Цифран ОД
Инструкция
-
русский
-
қазақша
Саудалық атауы
Цифран ОД
Халықаралық патенттелмеген атауы
Ципрофлоксацин
Дәрілік түрі
Босап шығуы ұзартылған, үлбірлі қабықпен қапталған таблеткалар
Құрамы
Бір таблетканың құрамында
белсенді зат – 1000 мг ципрофлоксацин
қосымша заттар:
интрагранулят: натрий алгинаты, гипромеллоза, натрий бикарбонаты, кросповидон, магний стеараты;
экстрагранулят: магний стеараты, тазартылған тальк, кремнийдің сусыз коллоидты қостотығы;
қабығы: опадрай 31В58910 ақ (гипромеллоза, лактоза моногидраты, титанның қостотығы (Е171), макрогол 400), гипромеллоза, тазартылған тальк;
Opacode S-1-17823 (Black) сиясы: жылтыр шеллак, изопропил спирті, темірдің (III) қара тотығы (Е172), бутил спирті, пропиленгликоль, 28% аммиак ерітіндісі.
Сипаттамасы
Сопақша пішінді, ақтан ақ дерлік түске дейінгі үлбірлі қабықпен қапталған, бір жақ бетінде тағамдық бояумен жазылған «Cifran OD 1000 MG» жазуы бар таблеткалар. Ұзындығы 21.2 ± 0.1 мм, ені 10.6 ± 0.1 мм, қалыңдығы 7.6 ± 0.3 мм.
Фармакотерапиялық тобы
Бактерияларға қарсы жүйелік қолдануға арналған препараттар. Микробтарға қарсы препараттар –хинолон туындылары. Фторхинолондар. Ципрофлоксацин.
АТХ коды J01MA02
Фармакологиялық қасиеттері
Фармакокинетикасы
Әсері ұзаққа созылатын ципрофлоксацин таблеткалары тез босап шығатын таблеткалармен салыстырғанда препараттың өте төмен жылдамдықпен босап шығуы үшін жасалған.
24 сағаттық дозалау кезеңі ішіндегі AUC-пен салыстырып есептегенде, әсер етуі ұзаққа созылатын ципрофлоксацин таблеткаларының 1000 мг тәулігіне бір рет фармакокинетикалық бейіні тез босап шығатын ципрофлоксацин таблеткаларының 500 мг тәулігіне екі рет салыстырмалы.
Сіңуі
Пероральді түрде қолданғаннан кейін ципрофлоксацин көбіне жіңішке ішекте тез сіңеді. Қан сарысуында ципрофлоксацин ең жоғары концентрацияға 1-2 сағаттан соң жетеді. Биожетімділігі 70-80%-ға жуықты құрайды. Қан плазмасында ең жоғары концентрация (Сmах) мен «концентрация - уақыт» қисығы астындағы аудан (AUC) мәндері дозаға пропорционалды түрде артады.
Таралуы
Ципрофлоксациннің қан плазмасы ақуыздарымен байланысы 20-30% құрайды; қан плазмасында белсенді зат көбіне иондалмаған түрде болады. Ципрофлоксацин организмнің тіндеріне және сұйықтықтарына еркін таралады. Организмде таралу көлемі 2-3 л/кг құрайды. Тіндердегі ципрофлоксацин концентрациялары қан сарысуындағы концентрациядан едәуір артық болады.
Метаболизмі
Бауырда биотрансформацияланады. Қанда ципрофлоксациннің төрт метаболиті: диэтилципрофлоксацин (Ml), сульфоципрофлоксацин (М2), оксоципрофлоксацин (МЗ), формилципрофлоксацин (М4) аздаған концентрацияларда табылады, олардың үшеуі (М1-МЗ), налидикс қышқылының бактерияларға қарсы белсенділігімен салыстырғанда, бактерияларға қарсы in vitro белсенділік танытады. Аз мөлшерде болатын М4 метаболитінің бактерияларға қарсы in vitro белсенділігі норфлоксациннің белсенділігіне сәйкес келеді.
Шығарылуы
Ципрофлоксацин организмнен бүйрек арқылы көбіне шумақтық сүзілу және өзекшелік секреция жолымен шығарылады; аздаған мөлшері – асқазан-ішек жолымен. Несеппен бірге шығарылуы препаратты қабылдағаннан кейін 24 ішінде жүреді. Қабылдағаннан кейін 5 күн ішінде қабылданған дозаның 1-ден 2%-ға дейіні өтпен бірге метаболиттер түрінде шығарылады, препараттың 20-35%-ға жуығы нәжіспен бірге шығарылады. Бүйрек функциясы қалыпты пациенттерде сарысудан жартылай шығарылу кезеңі шамамен 7 сағатты құрайды.
Егде жастағылар
Дереу босап шығатын, ішілетін таблеткаларына (бір реттік доза) және ципрофлоксациннің көктамыр ішіне енгізуге арналған түріне (бір реттік және көп реттік дозалары) жүргізілген фармакокинетикалық талдаулар плазмадағы ципрофлоксацин концентрациялары, жас адамдарға қарағанда, егде жастағы (65 жастан асқан) адамдарда жоғары болатынын көрсетеді. Cmax 16%-дан 40%-ға дейін жоғарылайды, ал орташа AUC шамамен 30%-ға жоғарылайды, бұл ең кемінде, егде жастағы адамдарда бүйрек клиренсінің төмендеуінен ішінара туындауы мүмкін. Егде жастағы адамдарда жартылай шығарылу кезеңі тек шамалы ғана ұзағырақ (~20%). Осы айырмашылықтар клиникалық тұрғыдан маңызды емес.
Бүйрек жеткіліксіздігі
Бүйрек функциясы төмендеген науқастарда ципрофлоксациннің жартылай шығарылу кезеңі ұзаруы мүмкін. 500 мг ципрофлоксациннің әсері ұзаққа созылатын түрін қабылдап жүрген, несеп шығару жолдарының асқынбаған инфекциялары бар науқастарда дозаны түзету қажет емес. 1000 мг доза қолданылатын несеп шығару жолдарының асқынған инфекциялары және асқынбаған жедел пиелонефрит үшін, ципрофлоксациннің әсері ұзаққа созылатын түрінің дозасын тәулігіне 1 рет 500 мг-ге дейін азайтқан жөн (креатинин клиренсі минутына 30 мл-ден төмен).
Бауыр жеткіліксіздігі
Бауырдың созылмалы циррозы бар науқастарды зерттегенде ципрофлоксациннің фармакокинетикасында елеулі өзгерулер байқалған жоқ. Мұндайда ципрофлоксациннің кинетикасы бауыр функциясының жедел жеткіліксіздігі бар науқастарда жеткілікті білінген жоқ.
Фармакодинамикасы
Ципрофлоксацин фторхинолондар тобына жататын, бактерияларға қарсы әсер ету ауқымы кең синтетикалық препарат болып табылады.
Әсер ету механизмі
Ципрофлоксацин грамтеріс және грамоң микроорганизмдердің кең ауқымына қатысты in vitro белсенділікке ие. Ципрофлоксациннің бактерицидтік әсері бактериялық ДНҚ репликациясы, транскрипциясы, репарациясы және рекомбинациясы үшін қажетті бактериялық топоизомеразалардың II типін (топоизомераза II (ДНҚ-гираза) және топоизомераза IV) тежеу арқылы жүзеге асырылады.
Резистенттілік механизмі
Ципрофлоксацинге in vitro резистенттілік көбіне бактериялық топоизомеразалардың және ДНҚ-гиразаның нүктелік мутацияларымен жүзеге асады және көп сатылы мутациялар арқылы баяу дамиды.
Бірлі-жарым мутациялар клиникалық тұрақтылығының дамуына қарағанда сезімталдықтың тезірек төмендеуіне әкелуі мүмкін, алайда көптеген мутациялар негізінен ципрофлоксацинге клиникалық резистенттіліктің дамуына және хинолинді қатардың препараттарына айқаспалы резистенттілікке әкеледі. Басқа көптеген антибиотиктерге резистенттілігі сияқты, ципрофлоксацинге резистенттілік бактериялардың жасушалық қабырғасы өткізгіштігінің төмендеуі (бұл көбіне Pseudomonas aeruginosa жағдайында жүреді) және/немесе микроб жасушасынан шығарылуының белсенділенуі (эффлюкс) нәтижесінде қалыптасуы мүмкін. Плазмидтерде орныққан генмен кодталатын Qnr себебінен резистенттіліктің дамығаны жөнінде мәлімдемелер бар. Пенициллиндердің, цефалоспориндердің, амино-гликозидтердің, макролидтердің және тетрациклиндердің белсенділігінің жойылуына әкелетін резистенттілік механизмдері ципрофлоксациннің бактерияларға қарсы белсенділігін бұзбауы мүмкін. Осы препараттарға резистентті микроорганизмдер ципрофлоксацинге сезімтал болуы мүмкін. Ең төмен бактерицидтік концентрация (МБК) әдетте ең төмен тежегіш концентрациядан (МИК) 2 еседен артыққа аспайды.
Айқаспалы резистенттілік. Ципрофлоксацин мен микробтарға қарсы басқа класқа жататын препараттар арасында айқаспалы резистенттілік білінген жоқ.
Ципрофлоксацин келесі бактериялардың көптеген штаммдарына қатысты in vitro жағдайларда да, сонымен қатар инфекцияларды клиникалық емдеу тәжірибесінде де белсенділік танытады.
Аэробты грамоң микроорганизмдер: Bacillus anthracis, Staphylococcus aureus (метициллин-сезімтал), Staphylococcus saprophyticus, Streptococcus spp. Аэробты грамтеріс микроорганизмдер: Aeromonas spp., Moraxella catarrhalis, Brucella spp., Neisseria meningitidis, Citrobacter koseri, Pasteurella spp., Francisella tularensi, Salmonella spp., Haemophilus ducreyi, Shigella spp., Haemophilius influenzae, Vibrio spp., Legionella spp., Yersinia pestis. Анаэробты микроорганизмдер: Mobiluncus spp.
Басқа да микроорганизмдер: Chlamydia trachomatis, Chlamydia pneumoniae, Mycoplasma hominis, Mycoplasma pneumoniae.
Келесі микроорганизмдердің ципрофлоксацинге сезімталдығының ауытқымалы дәрежеде болатыны көрсетілді: Acinetobacter baumann, Burkholderia cepacia, Campylobacter spp., Citrobacter freundii, Enterococcus faecalis, Enterobacter aerogenes, Enterobacter cloacae, Escherichia coli, Klebsiella pneumoniae, Klebsiella oxytoca, Morganella morganii, Neisseria gonorrhoeae, Proteus mirabilis, Proteus vulgaris, Providencia spp., Pseudomonas aeruginosa, Pseudomonas fluorescens, Serratia marcescens, Streptococcus pneumoniae, Peptostreptococcus spp., Propionibacterium acnes. Ципрофлоксацинге мыналар: Staphylococcus aureus (метициллин-резистентті), Stenotrophomonas maltophilia, Actinomyces spp., Enteroccus faecium, Listeria monocytogenes, Mycoplasma genitalium, Ureaplasma urealitycum, анаэробты микроорганизмдер (Mobiluncus spp., Peptostreptococus spp., Propionibacterium acnes қоспағанда) табиғи резистентті деп саналады
Қолданылуы
Ципрофлоксацинге сезімтал микроорганизмдерден туындаған асқынбаған және асқынған инфекциялар.
Ересектер
- тыныс жолдарының инфекцияларында. Ципрофлоксацинді Klebsiella spp., Enterobacter spp., Proteus spp., Esherichia coli, Pseudomonas aeruginosa, Haemophilus spp., Moraxella catarrhalis, Legionella spp. және стафилококктерден туындаған пневмонияларда тағайындау ұсынылады.
- ортаңғы құлақ инфекцияларында (ортаңғы отит), қосалқы қуыстар инфекцияларында (синусит), егер осы инфекциялар, Pseudomonas aeruginosa-ны қоса, әсіресе грамтеріс микроорганизмдерден немесе стафилококктерден туындаса
- көз инфекцияларында
- бүйрек және/немесе несеп шығару жолдарының инфекцияларында
- аднекситті, гонореяны, простатитті қоса, жыныс мүшелерінің инфекцияларында
- құрсақ қуысының инфекцияларында (асқазан-ішек жолының, өт шығару жолдарының бактериялық инфекциялары, перитонит)
- тері мен жұмсақ тін инфекцияларында
- сепсисте
- иммунитеті төмендеген пациенттердегі инфекцияларда немесе инфекцияларға профилактика жасағанда (иммунодепрессанттарды қабылдап жүрген пациенттер немесе нейтропениясы бар пациенттер)
- иммунитеті төмендеген пациенттерде ішектің селективті деконтаминациясында
- сібір ойық жарасының өкпелік түрінің (Bacillus anthracis жұқпа жұқтырған) профилактикасында және емінде
- Neisseria meningitidis әсерінен туындаған инвазивтік инфекциялардың профилактикасында.
Бактерияларға қарсы дәрілерді қолдану ережелері жөніндегі ағымдағы ресми нұсқауларға назар аудару қажет.
Балалар
- муковисцидозы бар 5-тен 17 жасқа дейінгі балаларда Pseudomonas aeruginosa әсерінен туындаған асқынуларды емдеуде
- сібір ойық жарасының өкпелік түрінің (Bacillus anthracis жұқпа жұқтырған) профилактикасында және емінде
Қолдану тәсілі және дозалары
Таблетканы шайнамай, сумен ішіп жұту қажет. Оларды тамақ ішу уақытына қарамай-ақ қабылдауға болады. Аш қарынға қабылдағанда белсенді зат тезірек сіңеді.
Цифран ОД таблеткалары күніне бір рет қабылданады.
Дозалау және емдеу курсы инфекциялардың көрсетілімдеріне, ауырлық дәрежесіне және инфекциялардың орнығуына, патогенді микроорганизм(дер)дің ципрофлоксацинге сезімталдығына, науқастардың бүйрек функцияларына және клиникалық және бактериологиялық тиімділігіне байланысты.
Кейбір бактериялық инфекцияларды (мыс. Pseudomonas aeruginosa, Acinetobacter or Staphylococci) емдеу үшін ципрофлоксациннің өте жоғары дозалары және бактерияларға қарсы басқа да тиімді заттармен бірге енгізу қажет болуы мүмкін.
Кейбір инфекцияларды (мыс. кіші жамбас ағзаларының қабыну аурулары, интраабдоминальді инфекциялар, нейтропениялық науқастардағы инфекциялар және буындардың инфекциялары) емдеу үшін, қатысқан патогендерге байланысты, бактерияларға қарсы басқа да тиісті заттармен бірге енгізу қажет болуы мүмкін.
Қолданылуы
Гериатриялық науқастар
Гериатриялық науқастарға дозаны инфекцияның ауырлық дәрежесіне және креатинин клиренсіне байланысты енгізу қажет.
Бүйрек жеткіліксіздігі
Ципрофлоксацин негізінен несеппен шығарылады; алайда препарат сонымен қатар метаболизденеді және бауырдың билиарлық жүйесі және ішек арқылы ішінара шығарылады. Әсері ұзаққа созылатын ципрофлоксациннің 500 мг таблеткаларын қабылдап жүрген, несеп шығару жолдарының асқынбаған инфекциялары бар науқастарда дозаны түзету қажет емес. Несеп шығару жолдарының асқынған инфекциялары және асқынбаған жедел пиелонефриті бар, креатинин клиренсі < 30 мл/мин болатын науқастарда әсері ұзаққа созылатын ципрофлоксацин таблеткасының дозасын тәулігіне 1000 мг-ден 500 мг-ге дейін қысқартқан жөн. Гемодиализде немесе перитонеальді диализде жүрген пациенттерге диализ емшарасын аяқтағаннан кейін әсері ұзаққа созылатын ципрофлоксацин таблеткаларын береді.
Бауыр жеткіліксіздігі
Тұрақты созылмалы циррозы бар науқастарда әсері ұзаққа созылатын ципрофлоксацин таблеткаларының дозасын түзету қажет емес. Алайда бауыр функциясының жедел жеткіліксіздігі бар науқастарда ципрофлоксациннің кинетикасы толық зерттелген жоқ.
Жағымсыз әсерлері
Төменде берілген жағымсыз реакциялар былайша жіктелген: «өте жиі» (>10), «жиі» (>1/100, <1/10), «жиі емес» (>1/1000, <1/100), «сирек» (>1/10 000, <1/1000), «өте сирек» (<10 000), «жиілігі белгісіз».
Жиі
- жүректің айнуы, диарея, инъекция жасалған жерде реакциялар
Жиі емес
- микоздық асқын инфекциялар
- эозинофилия
- тәбеттің және ішілетін тамақ мөлшерінің төмендеуі
- психомоторлы аса жоғары белсенділік/ажитация
- бас ауыру, бас айналу, ұйқының бұзылуы, дәмнің бұзылуы
- құсу, іштің ауыруы, диспепсия, метеоризм
- «бауыр» трансаминазасы белсенділігінің жоғарылауы, билирубин концентрациясының жоғарылауы
- бөртпе, қышыну, есекжем
- артралгия
- бүйрек функциясының бұзылуы
- этиологиясы спецификалық емес ауыру синдромы, жалпы дімкәстік, қызба
- қанда сілтілік фосфатаза белсенділігінің жоғарылауы
Сирек
- жалған жарғақшалы колит (өте сирек жағдайларда өліммен аяқталуы мүмкін)
- лейкопения, анемия, нейтропения, лейкоцитоз, тромбоцитопения
- аллергиялық реакциялар, аллергиялық ісіну/ангионевроздық ісіну
- гипергликемия, гипогликемия
- сананың шатасуы және бағыттан адасу, үрейлену, түс көрудің бұзылуы (түнгі қорқыныштар), депрессия (суицидтік қылықтар/ойлар, сондай-ақ суицидтік әрекеттер немесе қылғыну суициді сияқты өзін-өзі зақымдауды мақсат ету мінез-құлқының күшеюі), елестеулер
- парестезиялар және дизестезиялар, гипестезиялар, тремор, құрысулар (эпилепсия ұстамаларын қоса), вертиго
- көру бұзылыстары, құлақтың шыңылдауы, естуден айырылу
- тахикардия, вазодилатация, артериялық қысымның төмендеуі, бетке қан «тебу» сезімі
- тыныстың бұзылуы (бронхтың түйілуін қоса)
- бауыр функциясының бұзылуы, сарғаю, гепатит (жұқпалы емес)
- фотосенсибилизация, этиологиясы нақтыланбаған күлдіреуіктің түзілуі
- миалгия, артрит, бұлшықет тонусының жоғарылауы, бұлшықет құрысулары
- бүйрек жеткіліксіздігі, гематурия, кристаллурия, тубулоинтерстициальді нефрит
- ісінулер, тершеңдік (гипергидроз)
- протромбин концентрациясының өзгеруі, амилаза белсенділігінің жоғарылауы
Өте сирек
- гемолитикалық анемия, агранулоцитоз, панцитопения (өмірге қауіп төндіретін), сүйек кемігінің тежелуі (өмірге қауіп төндіретін)
- анафилактикалық реакциялар, анафилактикалық шок (өмірге қауіп төндіретін) сарысу құю ауруы
- психоздық реакциялар (суицидтік қылықтар/ойлар, сондай-ақ суицидтік әрекеттер немесе қылғыну суициді сияқты өзін-өзі зақымдауды мақсат ету мінез-құлқының күшеюі)
- бас сақинасы, қимыл үйлесімінің бұзылуы, иіс сезімінің бұзылуы, гиперестезия, бас сүйекішілік гипертензия (ми жалған ісік симптоматикасы)
- түрлі түсті ажыратудың бұзылуы, естудің бұзылуы
- васкулит, панкреатит
- бауыр тіндерінің некрозы (өте сирек жағдайларда өмірге қатер төндіретін бауыр функциясының жеткіліксіздігіне дейін өршитін)
- нүктелі қанталаулар, мультиформалы эритеманың кіші түрлері,түйінді эритема, Стивенс-Джонсон синдромы (қатерлі экссудативті эритема), соның ішінде өмірге потенциалды қауіп төндіретін, Лайелл синдромы (уытты эпидермальді некролиз), соның ішінде өмірге потенциалды түрде қауіп төндіретін
- бұлшықет әлсіздігі, тендинит, сіңірлердің үзілуі (көбіне ахиллов сіңірлерінің), миастения симптомдарының өршуі
- жүріс-тұрыстың бұзылуы
Жиілігі белгісіз
- шеткергі нейропатия және полинейропатия
- QT аралығының ұзаруы, қарыншалық аритмиялар (соның ішінде «пируэт» типті)
- жайылған жедел пустулезді экзантема
- ХҚҚ жоғарылауы (К витаминінің антагонистерін қабылдап жүрген пациенттерде)
Қолдануға болмайтын жағдайлар
- ципрофлоксацинге немесе бактерияларға қарсы хинолондар класына жататын басқа да препараттарға жоғары сезімталдық, сондай-ақ препарат компоненттеріне жоғары сезімталдық
- тизанидинмен, теофиллинмен бір мезгілде қабылдау
- 18 жасқа дейінгі балалар мен жасөспірімдер
- жүктілік және лактация кезеңі
- эпилепсия, сыртартқыда құрысу ұстамалары, мидың органикалық зақымдануы
- жалған жарғақшалы колит
- глюкоза- 6- фосфат дегидрогеназа тапшылығы
Дәрілермен өзара әрекеттесуі
QТ аралығын ұзартатын дәрілік препараттар
QT аралығын ұзартатын дәрілік препараттарды (мысалы, аритмияларға қарсы І А класс немесе ІІІ класс препараттарын, трициклді антидепрессанттарды, макролидтерді, нейролептиктерді) қабылдап жүрген пациенттерде, фторхинолондар сияқты, ципрофлоксацинді бір мезгілде қолданғанда сақтық танытқан жөн («Айрықша нұсқаулар» бөлімін қараңыз).
Хелат қосылыстарының түзілуі
Ципрофлоксациннің таблеткалық түрлерін және құрамында катион бар препараттарды, құрамында кальций, магний, алюминий, темір бар минералды қоспаларды, сукральфатты, антацидтерді, полимерлі фосфатты қосылыстарды (севеламер, лантан катонаты сияқты) және буферлік сыйымдылығы үлкен, құрамында магний, алюминий немесе кальций бар препараттарды (диданозин таблеткалары сияқты) бір мезгілде қабылдау ципрофлоксациннің сіңуін төмендетеді. Мұндай жағдайларда ципрофлоксацинді осы препараттарды қабылдаудан 1-2 сағат бұрын, немесе қабылдағаннан кейін 4 сағаттан соң қабылдаған жөн.
Бұл шектеу H2-гистаминдік рецепторлар блокаторларының класына жататын дәрілік препараттарға жатпайды.
Тамақ және сүт өнімдерін қабылдау
Ципрофлоксацинді және сүт өнімдерін немесе минералдармен байытылған сусындарды (мысалы, сүт, йогурт, кальциймен байытылған апельсин шырыны) бір мезгілде қолдануға жол бермеген жөн, өйткені мұндайда ципрофлоксациннің сіңуі азаюы мүмкін. Алайда басқа тағамдық өнімдердің құрамына кіретін кальций ципрофлоксациннің сіңуіне елеулі ықпалын тигізбейді.
Омепразол
Ципрофлоксацинді және құрамында омепразол бар препараттарды үйлестіріп қолданғанда плазмада препараттың ең жоғары концентрациясының аздап төмендегені және «концентрация-уақыт» фармакокинетикалық қисығы астындағы ауданның азайғаны білінуі мүмкін.
Теофиллин
Айрықша нұсқаулар
Ксантиннің басқа да туындылары
Ципрофлоксацинді және кофеинді немесе пентоксифиллинді (окспентифиллин) бір мезгілде қолдану қан сарысуында ксантин туындылары концентрацияларының артуына әкелуі мүмкін.
Қабынуға қарсы стероидты емес препараттар
Хинолондардың (ДНҚ-гираза тежегіштері) өте жоғары дозаларын және қабынуға қарсы стероидты емес кейбір препараттарды (ацетилсалицил қышқылын қоса) үйлестіру құрысуларға түрткі болуы мүмкін.
Циклоспорин
Ципрофлоксацинді және құрамында циклоспорин бар препараттарды бір мезгілде қолданғанда қан плазмасында креатинин концентрацияларының қысқа мерзімдік өткінші жоғарылауы байқалды. Мұндай жағдайларда қандағы креатинин концентрациясын аптасына екі рет анықтау қажет.
Пероральді гипогликемиялық дәрілер
Ципрофлоксацинді және пероральді гипогликемиялық дәрілерді, негізінен, сульфанилмочевина препараттарын (мысалы, глибенкламидті, глимепиридті) бір мезгілде қолданғанда гипогликемияның дамуына пероральді гипогликемиялық дәрілердің әсер етуінің күшеюі себеп болады деп шамаланады («Жағымсыз әсері» бөлімін қараңыз).
Пробенецид
Пробенецид ципрофлоксациннің бүйрек арқылы шығарылу жылдамдығын баяулатады. Ципрофлоксацинді және құрамында пробенецид бар препараттарды бір мезгілде қолдану қан плазмасында ципрофлоксацин концентрациясының жоғарылауына әкеледі.
Фенитоин
Ципрофлоксацинді және фенитоинды бір мезгілде қолданғанда қан плазмасында фенитоин мөлшерінің өзгеруі (жоғарылауы немесе төмендеуі) байқалды. Концентрациясының төмендеуі салдарынан фенитоинның құрысуға қарсы әсерінің бәсеңдеуіне жол бермеу үшін, сондай-ақ ципрофлоксацин қабылдауды тоқтатқан кезде фенитоинның артық дозалануына байланысты жағымсыз құбылыстарға жол бермеу үшін, екі препаратты да қолдану кезеңі ішінде және біріктірілген емді аяқтағаннан кейін аз уақытта қан плазмасындағы фенитоин мөлшерін анықтауды қоса, екі препаратты да қабылдап жүрген пациенттерде фенитоинмен емдеуді бақылау ұсынылады.
Метотрексат
Метотрексатты және ципрофлоксацинді бір мезгілде қолданғанда метотрексаттың бүйректік-өзекшелік тасымалдануы баяулауы мүмкін, бұл қан плазмасындағы метотрексат концентрациясының жоғарылауымен қатар жүруі мүмкін. Мұндайда метотрексаттың жағымсыз әсерлерінің даму ықтималдылығы артуы мүмкін. Осыған байланысты метотрексатпен және ципрофлоксацинмен бір мезгілде ем қабылдап жүрген пациенттерге мұқият бақылау белгіленуі тиіс.
Тизанидин
Дені сау еріктілердің қатысуымен жүргізілген клиникалық зерттеулер нәтижесінде ципрофлоксацинді және құрамында тизанидин бар препараттарды бір мезгілде қолданғанда қан сарысуында тизанидин концентрациясының артатыны анықталды: ең жоғары концентрация (Сmах) 7 есе (4-тен 21 есеге дейін) артты, AUC («концентрация-уақыт» фармакокинетикалық қисық астындағы аудан) көрсеткіштері 10 есе (6-дан 24 есеге дейін) артты. Қан сарысуында тизанидин концентрациясының артуы артериялық қысымның төмендеуін және ұйқышылдықты туындатуы мүмкін. Сондықтан ципрофлоксацинді және құрамында тизанидин бар препараттарды бір мезгілде қолдануға болмайды.
Дулоксетин
Клиникалық зерттеулер жүргізу барысында дулоксетинді және CYP450 1А2 изоферментінің күшті тежегіштерін (флувоксамин сияқты) бір мезгілде қолдану дулоксетиннің AUC және Сmах артуына әкеп соғуы мүмкін екендігі көрінді. Ципрофлоксацинмен ықтимал өзара әрекеттесуі жөнінде клиникалық зерттеулердің жоқтығына қарамастан, ципрофлоксацин мен дулоксетинді бір мезгілде қолданғанда осындай өзара әрекеттесу мүмкін екендігін алдын ала білуге болады.
Ропинирол
Ропиниролді және ципрофлоксацинді, CYP450 1А2 изоферментінің орташа тежегішін бір мезгілде қолдану ропиниролдың Сmах және AUC мәндерінің, сәйкесінше, 60 және 84%-ға артуына әкеледі. Ципрофлоксацинмен бірге қолданғанда және біріктірілген емді аяқтағаннан кейін қысқа уақыт ішінде ропиниролдың жағымсыз әсерлерін бақылаған жөн.
Лидокаин
Дені сау еріктілерге жүргізілген зерттеулерде құрамында лидокаин бар препараттарды және CYP450 1А2 изоферментінің орташа тежегіші ципрофлоксацинді бір мезгілде қолдану, лидокаинді көктамыр ішіне енгізгенде, оның клиренсінің 22%-ға төмендеуіне әкелетіні анықталды. Ципрофлоксацинмен бір мезгілде қолданғанда лидокаиннің жағымдылығы жақсы болғанына қарамастан, өзара әрекеттесу салдарынан жағымсыз әсерлер күшеюі мүмкін («Айрықша нұсқаулар» бөлімін, Р450 цитохромын қараңыз).
Клозапин
Клозапинді және ципрофлоксацинді 250 мг дозада 7 күн бойы бір мезгілде қолданғанда клозапиннің және N-десметилклозапиннің сарысулық концентрацияларының, сәйкесінше, 29%-ға және 31%-ға артқаны байқалды. Клозапинді ципрофлоксацинмен бірге қолдану кезінде және біріктірілген емді аяқтағаннан кейін қысқа уақыт ішінде пациенттің жағдайын бақылаған және қажет болған кезде клозапинді дозалау режимін түзету жүргізген жөн («Айрықша нұсқаулар» бөлімін, Р450 цитохромын қараңыз).
Силденафил
Дені сау еріктілерде ципрофлоксацинді 500 мг дозада және силденафилді 50 мг дозада бір мезгілде қолданғанда силденафилдің Сmах және AUC мәндерінің 2 есе артқаны байқалды. Осыған байланысты, пайда/қаупінің арақатынасына баға берілгеннен кейін ғана бұл біріктірілім қолданылуы мүмкін.
К витаминінің антагонистері
Ципрофлоксацинді және К витаминінің антагонистерін (мысалы, варфаринді, аценокумаролды, фенпрокумонды, флуиндонды) бірге қолдану олардың антикоагулянттық әсерлерінің күшеюіне әкелуі мүмкін. Осы әсердің шамасы қатар жүретін инфекцияларға, пациенттің жасына және хал-жағдайына байланысты өзгеруі мүмкін, сондықтан ципрофлоксациннің ХҚҚ (халықаралық қалыптастырылған қатынас) артуына ықпалына баға беру күрделі. Ципрофлоксацинді және К витаминінің антагонистерін бірге қолдану кезінде, сондай-ақ біріктірілген емді аяқтағаннан кейін қысқа уақыт ішінде ХҚҚ-ны барынша жиі бақылаған жөн.
Айрықша нұсқаулар
Ауыр инфекциялар, стафилококктік инфекциялар және грамоң және анаэробты бактериялардың себебінен болған инфекциялар
Ауыр инфекцияларды, стафилококктік инфекцияларды және грамоң және анаэробты бактериялардың себебінен болған инфекцияларды емдеген кезде ципрофлоксацинді бактерияларға қарсы тиісті дәрілермен біріктіріп пайдаланған жөн.
Streptococcus pneumoniae себеп болған инфекциялар
Цифран ОД препараты, қоздырғыштарға қатысты тиімділігі шектеулі болғандықтан, Streptococcus pneumoniae әсерінен болған инфекцияларды емдеу үшін ұсынылмайды.
Жыныс жолдарының инфекциялары
Фторхинолондарға төзімді Neisseria gonorrhoeae штаммдарының әсерінен туындауы мүмкін деп болжам жасалған генитальді инфекцияларда ципрофлоксацинге жергілікті резистенттілік туралы ақпаратты ескерген және қоздырғыштың сезімталдығын зертханалық тестілер арқылы айғақтаған жөн.
Жүрек тарапынан бұзылулар
Ципрофлоксацин QT аралығының ұзаруына ықпалын тигізеді («Жағымсыз әсері» бөлімін қараңыз). Әйелдерде, еркектерге қарағанда, QT аралығының орташа ұзақтығы үлкен екендігін ескерсек, олар QT аралығын ұзартатын препараттарға өте сезімтал болады. Егде жастағы пациенттерде де QT аралығын ұзартатын препараттардың әсеріне жоғары сезімталдық байқалады. Ципрофлоксацинді QT аралығын ұзартатын препараттармен (мысалы, аритмияға қарсы I А және III класс препараттарымен, үш циклді антидепрессанттармен, макролидтермен және психозға қарсы препараттармен) біріктірілімін («Басқа дәрілік заттармен өзара әрекеттесуі» бөлімін қараңыз), немесе QT аралығының ұзару қаупі жоғары немесе «пируэт» типті аритмияның даму қаупі бар (мысалы, QT аралығының туа біткен ұзару синдромы бар, гипокалиемия немесе гипомагниемия сияқты электролиттер дисбалансы түзетілмеген, сондай-ақ жүрек функциясының жеткіліксіздігі, миокард инфарктісі, брадикардия сияқты жүрек аурулары бар) пациенттерде абайлап пайдаланған жөн.
Балаларда қолданылуы
Ципрофлоксацин, осы класқа жататын басқа да препараттар сияқты, жануарларда ірі буындардың артропатиясын туындататыны анықталды. 18 жасқа дейінгі балаларда ципрофлоксацинді қолданудың қауіпсіздігі жөнінде күні бүгінге дейін бар деректерді талдағанда, олардың көбісінде өкпе муковисцидозы бар болды, шеміршектер мен буындар зақымының препаратты қабылдаумен байланысы анықталған жоқ. Ципрофлоксацинді балалардағы (5-тен 17 жасқа дейінгі балаларда), Pseudomonas aeruginosa-мен байланысты өкпе муковисцидозының асқынуын емдеуден басқасында, басқа ауруларды емдеу үшін және сібір ойық жарасының өкпелік түрінің (Bacillus anthracis-ден жұққанына күмәнданғаннан немесе ол айғақталғаннан кейін) емдеу және профилактика жасау үшін қолдануға ұсынылмайды.
Аса жоғары сезімталдық
Кейде ципрофлоксациннің алғашқы дозасын қабылдағаннан кейін препаратқа аса жоғары сезімталдық («Жағымсыз әсері» бөлімін қараңыз), соның ішінде аллергиялық реакциялар дамуы мүмкін, мұны емдеуші дәрігерге дереу мәлімдеген жөн. Сирек жағдайларда алғаш қолданудан кейін анафилактикалық шокқа дейін ұласатын анафилактикалық реакциялар туындауы мүмкін. Мұндай жағдайларда Цифран ОД препаратын қолдануды дереу тоқтатқан және тиісті ем жүргізген жөн.
Асқазан-ішек жолы
Ципрофлоксацинмен емдеу кезінде немесе емдеуден кейін ауыр және ұзаққа созылатын диарея пайда болғанда жалған жарғақшалы колиттің бар-жоқтығын анықтаған жөн, ол препаратты дереу тоқтатуды және тиісті ем (ішке тәулігіне 4 рет 250 мг доза ванкомицин) тағайындауды қажет етеді. Осы жағдайда ішектің жиырылуын басатын препараттарды қолдануға болмайды.
Гепатобилиарлы жүйе
Ципрофлоксацинді қолданғанда бауыр некрозы және өмірге қауіп төндіретін бауыр функциясының жеткіліксіздігі жағдайлары байқалды. Бауыр ауруының анорексия, сарғаю, несептің қараюы, қышыну, іштің ауыруы сияқты белгілері бар болған жағдайда - Цифран ОД препаратын қабылдауды тоқтатқан жөн («Жағымсыз әсері» бөлімін қараңыз).
Цифран ОД препаратын қабылдап жүрген және бауыр ауруын бастан кешкен пациенттерде «бауыр» трансаминазасы және сілтілік фосфатаза белсенділігінің уақытша жоғарылауы немесе холестатикалық сарғаю байқалуы мүмкін.
Тірек-қимыл аппараты
Ауыр миастениясы бар пациенттерге Цифран ОД препаратын сақтықпен қолданған жөн, өйткені симптомдары өршуі мүмкін.
Тендиниттің алғашқы белгілерінде (буын аймағының ауыратын ісінуі, қабынуы) Цифран ОД препаратын қолдануды тоқтату, дене жүктемесін болдырмау керек, өйткені сіңірлердің үзілу қаупі бар, сондай-ақ дәрігерден кеңес алған жөн.
Цифран ОД препаратын қабылдағанда тендинит жағдайлары және емдеуді бастағаннан кейін 48сағат ішінде сіңірлердің (көбіне ахиллов сіңірлерінің) кейде билатеральді түрде үзілуі жағдайлары болуы мүмкін. Сіңірлердің қабынуы және үзілуі Цифран ОД препаратымен емдеуді тоқтатқаннан кейін бірнеше айдан соң да пайда болуы мүмкін. Егде жастағы пациенттерде және кортикостероидтармен бір мезгілде ем қабылдап жүрген, сіңір аурулары бар пациенттерде тендинопатияның пайда болуының жоғары қаупі бар.
Цифран ОД препаратын сыртартқысында хинолондарды қабылдаумен байланысты сіңірлердің аурулары бар пациенттерде сақтықпен қолданған жөн.
Жүйке жүйесі
Цифран ОД препараты, басқа да фторхинолондар сияқты, құрысуларға түрткі болуы және құрысуға дайындық шегін төмендетуі мүмкін. Эпилепсиясы және ОЖЖ ауруларын (мысалы, құрысуға дайындық шегінің төмендеуі, сыртартқысында құрысу ұстамалары, ми қан айналымының бұзылулары, мидың органикалық зақымдануы немесе инсульт) бастан кешкен пациенттерде ОЖЖ тарапынан жағымсыз реакциялардың дамуы қауіп төндіруіне байланысты, ципрофлоксацинді күтілетін клиникалық әсер препараттың жағымсыз әсерінің даму қаупінен басым болған жағдайларда ғана қолданған жөн.
Цифран ОД препаратын қолданғанда эпилепсиялық жағдайдың даму жағдайлары жөнінде мәлімделді («Жағымсыз әсері» бөлімін қараңыз). Құрысулар пайда болған жағдайда препарат қолдануды тоқтатқан жөн. Психикалық реакциялар тіпті, Цифран ОД препаратын қоса, фторхинолондарды алғаш қолданудан кейін де пайда болуы мүмкін. Сирек жағдайларда депрессия немесе психоздық реакциялар суицидтік ойларға және суицидтік әрекеттерге дейін, соның ішінде суицидпен аяқталуға дейін өршуі мүмкін («Жағымсыз әсері» бөлімін қараңыз). Егер пациентте осы реакциялардың біреуі дамыса, Цифран ОД препаратын қабылдауды тоқтатқан және мұны дәрігерге мәлімдеген жөн.
Цифран ОД препаратын қоса, фторхинолондарды қабылдап жүрген пациенттерде сенсорлы немесе сенсомоторлы полинейропатиялар, гипестезиялар, дизестезиялар немесе әлсіздік жағдайлары байқалды. Ауыру, күйдіру, шаншу, ұю, әлсіздік сияқты симптомдар пайда болғанда, мұны пациенттер препаратты қолдануды жалғастырмас бұрын дәрігерге айтқаны жөн.
Тері жабындары
Цифран ОД препаратын қабылдағанда фотосенсибилизация реакциясы пайда болуы мүмкін, сондықтан пациенттер күн көзінің тікелей түсуінен және УК жарықтан аулақ жерде болғаны жөн. Егер фотосенсибилизация симптомдары (мысалы, тері жабындарының өзгеруі күннен болатын күйіктер сияқты, «Жағымсыз әсері» бөлімін қараңыз) байқалса, емдеуді тоқтатуы керек.
Р450 цитохромы
Ципрофлоксацин CYP 450 1А2 изоферменттерінің орташа тежегіші болып табылатыны белгілі. Цифран ОД препаратын және осы ферменттермен метаболизденетін, мысалы, тизанидин. теофиллин, метилксантин, кофеин, дулоксетин, ропинирол, клозапин, оланзапин сияқты препараттарды бір мезгілде қолданғанда сақтық танытқан жөн, өйткені олардың метаболизмінің ципрофлоксацинмен тежелуі себебінен, қан сарысуында осы препараттардың концентрацияларының артуы спецификалық жағымсыз реакцияларды туындатуы мүмкін.
Кристаллурияның дамуына жол бермеу үшін ұсынылған тәуліктік дозаны арттыруға жол беруге болмайды, сұйықтықты жеткілікті түрде пайдалану және несептің қышқыл реакциясын демеу қажет.
Іn vitro жағдайларда ципрофлоксацин Mycobacterium tuberculosis-ді, оның өсуін баса отырып, бактериологиялық зерттеуге кедергі жасауы мүмкін, бұл Цифран ОД қабылдап жүрген пациенттерде осы қоздырғышты диагностикалауда жалған теріс нәтиже беруі мүмкін.
Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері
Препарат психомоторлы реакциялар жылдамдығын төмендетеді, бұны көлік құралдарын басқару кезінде және зейінді жұмылдыруды қажет ететін механизмдермен жұмыс жасағанда ескеру қажет.
Артық дозаланғанда
Симптомдары: сананың шатасуы, ұйқышылдық, мәңгіру, бағыттан адасу, бас айналу, жүректің айнуы, құсу.
Емі: арнайы у қайтарғысы жоқ. Артық дозаланған жағдайда, стандартты шараларды (асқазанды шаю, одан кейін белсендірілген көмір қабылдау, сұйықтықтың аздаған мөлшерін енгізу, кристаллурияға жол бермеу мақсатында несептің қышқыл реакциясын жасау) жүргізуден басқа, бүйрек функциясын бақылау және, ципрофлоксациннің сіңірілуін төмендететін, құрамында магний- және кальций бар антацидтерді қабылдау ұсынылады. Гемо- немесе перитонеальді диализ арқылы ципрофлоксациннің тек аздаған мөлшері (10%-дан аз) ғана шығарылады.
Шығарылу түрі және қаптамасы
Поливинилхлоридті үлбірден және лакталған баспалы алюминий фольгадан жасалған пішінді ұяшықты қаптамаға 5 таблеткадан салынған.
Картон қорапшаға медициналық қолдану жөнінде мемлекеттік және орыс тілдеріндегі нұсқаулықпен бірге пішінді 2 қаптамадан салынған.
Сақтау шарттары
Құрғақ жерде, 25°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін пайдалануға болмайды.
Дәріханалардан босатылу шарттары
Рецепт арқылы
Өндіруші
RANBAXY LABORATORIES LIMITED
Industrial Area -3, Dewas – 455001, Үндістан
Тіркеу куәлігінің иесі
Ranbaxy Laboratories Limited, Үндістан
Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы
Алматы қ., Манас к-сі 32А, САТ БО, кеңсе 602
тел.: 8-800-080-5202, эл.поштасы: Almaty.kz@ranbaxy.