Цефим
Инструкция
-
русский
-
қазақша
Саудалық атауы
Цефим
Халықаралық патенттелмеген атауы
Цефиксим
Дәрілік түрі
Үлбірлі қабықпен қапталған 200 мг таблеткалар
Құрамы
Бір таблетканың құрамында
белсенді зат - 223,84мг цефиксим тригидраты (200,00 мг цефиксимге баламалы)
қосымша заттар: лактоза моногидраты, микрокристалды целлюлоза, натрий кроскармеллозасы, сусыз коллоидты кремнийдің қостотығы, магний стеараты.
Үлбірлі қабықтың құрамы Опадри ақ OY-B-28920: поливинил спирті, титанның қостотығы (Е171), тазартылған тальк, лецитин, ксантан шайыры (Е 415).
Сипаттамасы
Капсула тәріздес пішінді, екі беті дөңес, бір жақ бетінде сызығы бар ақ түсті үлбірлі қабықпен қапталған таблеткалар.
Фармакотерапиялық тобы
Бета-лактамды бактерияларға қарсы басқа да препараттар. Үшінші буын цефалоспориндері. Цефиксим.
АТХ коды JO1 DD08
Фармакологиялық қасиеттері
Фармакокинетикасы
Ішке қабылдағаннан кейін цефиксим баяу сіңеді, қан сарысуындағы ең жоғары деңгейіне қабылдаудан кейін 2-6 сағат өткенде жетеді. 200 мг немесе 400 мг бір реттік дозаны қабылдаған кезде препараттың сарысудағы концентрациясы тиісінше 1-4мг\мл-ге немесе 1,9-7,7мг\мл-ге жетеді. Биожетімділігі 40% - 50% құрайды, тамақтану сіңуіне әсер етпейді. Цефиксим таралу көлемі 0,6 - 1,1л/кг бола отырып, плазма ақуыздарымен 50% - 65% байланысады.
Гемато-энцефалдық бөгеттен нашар өтеді, плацента арқылы өтеді, емшек сүтімен бөлініп шығады.
Дозаның шамамен 50% несеппен, 5% өтпен шығарылады. Жартылай шығарылу кезеңі 3-4 сағатты құрайды, орташа бүйрек жеткіліксіздігі жағдайында бұл кезең шамамен 6 сағатқа дейін, елеулі бүйрек жеткіліксіздігінде 11 сағатқа дейін ұзарады.
Фармакодинамикасы
Үшінші буынның әсер ету ауқымы кең цефалоспориндік антибиотигі, бактерицидті әсер етеді.
Аэробтық және анаэробтық грамоң және грамтеріс патогендік флораларға әсер етеді. Цефиксимнің бактерицидтік әсері бактериялар жасушалық қабырғаларының синтезін тежеуге негізделген.
Цефимнің бета-лактамазалар әсеріне төзімділігі жоғары.
Мына микроорганизмдерге қатысты белсенділігі жоғары болады:
Streptococcus pneumoniae, Streptococcus pyogenes, Escherichia coli, Salmonella spp., Shigella spp., Proteus mirabilis, Klebsiella species, Haemophilus influenzae, Branhamella catarrhalis, Enterobacter species, Nesseria gonorrheae.
Цефиксимге төзімді: Bacteroides fragilis, Listeria monocytogenes, Clostridia, Enterobacter.
Қолданылуы
Цефимді препаратқа сезімтал микроорганизмдер туғызған ауруларды емдеу үшін тағайындайды:
-
ЛОР-мүшелерінің жұқпаларында (синуситте, фарингитте, тонзиллитте, ортаңғы отитте)
-
тыныс жолдары төменгі бөліктерінің жұқпаларында (жедел және созылмалы бронхитте, пневмонияда)
-
несеп шығару жолдарының жұқпаларында (пиелонефритте, циститте, уретритте, сальпингитте, оофоритте, эндометритте, вагинитте, септикалық түсікте, созда)
-
операциядан кейінгі жұқпаларда
Қолдану тәсілі мен дозалары
Ішке қабылдауға арналған. Таблеткаларды тамақтан кейін қабылдайды.
