Римекор

• русский
• қазақша

• Скачать инструкцию медикамента

Саудалық атауы

Римекор

Халықаралық патенттелмеген атауы

Триметазидин

Дәрілік түрі

Үлбірлі қабықпен қапталған 20 мг таблеткалар

Құрамы

Бір таблетканың құрамында

белсенді зат - 20 мг триметазидин дигидрохлориді,

қосымша заттар: лудипресс ЛЦЕ (лактоза моногидраты 94,7 % - 98,3 %, повидон 3 % - 4 %), лактоза моногидраты, коллоидты кремнийдің қостотығы (аэросил), натрий кроскармеллозасы, магний стеараты,

қабық құрамы: гипромеллоза (гидроксипропилметилцеллюлоза), титанның қостотығы (Е 171), тальк, макрогол-4000 (полиэтиленгликоль-4000), азорубин (Е 122).

Сипаттамасы

Дөңгелек пішінді, екі беті дөңес, қызғылт түсті үлбірлі қабықпен қапталған таблеткалар. Ядросы ақтан ақ дерлік түске дейін.

Фармакотерапиялық тобы

Жүрек ауруларын емдеуге арналған басқа да препараттар. Триметазидин.

АТХ коды C01EB 15

Фармакологиялық қасиеттері

Фармакокинетикасы

Препаратты ішке қабылдағаннан кейін триметазидин асқазан-ішек жолынан жылдам және толық дерліктей сіңеді. Биожетімділігі - 90 %. Қан плазмасындағы ең жоғары концентрациясына жету уақыты - 2 сағат (20 мг триметазидинді бір рет қабылдағаннан кейінгі ең жоғары концентрациясы шамамен 55 нг/мл). Таралу көлемі 4,8 л/кг құрайды, бұл тінге жақсы диффузиясын білдіреді. Гистогематикалық кедергі арқылы жеңіл өтеді. Жартылай шығарылу кезеңі (Т1/2) 4,5-5 сағатты құрайды. Қан плазмасы ақуыздарымен байланысуы – 16 %. Организмнен бүйрек арқылы (өзгермеген түрде 60 % жуық) шығарылады. Препаратты қайталап қабылдағанда тепе-теңдік концентрациясына 24-36 сағаттан соң жетеді және емдеу аясында тұрақты болып қалады.

Фармакодинамикасы

Римекор антиангиналды, гипоксияға қарсы әсер етеді. Гипоксия немесе ишемияға ұшыраған жасушалардың энергетикалық метаболизмін қалпына келтіреді. Кардиомиоциттерге және ми нейрондарына тікелей әсер ете отырып, олардың метаболизмін және қызметін оңтайлы етеді. Цитопротекторлық әсері энергетикалық потенциалдың жоғарылауымен, тотығу декарбоксилденуін белсендіру және оттегі тұтынуды оңтайландыруымен (аэробты гликолиздің күшеюі және ұзын тізбекті 3-кетоацил-КоА-тиолазаның селективті тежелуі есебінен майлы қышқылдар тотығуының баяулауы) шартталған. Миокардтың жиырылуын демейді, жасушаішілік АТФ және креатинфосфаты құрамының төмендеуін болдырмайды. Ацидоз жағдайында жарғақшалық ион өзекшелерінің қызмет етуін қалпына келтіреді, кардиомиоциттерде кальцийдің және натрийдің жинақталуына кедергі болады, калий иондарының жасушаішілік мөлшерін орнына келтіреді. Миокард ишемиясы және реперфузиядан болған жасушаішілік ацидозды және фосфаттар мөлшерін азайтады. Бос радикалдардың зақымдайтын әсерлеріне кедергі болады, жасуша жарғақшаларының бүтіндігін сақтайды, ишемия аймағындағы нейтрофилдер белсенділігін қайтарады, қуаттық потенциалдың ұзақтығын арттырады, жасушадан креатинфосфокиназаның шығуын және миокардтың ишемиялық зақымдану айқындылығын азайтады.

