фармакокинетикасы

Жынысы

Ибандрон қышқылының фармакокинетикасы жынысқа байланысты емес.

Нәсілі

Еуропалық және азиаттық нәсілдердің өкілдерінде ибадрон қышқылының таралуында клиникалық тұрғыдан маңызды нәсіларалық айырмашылықтар байқалған жоқ. Африкалық нәсілге қатысты деректер жеткіліксіз.

Бүйрек функциясының жеткіліксіздігі бар пациенттер

Бүйрек функциясының жеткіліксіздігі бар пациенттерде ибандрон қышқылының бүйректік клиренсі дозаға байланысты креатинин клиренсіне (КК) тәуелді болады. Бүйрек функциясының ауырлығы жеңіл немесе орташа жеткіліксіздігі бар (КК ≥30 мл/мин) пациенттер үшін дозаны түзету қажет емес. 21 күн бойы препаратты 10 мг дозада пероральді түрде қабылдаған, бүйрек функциясының бұзылуы ауыр (КК <30 мл/мин) науқастарда қан плазмасындағы ибадрон қышқылының концентрациясы бүйрек функциясы қалыпты адамдардағыдан 2–3 есе жоғары. Бүйрек функциясының ауыр бұзылуында ибадрон қышқылының жалпы клиренсі минутына 44 мл-ге дейін төмендейді. Алайда жүйелік концентрацияларының артуы препараттың жағымдылығын нашарлатпайды.

Бауыр функциясының жеткіліксіздігі бар пациенттер

Бауыр функциясы бұзылған науқастарда ибадрон қышқылының фармакокинетикасы жөнінде деректер жоқ. Метаболизденбейтін, бірақ бүйрек арқылы және сүйек тініне сіңу жолымен шығарылатын ибадрон қышқылының клиренсінде бауыр елеулі рөл атқармайды. Сондықтан бауыр функциясы бұзылған науқастарда дозаны түзету қажет емес.

Егде жастағы пациенттер

Зерттелген фармакокинетикалық параметрлер жасқа байланысты емес. Егде жастағы пациенттерде бүйрек функциясының ықтимал төмендеуін ескерген жөн (жоғарыдағы «Бүйрек функциясының жеткіліксіздігі бар пациенттер» бөлімін қараңыз).

Педиатриялық популяция

Ай-Фосты 18 жасқа толмаған адамдарда қолдану жөнінде деректер жоқ.

Фармакодинамикасы

Әсер ету механизмі

Ай-Фос – остеокластардың белсенділігін олардың мөлшеріне спецификалық тұрғыдан ықпалын тигізбей тежейтін, құрамында жоғары белсенді азоты бар бисфосфонат.

Ибандрон қышқылы сүйек тінінің резорбциясын төмендетеді, бірақ сүйектердің түзілуіне тікелей ықпалын тигізбейді. Әйелдерде менопаузададан кейін ол сүйек тінінің деструкциялану жылдамдығын ұрпақ өрбіту жасындағы деңгейге дейін төмендетеді, ол сүйек тіні салмағының үдеп артуына әкеледі. Жануарларға жүргізілген экспериментальді үлгілерде бұл қан плазмасында да, сонымен қатар несепте де сүйек резорбциясының биохимиялық маркерлері деңгейінің (деоксипиридинолиннің және І типті коллагенді айқаспалы құрастырылған C- және N-телопептидтердің) төмендеуімен, сүйектің минералды тығыздығының (СМТ) жоғарылауымен және сыну жиілігінің төмендеуімен айғақталады.

Сүйектің минералды тығыздығы (СМТ)

Жыл бойы айына 1 рет 150 мг Ай-Фос препаратын қабылдау бел омыртқаларының, санның, ортан жілік мойнының және ұршықтың орташа СМТ 4,9%-ға, 3,1%-ға, 2,2%-ға және 4,6%-ға арттырады. Менопаузаның ұзақтығына және сүйек массасының бастапқы жоғалу дәрежесіне қарамай-ақ, Ай-Фос препаратын қолдану СМТ-тің сенімді түрде өте айқын өзгеруіне әкеледі. Жыл бойы бел омыртқаларының СМТ артуы пациенттердің 84.0%-да байқалады.