Емдеу курсы 7 күнді құрайды. Елеулі немесе емдеуге иілігуі қиын жұқпалар жағдайында, емдеу курсы 14 күнге дейін.
Алты айдан он жасқа дейінгі балаларға, дене салмағы 30-50 кг кезінде - күн сайын 200 мг.
Дене салмағы 30 кг-ден аз балаларға - тәулігіне 3-9 мг/кг.
Ең жоғары дозасы 12мг/кг құрайды; орташа дозасы 8мг/кг құрайды.
Ересектер мен он жастан асқан балаларға:
Көптеген жұқпаларды емдеу үшін ұсынылатын доза жұқпаның күрделілігіне байланысты 2 рет бөліп қабылданатын күніне 200 мг немесе 400 мг құрайды.
Қабылдау жиілігі ересектерге – 2 рет, балаларға тәулігіне 2-3 рет.
Асқынбаған цервикальдік және уретралық соз
Ұсынылатын күнделікті доза 400 мг немесе 800 мг құрайды.
Бауыр жеткіліксіздігі
Бауыр жеткіліксіздігі кезінде дозаны түзетудің қажеті жоқ.
Бүйрек жеткіліксіздігі
Креатинин клиренсі минутына 20 мл асқан кезде - әдеттегі доза мен қабылдаулар аралығы тағайындалады.
Креатинин клиренсі минутына 20 мл-ден аз кезінде: тәулігіне бір рет қабылданатын 200 мг дозаны арттыраудың қажеті жоқ.
Емдеу курсының орташа ұзақтығы 7-10 күн
Жағымсыз әсерлері
Жиі (≥1/100-ден <1/10-ға дейін)
-
диарея
Жиі емес (≥1/1 000-нан <1/100-ге дейін)
-
бас ауыруы
-
іштің ауыруы, ас қорытудың бұзылуы, жүрек айнуы, құсу, іш қатуы
-
эритема, бөртпе
-
қан плазмасындағы бауыр ферменттерінің қайтымды жоғарылауы (трансаминаза, сілтілік фосфатаза)
Сирек (≥1/10 000-нан <1/1 000-ға дейін)
-
бас айналуы, құлақтағы шуыл
-
тәбеттің жоғалуы және метеоризм
-
эозинофилия; қан сарысуындағы мочевинаның жоғарылауы
-
қышыну және шырыштың қабынуы
-
бактерияларға немесе зеңдерге төзімді асқынжұқпа (ұзақ уақыт бойы немесе көп рет қолданған кезде)
-
ауырлығы әртүрлі дәрежедегі жоғары сезімталдық реакциясы, анафилактикалық шок, дәрілік қызба
Өте сирек (<1/10 000)
-
лейкопения, агранулоцитоз, панцитопения немесе тромбоцитопения, қан ұюының бұзылуы, қан сарысуындағы креатининнің жоғарылауы, гипербилирубинемия
-
транзиторлы жоғары белсенділік, құрысу дамуы мүмкін
- тоқ ішектің антибиотикпен астасып қабынуы (мысалы, жалған жарғақшалы колит, дисбактериоз)
- мультиформалы эритема, Лайелл синдромы, қан сарысуына ұқсас реакциялар, Стивенс-Джонсон синдромы, Квинке ісінуі, беттің ісінуі, уытты эпидермальді некролиз
-
гемолитикалық анемия, апластикалық анемия
-
интерстициальді нефрит, бүйрек қызметінің бұзылуы
-
гепатит, холестатикалық сарғаю
-
генитальді кандидоз, генитальді қышыну, вагинит
-
гиповитаминоз В
-
ентігу
Қолдануға болмайтын жағдайлар
-
цефалоспориндер тобының бактерияға қарсы препараттарына немесе препараттың кезкелген басқа компоненттеріне жоғары сезімталдық
-
сыртартқысында қан кетудің болуы
-
жүктілік және лактация кезеңі
-
6 жасқа дейінгі балалар
-
фруктозаны туа біткен көтере алмаушылық немесе глюкоза-галактоза мальабсорбциясы
-
құсумен және диареямен қатар жүретін асқазан-ішек жолының ауыр аурулары
Дәрілермен өзара әрекеттесуі
Цефимді және аминогликозидті бір мезгілде қабылдау нефроуыттылықты туғызуы мүмкін.
Цефимді және антикоагулянттарды бір мезгілде қабылдау соңғысының әсерін күшейтіп, протромбиндік индексті төмендетеді.
Сүзекке қарсы тірі вакцина цефимнің соңғы дозасын қабылдаудан кейін кемінде 24 сағат өткенде қолданылуы мүмкін, өйткені цефим Salmonella typhi-ге микробтарға қарсы әсер етеді.
Құрамында магний немесе алюминий гидроксиді бар антацидтік препараттар цефиксимнің сіңуін баяулатады.
Айрықша нұсқаулар
Бүйрек жеткіліксіздігі бар емделушілерге препаратты абайлап тағайындау керек: креатинин клиренсі < 20 мл/мин кезінде препараттың дозасын азайту керек (“Қолдану тәсілі және дозасы” бөлімін қара.)
Пенициллинмен айқаспалы аллергиялық реакциялардың пайда болу мүмкіндігімен байланысты, емделушінің сыртартқысын мұқият бағалау ұсынылады. Аллергиялық реакция пайда болған кезде препаратты қолдануды дереу тоқтату керек.
Препаратты ұзақ уақыт бойы қолданған кезде ішектің қалыпты микрофлорасы бұзылуы мүмкін, ол Clostridium difficile шамадан тыс көбеюіне және жалған жарғақшалы колиттің дамуына әкелуі мүмкін. Антибиотикпен астасқан диареяның жеңіл түрі пайда болған кезде, әдетте, препаратты қабылдауды тоқтату жеткілікті. Емдеу кезінде Кумбстың оң реакциясы және глюкозаға несептің жалған-оң реакциясы болуы мүмкін.
Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Препараттың жағымсыз әсерлерін ескере отырып, көлікті жүргізу және жоғары назар жұмылдыруды және психомоторлық реакциялар жылдамдығын талап ететін басқа қауіпті қызмет түрлерімен айналысу кезінде абай болу керек.
Артық дозалануы
Артық дозалау жағдайлары туралы ешқандай хабарлар жоқ.
Емдеу симптоматикалық және организмнің өмірлік маңызды қызметтерін демеп тұратындай болуға тиіс. Асқазанды шаю әсер етуші шара болуы ықтимал.
Диализдің тиімділігі аз. Арнайы у қайтарғысы жоқ.
Шығарылу түрі мен қаптамасы
Поливинилхлоридті үлбірден және алюминий фольгадан жасалған пішінді ұяшықты қаптамаға 4 таблеткадан салынған.
2 пішінді қаптамадан мемлекеттік және орыс тілдеріндегі медицинада қолданылуы жөніндегі нұсқаулықпен бірге картоннан жасалған пәшкеге салынған.
Сақтау шарттары
Құрғақ, жарықтан қорғалған жерде, 25ºС-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Препаратты жарамдылық мерзімі өткеннен кейін қолдануға болмайды.
Дәріханалардан босатылу шартары
Рецепт арқылы
Өндіруші
“Медокеми Лтд”, КИПР
51409 СҮ-3505 Limassol
tel.357-25-867600, fax.357-25-560863,
Тұтынушылардан өнімнің (тауардың) сапасы жөнінде шағымдарды Қазақстан Республикасы аумағында қабылдайтын ұйымның мекенжайы
Қазақстан Республикасындағы “Медокеми ЛТД” өкілдігі
050008, Алматы қ-сы, Мұқанов к-сі, 241, 1 “Б” кеңсе
телефон/факс 8(727) 313-73-76