Стенокардия кезінде ұстама жиілігін қысқартады (нитраттарға қажеттілік азаяды), 2 апталық емнен кейін дене жүктемесіне төзімділік артады, артериялық қысымның ауытқуы төмендейді.

Қолданылуы

• жеткілікті бақыланбайтын немесе бірінші желідегі антиангиналдық препараттарды көтере алмайтын тұрақты стенокардиясы бар науқастарды симптоматикалық емдеу үшін ересектерге қосымша ем ретінде

Қолдану тәсілі және дозалары

Ішке, тамақтану кезінде.

Ұсынылатын дозалау режимі – 1 таблеткадан (20 мг) күніне үш рет. Ең жоғары тәуліктік доза – 3 таблетка (60 мг триметазидинге сәйкес келеді). Емдеу ұзақтығын аурудың сипатына, қол жеткен әсеріне және препаратты көтере алушылығына байланысты дәрігер анықтайды. Емдеу нәтижесін 3 айдан кейін ғана бағалау ұсынылады; препараттың әсері болмағанда тоқтату керек.

Айрықша қауымдар

Бүйрек функциясы бұзылған пациенттер

Ауырлығы орташа дәрежедегі бүйрек жеткіліксіздігі бар пациенттерге (креатинин клиренсі 30-60 мл/мин) препаратты бір таблеткадан (20 мг) күніне екі рет, яғни тамақтану кезінде 1 таблетка таңертең және 1 таблетка кешке тағайындау ұсынылады.

Егде пациенттер

Егде жастағы пациенттерде бүйрек функциясының жасқа байланысты төмендеуінен триметазидиннің жоғары экспозициясы байқалуы мүмкін. Ауырлығы орташа дәрежедегі бүйрек жеткіліксіздігі бар пациенттерге (креатинин клиренсі 30-60 мл/мин) препаратты бір таблеткадан (20 мг) күніне екі рет, яғни тамақтану кезінде 1 таблетка таңертең және 1 таблетка кешке тағайындау ұсынылады. Егде жастағы пациенттерде дозаны таңдағанда сақ болған жөн.

Балаларда қолданылуы

18 жастан кіші пациенттерде триметазидин қолданудың тиімділігі мен қауіпсіздігі анықталмаған.

Жағымсыз әсерлері

Жиі

• бас айналуы, бас ауыруы

• абдоминальді ауыру, диарея, диспепсия, жүрек айнуы, құсу

• бөртпе, тері қышынуы, есекжем

• астения

Сирек

• жүрек қағуы, экстрасистолия, тахикардия

• артериялық гипотензия; пациенттің, әсіресе гипертензияға қарсы препараттар қабылдайтын науқастардың дімкәстігіне, басы айналуы немесе құлауына байланысты болуы мүмкін ортостатикалық гипотензия

• гиперемия

Жиілігі белгісіз

• ұйқы бұзылысы (ұйқысыздық, ұйқышылдық)

• паркинсонизм симптомдары (тремор, акинезия, бұлшықет гипертонусы), орнықсыз жүріс, мазасыз аяқ синдромы, әдетте препарат қабылдауды тоқтатқаннан кейін қайтымды болатын басқа да қозғалыс бұзылыстары

• іш қатуы

• жедел жайылған экзантематозды пустулез, ангионевроздық ісіну

• агранулоцитоз, тромбоцитопения, тромбоцитопениялық пурпура

• гепатит

Қолдануға болмайтын жағдайлар

• препараттың қандай да бір компонентіне жоғары сезімталдық

• Паркинсон ауруы, паркинсонизм симптомдары, тремор, мазасыз аяқ синдромы және басқа да қозғалыс бұзылыстары

• бүйрек функциясының ауыр бұзылуы (креатинин клиренсі ˂ 30 мл/мин)

• бауыр функциясының айқын бұзылуы

• тұқым қуалайтын лактоза жақпаушылығы, Lapp-лактаза ферменті тапшылығы, глюкоза-галактоза мальабсорбциясы

• жүктілік және лактация кезеңі

• 18 жасқа дейінгі балалар және жасөспірімдер (тиімділігі және қауіпсіздігі анықталмаған)

Дәрілермен өзара әрекеттесуі

Басқа препараттармен өзара әрекеттесуі туралы деректер жоқ.