Сүйек резорбциясының биохимиялық маркерлері

C-соңғы пептидтің сарысулық концентрациясының клиникалық тұрғыдан маңызды төмендеуі 3, 6, 12 және 24 ай емдеуден кейін алынды. 150 мг Ай-Фос препаратымен бір жыл емдегеннен кейін орташа салыстырмалы өзгеруі бастапқы деңгеймен салыстырғанда 76% құрады. 30 күнде 1 рет 150 мг Ай-Фос препаратын қабылдаған пациенттердің 83.5%-да C-терминальді телопептидтің, бастапқы мәнмен салыстырғанда, 50%-дан астамға төмендегені байқалды.

Қолданылуы

Сынуларға жол бермеу мақсатында әйелдердегі менопаузадан кейінгі остеопорозды емдеуде.

Қолдану тәсілі және дозалары

Ішке, айына бір рет (мүмкіндігінше әрбір айдың белгілі бір күнінде) 150 мг (1 таблетка), сол күні бірінші тамақты, сұйықтықты (судан басқасы) немесе басқа дәрілік заттарды және тағамдық қоспаларды қабылдаудан 60 мин бұрын. Ай-Фос таблеткаларын отырған немесе түрегеліп тұрған қалыпта бір стакан таза сумен (180–240 мл) ішіп тұтастай жұтқан жөн және қабылдағаннан кейін 60 мин бойы жатпау керек. Таблетканы асқазан-ішек жолының жоғарғы бөлімдерінің жаралануы мүмкін болғандықтан, шайнауға немесе соруға болмайды. Құрамында кальцийі көп минералды суды пайдалануға болмайды. Егер тамақпен бірге пайдалану жеткіліксіз болса, қосымша кальций және/немесе дәрумен қабылдаған жөн.

Жоспарлы қабылдауды өткізіп алған жағдайда, егер жоспарлы қабылдауға дейін 7 күннен астам күн болса, 150 мг Ай-Фос препаратының бір таблеткасын қабылдаған жөн, және әрі қарай Ай-Фос препаратын белгіленген графикке сәйкес айына 1 рет қабылдау керек. Егер келесі жоспарлы қабылдауға дейін 7 күннен аз қалса, жоспар бойынша келесі қабылдауды күту, және әрі қарай қабылдауды белгіленген график бойынша жалғастыру керек. Ай-Фос препаратын аптасына 1 таблеткадан артық қабылдауға болмайды.

Креатинин клиренсі <30 мл/мин болған кезде Ай-Фосты қолдану жөніндегі шешім нақты пациент үшін қаупі-пайдасы арақатынасына жекелей берілген бағасына негізделуі тиіс.

<18 жастағы адамдардағы қауіпсіздігі және тиімділігі анықталған жоқ.

Жағымсыз әсерлері

жиі (≥1/100-ден <1/10 дейін)

  • бас ауыру

  • эзофагит, гастрит, гастро-эзофагеальді рефлюкс, диспепсия, жүректің айнуы, іштің ауыруы, диарея

  • тері бөртпесі

  • бөртпе

  • артралгия, миалгия, қаңқа-бұлшық еттің ауыруы, бұлшық еттің түйілуі, қаңқа-бұлшық еттің сіресуі

  • тұмауға ұқсас синдром

жиі емес (≥1/1000-нан <1/100 дейін)

  • бас айналу

  • дисфагия, құсу, эзофагит, өңештің жара болуы, өңештің ойық жарасы немесе стриктурасы, құсу, метеоризм

  • белдің ауыруы

  • шаршау

  • демікпенің өршуі

сирек (≥1/10000-нан <1/1000 дейін)

  • жоғары сезімталдық

  • көздің қабынуы (увеит, эписклерит және склерит)

  • дуоденит

  • ангионевроздық ісіну, беттің ісінуі, есекжем

  • ортан жіліктің атипиялық ұршықасты және диафизарлы сынулары

өте сирек (≥1/100000-нан <1/10000 дейін)

- жақ сүйегінің остеонекрозы, сыртқы есту жолының остеонекрозы

- анафилаксиялық реакциялар (анафилаксиялық шок) - Стивенс-Джонсон синдромы, мультиформалы эритема

Қолдануға болмайтын жағдайлар

- ибандрон қышқылына немесе препараттың басқа компоненттеріне жоғары сезімталдық

- гипокальциемия

- тағамның пассажы бұзылатын өңеш аурулары (өңештің стриктурасы, ахалазия)

- жүктілік және лактация кезеңі

- таблетканың қабылдағаннан кейін 60 минут бойы пациенттің тігінен түрегеліп тұра немесе отыра алмауы

Сақтықпен

бүйрек функциясының ауыр бұзылуы (креатинин клиренсі <30 мл/мин).