Айрықша нұсқаулар

Триметазидин стенокардия ұстамаларын басуға арналмаған және тұрақсыз стенокардия емінің бастапқы курсы үшін немесе миокард инфарктісінде ауруханаға дейінгі кезеңде немесе ауруханаға жатқызған бірінші күндерінде қолданылмайды.

Стенокардия ұстамаларының дамуы жағдайында емдеуді қайтадан қарастырып, емдеуді (дәрілік ем немесе реваскуляризация емшарасын жүргізу) бейімдеу керек.

Триметазидин паркинсонизм белгілерін туындатуы немесе нашарлатуы мүмкін (тремор, акинезия, бұлшықет гипертонусы), сондықтан оларды әсіресе егде пациенттерде ұдайы бақылап отыру керек. Күмәнді жағдайларда пациенттер тиісінше тексерілуі үшін неврологқа жіберілуі тиіс.

Паркинсонизм, мазасыз аяқ синдромы, тремор, орнықсыз жүріс сияқты қозғалыстық бұзылыстар пайда болғанда препарат қабылдауды тоқтату керек.

Бұл жағдайлардың жиілігі төмен және әдетте препарат қабылдауды тоқтатқаннан кейін қайтымды. Көптеген пациенттерде қалпына келу триметазидинді тоқтатқаннан кейін 4 ай ішінде жүреді. Егер паркинсонизм

симптомдары препаратты қабылдауды тоқтатқан соң 4 айдан астам уақыт сақталса неврологқа қаралу керек.

Орнықсыз жүріс-тұрысқа немесе гипотензияға байланысты пациенттің құлауы, атап айтқанда гипертензияға қарсы препараттар қабылдайтын пациенттерде болуы мүмкін.

Триметазидиннің организмнен шығарылу уақыты ұлғайған пациенттерге препарат тағайындағанда сақ болуы керек:

• бүйрек функциясының орташа бұзылуы

• 75 жастан асқан егде жастағы пациенттер.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Клиникалық зерттеулер барысында гемодинамика көрсеткіштеріне триметазидиннің әсері айқындалмаған, алайда тіркеуден кейінгі кезеңде бас айналу мен ұйқышылдық жағдайлары байқалды, бұл автокөлікі басқару және дене және психикалық реакциялар жоғары жылдамдығын қажет ететін жұмыстарды орындау қабілетіне әсер етуі мүмкін.

Артық дозалануы

Осы уақытқа дейін препараттың артық дозалану жағдайы жөнінде хабарлар жоқ.

Шығарылу түрі және қаптамасы

10 таблеткадан поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамаға салынған.

3 пішінді қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.

Сақтау шарттары

Құрғақ, жарықтан қорғалған жерде, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Босатылу шарттары

Рецепт арқылы

Өндіруші/Қаптаушы

«Хемофарм» ЖШҚ, Ресей Федерациясы

Тіркеу куәлігінің иесі

«Нижфарм» ААҚ, Ресей Федерациясы

603950, Нижний Новгород қ.

Салганская к-сі, 7

тел.: (831) 278-80-88

факс: (831) 430-72-28

веб сайт: http://www.nizhpharm.ru

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«Нижфарм» АҚ ҚР Өкілдігі

050043, Қазақстан Республикасы,

Алматы қ., Хан-Тәңірі ы/а, 55б

тел.: (727) 2222 -100

факс: (727) 398-64-95

e–mail: almaty@stada.kz