Дәрілермен өзара әрекеттесуі

Құрамында кальций бар тағамдар, соның ішінде сүт және қатты тағам, тағамдық қоспалар, антацидтер және құрамында кальций және басқа да поливалентті катиондары (мысалы, алюминий, магний, темір) бар дәрілер препараттың сіңуін бұзуы мүмкін. Сондықтан пациенттер ибандрон қышқылын қабылдаудан кем дегенде 6 сағатқа тең кезең ішінде және Ай-Фосты қабылдағаннан кейін 1 сағат ішінде басқа пероральді дәрілік препараттарды қабылдамауы керек.

Биcфосфонаттар, ацетилсалицил қышқылы және қабынуға қарсы стероидты емес препараттар (ҚҚСП) асқазан-ішек жолының (АІЖ) шырышты қабығының тітіркенуін туындатуы мүмкін. ҚҚСП-ды Ай-Фос препаратымен бір мезгілде қолданғанда аса сақтық танытқан жөн.

Ранитидинді в/і енгізу ибандрон қышқылының биожетімділігін 20%-ға арттырады.

Н2-гистаминдік рецепторлар блокаторларымен немесе асқазанда рН-ты арттыратын басқа препараттармен бір мезгілде қолданған кезде ибандрон қышқылының дозасын түзету қажет емес.

Ибандрон қышқылы Р450 цитохромының негізгі изоферменттерінің белсенділігіне ықпалын тигізбейді.

Тамоксифенмен немесе гормонның орнын басатын еммен (эстроген) өзара әрекеттесуі үшін қандай да болсын потенциал жоқ.

Көптеген миеломасы бар пациенттерде мелфаланмен/преднизолонмен бір мезгілде енгізген кезде өзара әрекеттесу байқалған жоқ.

Емдік концентрацияларда ибандрон қышқылы қан плазмасы ақуыздарымен әлсіз байланысады, сондықтан оның ақуыздармен байланысқан жерінен басқа дәрілік заттарды ығыстырып шығаруы екіталай. Ибандрон қышқылы тек бүйрек арқылы шығарылады және қандай да болсын биотрансформацияға ұшырамайды. Ибандрон қышқылын енгізу жолына басқа препараттарды шығаруға қатысатын қандай да болсын тасымалдау жүйесі енбейді.

Айрықша нұсқаулар

Гипокальцемия

Ай-Фос препаратын қолдануды бастағанға дейін гипокальциемияны және сүйек кемігі метаболизмінің және минералды заттардың алмасуының басқа да бұзылуларын түзеткен жөн. Пациенттер кальцийді және Д дәруменін жеткілікті мөлшерде пайдалануы керек.

Асқазан-ішек жолы тарапынан бұзылулар

Пероральді түрде енгізілетін бисфосфонаттар АІЖ жоғарғы бөлімдерінің шырышты қабықтарының жергілікті тітіркенуін туындатуы мүмкін. Осы ықтимал тітіркендіретін әсерлерімен және негізгі аурудың нашарлау потенциалымен байланысты, АІЖ жоғарғы бөлімдерінің бұзылулары (мысалы, белгілі Баррет синдромы, дисфагия, өңештің басқа да аурулары, гастрит, дуоденит немесе ойық жаралар) бар пациенттерге ибандрон қышқылын тағайындаған кезде сақтық танытқан жөн.

Ықтимал тітіркендіретін әсерлерімен және негізгі аурудың нашарлау қаупімен байланысты, АІЖ жоғарғы бөлімдерінің бұзылулары (мысалы, белгілі Баррет синдромы, дисфагия, өңештің басқа да аурулары, гастрит, дуоденит немесе ойық жаралар) бар пациенттерге ибандрон қышқылын тағайындаған кезде сақтық танытқан жөн. Ай-Фосты тағайындаған кезде осы аталған ауруларға көңіл бөлінуі тиіс.

Емдеуші дәрігер өңештің зақымдану симптомдарын анықтау тұрғысынан пациентті тексеруі тиіс. Өз кезегінде пациенттер жұтыну бұзылулары, одинофагия (тамақ өңеш арқылы өткен кезде ауыру сезімі), жұтқан кезде болатын ауыру, көкірек артының ауыруы, қыжыл пайда болған немесе күшейген кезде Ай-Фос қабылдауды тоқтатуы және дәрігерге қаралуы тиіс.

Өңеш тарапынан ауыр жағымсыз әсерлердің көрініс беру қаупі дәріні дозалау жөніндегі нұсқауларды орындамаған немесе тіпті өңештің тітіркену симптомдары пайда болғаннан кейін де бисфосфонаттарды пероральді түрде қабылдауды жалғастырған пациенттерде ұлғаяды.

Пациенттер дозалау жөніндегі нұсқауларға және оларды сақтауға аса көңіл аударуы тиіс. Ай-Фостың алғашқы дозасын вена ішіне енгізген кезде дамуы мүмкін, ауырлығы жеңіл немесе орташа тұмауға ұқсас өткінші синдром әдетте ұзаққа созылмайды және, медициналық араласымды қажет етпей, емдеу кезінде қайтады. АІЖ аурулары (қан кетусіз пептидтік ойық жараларды және ауруханаға жатқызуды, диспепсияны немесе рефлюкс ауруын қоса) бар пациенттерде АІЖ жоғарғы бөлімдері тарапынан жағымсыз әсерлер жиілігінің жоғарылауы байқалған жоқ.

Жақ сүйегінің остеонекрозы

Жақ сүйегінің остеонекрозы (ЖОН) көптеген жағдайларда стоматологиялық емшаралар қабылдаған, қатерлі жаңа түзілімдері бар науқастарда дамыды, бірақ кейде менопаузадан кейінгі остеопорозға немесе басқа ауруларға байланысты ем қабылдаған пациенттерде кездесті. Қатерлі жаңа түзілімдер, сәйкес келетін емдеу әдістері (сәулемен терапия, радиотерапия, кортикостероидтар), қатар жүретін аурулар (анемия, коагулопатия, инфекциялар, темекі тарту, бұрыннан бар стоматологиялық аурулар, ауыз қуысының жеткіліксіз гигиенасы) ЖОН-ның қауіп факторлары деп саналады. Қауіп факторлары бар пациенттер бисфосфонаттармен емдеуді бастағанға дейін стоматологтың тексерілуінен өтуі және қажетті емшаралар жүргізуі тиіс. Бисфосфонаттармен емделу барысында мұндай пациенттер инвазиялық стоматологиялық емшараларға жол бермегені жөн. Егер жақ сүйегінің остеонекрозы бисфосфонаттармен емдеу аясында дамыса, жақ сүйегіне хирургиялық араласым жүргізу жағдайды өршітуі мүмкін.

Стоматологиялық емшараларды керек ететін пациенттерде бисфосфонаттарды тоқтатудың ЖОН қаупін төмендететіні жөнінде деректер жоқ. Өз кезегінде, стоматологиялық операция бисфосфонаттарды қабылдау аясында дамыған ЖОН-ды өршітуі мүмкін. Сондықтан бисфосфонаттарды қабылдауды жалғастыру немесе тоқтату жөніндегі клиникалық шешім қаупі мен пайдасына баға бергеннен кейін жекелей қабылданады.

Ортан жіліктің атипиялық сынулары. Бисфосфонаттармен емдеу кезінде негізінен остеопорозды ұзақ емдеген пациенттерде атипиялық ұршықасты және диафизарлы сынулар жөнінде мәлімделді. Бұл көлденең немесе қысқа қиғаш сынулар ортан жіліктің кіші ұршық астынан айдаршық үсті дөңесі аймағына дейінгі кез келген жерінде болуы мүмкін. Бұл сынулар аздаған жарақаттардан кейін немесе мұндай жоқ болған кезде де болуы мүмкін, ал кейбір пациенттер сан немесе шап аймағының ауыруын бастан кешеді, олар көбіне көзге көрінетін кернеп сыну ерекшеліктерімен қабаттасады, және ол санның толық сынуы пайда болмас бұрын апта-айлар бойы жалғасады. Сынулар көбіне билатеральді болады; осылайша, санның ұзаққа созылған диафизарлы сынығына бисфосфонаттармен ем қабылдап жүрген пациенттерде контралатеральді санды тексеру қажет. Мұндай сынулардың нашар емделінетіні мәлімделді. Санның атипиялық сынуына күмәнді пациенттерде, пайда/қаупі арақатынасына жекелей берілген бағаға негіздей отырып, бисфосфонаттармен емдеуді үзу жөніндегі мәселені де қарастырған жөн.

Бисфосфонаттармен емдеу кезінде санында, жамбас-ортан жілік буынында немесе шабында пайда болған кез келген ауыруды пациенттердің мәлімдеп отыруына кеңес беріледі, және осындай симптомдары бар әрбір пациентте санның толық сынбағанына күмән болуы тиіс.

Сыртқы есту жолының остеонекрозы

Ұзақ емдеу кезінде сыртқы есту жолының остеонекрозы жағдайлары жөнінде мәлімделді. Сыртқы есту жолының остеонекрозы қаупінің ықтимал факторлары стероидтарды, химиотерапияны қолдану және/немесе инфекциялар немесе жарақаттар сияқты жергілікті қауіп факторлары болып табылады.

Бүйрек функциясының жеткіліксіздігі

Ай-Фос препаратын клиникалық пайдалану тәжірибесі шектеулі болғандықтан, креатинин клиренсі минутына 30 мл-ден аз болатын пациенттерге ұсынылмайды.

Егде жастағы және бауыр функциясының жеткіліксіздігі бар пациенттерде дозаны реттеу қажет емес.

Препараттың құрамында лактоза бар. Сирек тұқым қуалайтын галактоза жақпаушылығы, Лаппа лактаза тапшылығы немесе глюкоза-галактоза мальабсорбциясы бар пациенттер бұл дәрілік препаратты қабылдамағаны жөн.

Препарат менопаузадан кейінгі әйелдерге ғана арналған және ұрпақ өрбіту жасындағы әйелдерге қолданылмауы тиіс. Адам үшін потенциалды қаупі белгісіз.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Ай-Фос препаратының автомобильді басқару қабілетіне немесе потенциалды қауіпті механизмдермен жұмыс жасауға ықпалы жөнінде деректер жоқ.

Артық дозалануы

Ықтимал симптомдары: асқазан бұзылысы, диспепсия, эзофагит, гастрит, ойық жара, гипокальциемия.

Емі: арнайы ақпарат жоқ. Ай-Фос препаратының байланысуы үшін сүтті немесе антацидтерді қолданады. Өңешті тітіркендіретін болғандықтан, құстырмаған жөн және түрегеліп тік тұруы қажет.

Шығарылу түрі және қаптамасы

ПВХ/ПВДХ үлбірден және алюминий фольгадан жасалған пішінді ұяшықты қаптамада 2 таблеткадан.

Пішінді ұяшықты 1 қаптамадан медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Жарықтан қорғалған жерде, 30ºC-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші ұйымның атауы және елі

Macleods Pharmaceuticals Limited

304, Atlanta Arcade, Marol Church Road, Andheri (East), Mumbai – 400 059, India.

Тіркеу куәлігінің ұстаушысы

Macleods Pharmaceuticals Limited, Үндістан

Қаптаушы ұйымның атауы және елі

Macleods Pharmaceuticals Limited, Үндістан

Тұтынушылардан өнім сапасы жөніндегі шағымдарды Қазақстан Республикасы аумағында қабылдайтын және тіркеуден кейін дәрілік заттың қауіпсіздігін бақылауға жауапты ұйымның мекенжайы

«Macleods Pharmaceuticals Limited» ЖШК филиалы, Қазақстан Республикасы

Алматы қ., Төлебаев к-сі 38/61, 5 қабат

Тел./факс. +7 727 2734593

E-mail: danielt@macleodspharma.com.

Прикрепленные файлы

621377651477975728_ru.doc 89 кб
376737971477977439_kz.doc 113.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники