Митолек®

• русский
• қазақша

• Скачать инструкцию медикамента

Саудалық атауы

Митолек

Халықаралық патенттелмеген атауы

Митоксантрон

Дәрілік түрі

Инъекцияға арналған 2 мг/мл ерітінді

Құрамы

1 мл ерітіндінің құрамында

белсенді зат –2,33 мг митоксантрон гидрохлориді (2,0 мг митоксантронға шаққанда),

қосымша заттар: натрий хлориді, натрий ацетаты тригидраты, мұзды сірке қышқылы, инъекцияға арналған су.

Сипаттамасы

Қою көк түсті сұйықтық

Фармакотерапиялық тобы

Ісікке қарсы препараттар. Ісікке қарсы антибиотиктер.

Антрациклиндер. Митоксантрон.

АТХ коды L01DB07

Фармакологиялық қасиеттері

Фармакокинетикасы

Көктамыр ішіне енгізгеннен кейін митоксантрон қан плазмасынан тез жоғалады және орталық жүйке жүйесінен басқа (ОЖЖ) барлық тіндерге тиісінше жоғары көлемде таралады. Енгізілген митоксантронның 90%-ы қан плазмасы ақуыздарымен тез байланысады. Митоксантронды енгізгеннен кейін 5-22 сағаттан соң тіндік ортада, қан плазмасындағыға қарағанда, өте жоғары концентрацияда болады. Енгізілген дозаға пропорционалды белсенді заттың өте жоғарғы концентрациялары бауырда, өкпеде және азаюға беталысы – сүйек кемігінде, жүректе, қалқанша безде, көкбауырда, ұйқы безінде, бүйрекүсті бездерінде және бүйректе болады.

Митоксантрон гематоэнцефалдық бөгет арқылы тек өте төмен мөлшерлерде ғана өтеді.

Таралудың бастапқы сатысында орташа жартылай шығарылу кезеңі 12 минутқа жуықты (0,027 - 0,39 сағат) және таралуының екінші сатысында орташа есеппен 93 минутты (0,5 - 3 сағат) құрайды. Жартылай шығарылудың терминальді кезеңі жекелеген елеулі ауытқуларға бейім және кемінде 215 сағатты (шамамен 9 күн) құрайды.

Жартылай шығарылудың ұзақ терминальді кезеңі мен таралудың жоғары айқын көлемі митоксантронның терең тіндік компартменттегі байланысын көрсетеді, одан ол баяу босап шығады.

Митоксантрон организмнен негізінен бауыр арқылы, нәжіспен бірге (13,6%-дан 24,8%-ға дейін) және 5,2%-дан 7,9%-ға дейіні несеппен бірге шығарылады.

Бүйрек функциясы төмендегенде организмнен шығарылуы.

Бүйрек функциясы қалыпты және төмендеген науқастарда заттың бүйректік клиренсіне қатысты елеулі айырмашылығы күні бүгінге дейін анықталған жоқ, сондықтан бүйрек функциясының ауырлығы жеңіл және орташа дәрежелі бұзылуларында митоксантронның дозаларын арнайы іріктеу қажет емес.

Бауыр функциясы төмендегенде организмнен шығарылуы.

Бауыр функциясы бұзылған науқастарда (бауырдағы метастаздар, бауыр обыры) митоксантронның фармакокинетикасына жүргізілген зерттеулер жеткіліксіз. Бұл науқастарда митоксантронның жартылай шығарылу кезеңінің ұлғаюы мен клиренсінің төмендеуіне бейімдік байқалады.

Бауыр функциясының ауырлық дәрежесі жеңіл және орташа бұзылуларында митоксантронның дозаларын арнайы іріктеу қажет емес.

Фармакодинамикасы

Митолек синтетикалық антрацендион болып табылады. Митоксантронның ісікке қарсы әсерінің нақты механизмі анықталмаған күйінде қалды. Митоксантрон басқа да антрациклиндер сияқты дезоксирибонуклеин қышқылы негіздері жұптарының қабаттары арасына енеді және дезоксирибонуклеин (ДНҚ) және рибонуклеин (РНҚ) қышқылдарының синтезін тежейді, кластерлік әсері бар және хромосомалардың үзілуімен жасушалар ядроларының аберрацияларын индукциялайды. Бұдан басқа, препараттың басқа әсер ету механизмі митоксантронның ДНҚ-ға электростатикалық қосымша қосылуы болуы мүмкін, ол оның тізбектерінің бірнеше рет үзілуіне әкеледі. Сондықтан препарат тек пролиферациялаушы жасушаларды ғана емес, тыныштық күйіндегілерді де зақымдайды. Осылайша, митоксантрон тек фазоспецификалық ісікке қарсы препарат қана болып табылмайды, ол бәрінен бұрын G2 фазасындағы пролиферациялаушы жасушаларды зақымдайды, бұл РНҚ мөлшерінің көбеюі мен полиплоидияға әкеледі.

Митоксантрон бос радикалдарды баяу белсенділендіретін және бір мезгілде жасуша жарғақшаларын зақымдайтын липидтердің асқын тотығу үдерістерін тежеу қабілеті бар. Дәл осы механизм антрациклиндік антибиотиктермен салыстырғанда, препараттың анағұрлым төмен кардиоуыттылығына жауапты болып саналады.

Митоксантронның ісікке қарсы белсенділігімен қатар, вирусқа қарсы, протозойға қарсы және иммуномодуляциялаушы қасиеттері бар.

Қолданылуы

• метастаздары бар сүт безінің обырында

• ходжкиндік емес лимфомада

• ересектердегі лимфобласты емес жедел лейкозда (басқа химиотерапиялық дәрілерге төзімді)

• бауырдың алғашқы обырында

Қолдану тәсілі мен дозалары

Митолекті натрий хлоридінің 0,9 %  немесе глюкозаның 5 % ерітіндісімен сұйылтылғаннан кейін көктамырішілік инъекциялар арқылы 5 минуттан кем емес ұзақтықпен немесе қысқа мерзімді тамшылатып инфузиялау арқылы (15-30 минут) енгізуге болады. Есептелген дозасын жоғарыда көрсетілген инфузияға арналған ерітінділердің біреуінің 50-100 мл-де сұйылтқан жөн.

Препарат көктамыр маңында инфильтратталған жағдайда енгізуді дереу тоқтату және қажет болғанда инфузияны басқа көктамырда жалғастыру керек. Көктамыр маңына инъекциядан болған күшті жергілікті реакцияның (некроз) бірлі-жарым жағдайлары болғаны мәлімделген.

Препараттың дозасын түзетуді немесе жекелеген дозаларын енгізу аралықтарын ұлғайтуды үнемі науқастың жалпы жағдайына және жағымсыз әсерлердің айқындылық дәрежесіне қарай жүргізеді.

Дозалары әрбір емделушіге қатаң түрде жекелей тағайындалуы тиіс. Егер басқа ем тағайындалмаса, төменде келтірілген дозаларды қолдану ұсынылады.

Сүт безі обыры, ходжкиндік емес лимфомасы, бауырдың алғашқы обыры бар науқастарда көктамыр ішіне тағайындау.

Монотерапияда Митолектің алғашқы циклі кезіне ұсынылған бастапқы дозасы дене бетінің әр м2 шаққанда 14 мг құрайды. Бұл доза 21 күннен кейін қайталануы мүмкін.

Бұның алдында сәулемен емдеуден және/немесе химиялық емдеуден кейін сүйек кемігінің қоры төмендеген емделушілерге, сондай-ақ жалпы денсаулығы әлсіреген емделушілерге бастапқы дозаны 12 мг/м2 дейін немесе гематологиялық параметрлерге байланысты төмендеткен жөн.

Митолекті әр қайталап тағайындаған сайын дозасын, үнемі бұл емделушідегі ауру ағымының сипатын, сондай-ақ миелосупрессия дәрежесі мен ұзақтығын ескере отырып, таңдайды.

Әдетте төменде келтірілген бағдарлық ережелер басшылыққа алынады.

Егер препаратты енгізгеннен кейін 10-15 тәуліктен соң лейкоциттер мөлшері 1,5×109/л-ден көп, тромбоциттер мөлшері 50×109/л-ден көп, ал қалпына келу кезеңі 21 күн немесе одан көп болса, онда қан көрінісі қалпына келгеннен кейін бастапқы дозаны тағайындайды.

Егер препаратты алғаш енгізгеннен кейін лейкоциттер мен тромбоциттердің мөлшері көрсетілгендерден төмен болса, онда бастапқы дозасын 2-4 мг/м2 төмендетеді.

Митолекті басқа миелоуытты цитостатикалық дәрілермен біріктіргенде, Митолектің монотерапияда ұсынылған бастапқы дозасын дене бетінің әр м2 шаққанда 2-4 мг-ға азайтқан жөн. Келесі емдеу циклдерінде Митолектің дозасы да миелосупрессия ағымы немесе ұзақтығы мен дәрежесіне байланысты таңдалуы тиіс.

Жедел лимфобластты емес лейкозға шалдыққан науқастарға бастапқы емде ересектерге Митолекті 10-12 мг/м2 дозада бес күн бойы тағайындау ұсынылады (жиынтық дозасы 50-60 мг/м2 құрайды). Тәуліктік 12 мг/м2 дозаны бес күн қатарынан тағайындағанда ремиссияны өте жоғары деңгейге жеткізуге болады. Сонымен қатар, жоғары дозалар, егер емделушінің жағдайы мүмкіндік берсе ғана тағайындалуы мүмкін. Митолекті басқа цитостатикалық дәрілермен біріктіргенде емделушінің жағдайына байланысты дозасын өзгерту қажет болады. Мұны бастапқы курсты жүргізгенде де, сондай-ақ келесі емдеу курстары барысында да ескеру қажет.

Егер тіпті алғашқы кіріспе курс кезінде ауыр немесе науқастың өміріне қауіп төндіретін жағымсыз құбылыстар орын алса, екінші курсты тек бұл жағымсыз белгілер жойылғаннан кейін ғана бастау керек.

Қолдану ұзақтығы.

Жинақталған жиынтық дозасы дене бетінің әр м2 шаққанда 200 мг-ға жеткеннен кейін Митолекті тағайындауды кез келген жағдайда тоқтату керек.

Жағымсыз әсерлері

• сүйек кемігінің қан түзу қызметінің төмендеуі, лейкопения (лейкопения ең жоғары шегіне препаратты енгізгеннен кейін 10-14 күннен соң жетеді, дозаны енгізгеннен кейін 21-інші күні қан көрінісі қалпына келеді)

• жүректің қысқа мерзімдік айнуы және құсу

• қайтымды толық алопеция (шаш өсуінің қалпына келуі әдетте препаратты енгізуді тоқтатқаннан кейін басталады)

• ЭКГ-дағы уақытша өзгерістер, аритмия, сол жақ қарыншадан қан лықсытудың төмен фракциясы, жүрек қызметі жеткіліксіздігінің пайда болуы, миокард ишемиясы, кардиомиопатия

• несептің көк-жасыл түстерге боялуы

- бұған дейін антрациклиндермен немесе басқа да кардиоуытты онколитиктермен және/немесе медиастинальді сәулемен емдеуден өткен емделушілерде, сондай-ақ қатарласқан жүрек қантамыр аурулары бар емделушілерде жүрек-қантамырлық бұзылулар қаупі бар. Кардиомиопатия және анафилактикалық/ анафилактоидтық реакция жағдайларының (шокты қоса есептегенде) болғаны жөнінде мәлімделген.

Сирек

• ауыр тромбоцитопения, эритропения, анемия

Жекелеген жағдайларда

• стоматит, мукозит

• жоғары сезімталдық реакциялары (гиперергиялар) және дереу типті реакциялар (анафилаксиялар), соның ішінде терінің қышуы, бөртпе, есекжем, ентігу, артериялық қан қысымының төмендеуі, анафилактикалық шок

• тәбеттің болмауы, іштің төменгі жағының ауыруы, асқазан-ішектен қан кету, іштің қатуы, диарея

• шаршауды сезіну, әлсіздік

• аменорея

• дене температурасының жоғарылауы

• ентігу

• ұйқышылдық, сананың шатасуы, үрейлену және жеңіл парестезия, арқаның ауыруы, бас ауыру сияқты өзіне тән емес неврологиялық бұзылыстар

• бауыр ферменттері белсенділігі көрсеткіштерінің, сондай-ақ сарысудағы креатинин мен мочевина деңгейлерінің уақытша өзгеруі. Жедел лейкозы бар науқастарда кейде бауыр ферменттері белсенділігі көрсеткіштерінің ауыр патологиялық өзгерістері мен бауыр қызметінің төмендегені байқалуы мүмкін.

• митоксантрон ерітіндісін тері астына байқаусыз енгізуге байланысты болатын ауыр жергілікті реакциялар (некроз); флебит, эритема, ісіну, ауыру, инъекция жасаған жердің ашып ауыруы

• склералардың, көктамырлар мен көктамыр айналасы тінінің, сондай-ақ терінің, тырнақтардың қысқа мерзімдік көк түске боялуы, тырнақтардың дистрофиясы

• конъюнктивит

• интерстициальді пневмонит жағдайларының болғаны мәлімделген

• салдарлы жұқпалар

• гиперурикемия

• қанда креатинин және мочевина азоты концентрацияларының жоғарылауы

• гиперурикемиямен, гиперкалиемиямен, гиперфосфатемиямен және гиперкальциемиямен сипатталатын ісіктердің ыдырау синдромы

• салдарлық жедел миелоидты лейкемия.

Қолдануға болмайтын жағдайлар

• препараттың белсенді затына немесе қосымша компоненттеріне, басқа да антрациклиндерге жоғары сезімталдық

• панцитопения

• сүйек кемігі қызметінің айқын тежелуі

• ауыр манифесттік жұқпалар

• бауыр және/немесе бүйрек қызметінің ауыр жеткіліксіздігі

• жүктілік және лактация кезеңі

• балалар мен 18 жасқа дейінгі жасөспірімдер

Дәрілермен өзара әрекеттесуі

Ісікке қарсы басқа да дәрілерді немесе сәулемен емдеуді қолданып біріктірілген ем жүргізген кезде, препараттардың уытты әсерлерінің, атап айтқанда миелоуытты және кардиоуытты әсерінің күшейетінін ескерген жөн. Даунорубицин, доксорубицин немесе көкірек тұсын сәулелендіру кардиоуытты әсер ету қаупін арттырады. Митолекті инфузияға арналған ерітіндіде немесе еккіште басқа дәрілік препараттармен араластыруға болмайды.

Өзекшелік секрецияны бөгейтін препараттарды, соның ішінде подаграға қарсы урикозуриялық препараттарды (сульфинпиразон) бір мезгілде тағайындау нефропатияның пайда болу қаупін арттыруы мүмкін.

Айрықша нұсқаулар

Қолданған кездегі ерекше сақтандыру шаралары. Емдеуді, бір немесе бірнеше қауіп факторы бар науқастарда және Митолекті кардиоуытты цитостатикалық дәрілермен немесе басқа кардиоуытты дәрі-дәрмектермен біріктіргенде, жан-жақты бақылау жасай отырып (қажет болса препараттардың дозаларын түзетеді), сондай-ақ жүрек қызметіне жүйелі бақылау жасағанда әдеттегі әдістеме бойынша жүргізеді.

Сыртартқысында жүректің ауыр аурулары бар науқастарға, сондай-ақ бұрын антрациклиндермен емделген және/немесе көкірек тұсының сәулеленуі жүргізілген емделушілерге ерекше бақылау жүргізіледі.

Бала көтере алатын жастағы емделушілерге Митолекті қолдана отырып ем жүргізгенде, сондай-ақ осыдан кейін 6 ай бойы оларға ұрықтануға қарсы сенімді дәрілерді қолдану керек.

Қанның гематологиялық параметрлерін Митолекті әр қолданар алдында, сондай-ақ әр емдеу циклі кезінде кем дегенде бір рет тексеру қажет. Митолектің жалпы жиынтық дозасы дене бетінің әр м2 шаққанда 160 мг-нан астамға жеткеннен кейін (қауіпті топтағы емделушілер үшін – 140 мг/м2) тиісті әдістерді пайдалана отырып, жүрек қызметіне жүйелі түрде бақылау жасау қажет.

Емдеу басталғанға дейін, сондай-ақ оны жүргізгенде клиника-зертханалық параметрлерді, атап айтқанда, бауыр ферменттері белсенділігінің көрсеткіштерін бақылап отыру қажет. Бауыр және бүйрек функцияларының бұзылуы айқын, бронх демікпесі, жедел жұқпалы табиғаты вирустық (соның ішінде желшешек, белдемелі теміреткі), зеңдік немесе бактериялық (ауыр асқынулардың пайда болу және үдерістің таралу қаупі бар) аурулары, гиперурикемияның (подагра немесе уратты нефролитиаз) пайда болу қаупі жоғарылаған аурулары бар емделушілерге және бұрын антрациклиндер қабылдаған емделушілерге сақтықпен қолданылады.

ІІ топоизомераза тежегіштерін, митоксантронды қоса есептегенде, ісікке қарсы басқа препараттармен және/немесе рентген емімен біріктіріп қолдану жедел миелобластты лейкоздың (ЖМЛ) немесе миелодиспластикалық синдромның (МДС) пайда болуына әкеп соғуы мүмкін.

Митоксантронды тағайындаудың көктамыр ішіне енгізу жолынан басқа тәжірибесі жоқ. Интратекальді түрде қолданудың қауіпсіздігі анықталған жоқ.

Митоксантрон, иммунодепрессант бола тұрып, егер ол митоксантронмен емдеумен бірге жүргізілсе, вакцинацияға иммундық жауапты төмендетуі мүмкін.

Препаратты қабылдағаннан кейін 3 айдан 12 айға дейінгі аралықта иммунизациялаудан бас тарту қажет (егер оны дәрігер ұсынбаса); науқаспен бірге тұратын отбасының басқа мүшелеріне полиомиелитке қарсы пероральді вакцинамен иммунизациялаудан бас тарту керек (полиомиелитке қарсы вакцина алған адамдармен араласудан аулақ болу керек немесе ауыз бен мұрынды жауып тұратын қорғағыш бетперде кию керек).

Митолек ерітіндісіне гепаринді қосуға болмайды, өйткені шөгінді пайда болуы мүмкін. Тиаминмен фармацевтикалық тұрғыдан үйлеспейді.

Қауіпсіз қолдану мақсатында ерекше сақтандыру шаралары.

Митолекпен жұмыс жасағанда оны тері мен шырышты қабықтарға тигізіп алмау қажет (ол үшін қорғағыш қолғаптар мен көзілдірікті пайдалану керек). Препарат теріге немесе шырышты қабықтарға тиіп кетсе, оларды мол жылы сумен (бірақ ыстық емес) жуып-шаю қажет. Көздерді сумен барынша жуып-шаю керек. Қажет болса, офтальмологтан кеңес алған жөн. Ерітінді дайындағанда және ластанған материалды жойғанда, сондай-ақ заттарды (мысалы, санитарлық ыдысты) залалсыздандырғанда әрдайым қорғағыш қолғаптар мен көзілдіріктерді пайдалану керек. Құрамында Митолек бар ерітінділермен жанасқан заттарды судың 13 бөлігіндегі кальций гипохлоритінің 5,5 салмақтық мөлшері бар суспензияның көмегімен тазалауға болады. Оларды жуып-шаю үшін судың мол мөлшерін пайдалану қажет. Ішінен гипохлориттің көмегімен залалсыздандырылған заттарды сұйылтылған сірке қышқылымен тазалап, артынан сумен шайылғаннан кейін ғана Митолек ерітінділеріне арналған контейнерлер ретінде пайдалануға болады.

Дәрілік заттың көлік құралын немесе қауіпті механизмдерді басқару қабілетіне ықпал ету ерекшеліктері

Митолекті қолдану көлік құралын немесе қауіпті механизмдерді басқару қабілетіне ықпалын тигізбейді, алайда жағымсыз әсерлердің патология ерекшелігі мен ауырлығын ескере отырып, препаратты тек стационар жағдайында, қатаң түрде медицина қызметкерінің қадағалауымен жүргізу көзделеді.

Артық дозалануы

Симптомдары: Митолектің жедел және созылмалы артық дозалануында, ол тудыратын жағымсыз әсерлер күшейеді.

Жедел немесе созылмалы уланудың кейінгі көрінісі ауырлық дәрежесі әртүрлі сүйек кемігі қызметінің некроздық баспамен, күрделі тромбоцитопениямен бірге агранулоцитоздың пайда болуына дейін бәсеңдеуімен сипатталады. Сондай-ақ ауыз қуысы мен асқазан-ішек жолында ойық жаралар, көлемді қан кетумен, іш өтуімен және бауыр мен бүйректің уытты зақымдануының тұрақты белгілерімен бірге жүретін геморрагиялық энтероколит пайда болуы мүмкін.

Жедел лейкоздары бар науқастарда айқын стоматиттер пайда болуы мүмкін.

Мұндайда алдын алу және емдеудің тиісті шараларын жүргізу керек.

Жекелеген жағдайларда ауырлық дәрежесі әртүрлі жедел кардиальді симптомдар болуы мүмкін.

Емдеу: Митолектің арнайы у қайтарғысы белгісіз. Қан плазмасынан тез шығарылуына, тіндермен ұқсастығының жоғарылауына байланысты Митолекті организмнен диализдің көмегімен шығаруға болмайды.

Артық дозалану себептерін анықтағанда антибиотиктерді қолдана отырып, жұқпалардың алдын алуды бастау қажет. Агранулоцитоз бен тромбоцитопенияны жою үшін ажыратылмаған қанды, лейко- немесе тромбомассаларды құюға болады. Стационар жағдайында организмнің өмірлік маңызы бар қызметтерін демеуге бағытталған жалпыға бірдей шаралар жүргізіледі (сұйықтық пен электролиттер теңгерімін қалпына келтіру, бауыр мен бүйрек қызметтерін бақылау, жүрек-қантамыр жүйесін қатаң қадағалау, кандидоздың алдын алу және т.б.).

Шығарылу түрі мен қаптамасы

Алюминий қалпақшасы немесе алюминий мен пластмассадан жасалған біріктірілген қалпақшасы бар резеңке тығынмен тығындалған 1-ші гидролитикалық класқа жататын шыны құтыларда 10 мл немесе 5 мл препараттан.

1 құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Үлбірге 10 пәшкеден қаптауға болады.

Сақтау шарттары

Жарықтан қорғалған жерде, 25°С-ден аспайтын температурада сақтау

керек.

Балалардың қолы жетпейтін жерде сақтау керек. Мұздатып қатыруға болмайды!

Сақтау мерзімі

2,5 жыл

Жарамдылық мерзімі өткеннен кейін пайдалануға болмайды

Дәріханадан босатылу шарттары

Рецепт арқылы

Өндіруші

«Фармстандарт-Биолек» ЖАҚ

Померки, Харьков қ-сы, Украина, 61070

Тіркеу куәлігінің иесі

«Фармстандарт-Биолек» ЖАҚ, Украина

Қазақстан Республикасы аумағында тұтынушылардан өнім сапасы жөнінде шағымдарды қабылдайтын ұйымның мекенжайы

«Қарағанды фармацевтикалық кешені» ЖШС

100009, Қазақстан Республикасы, Қарағанды қ., Ботаникалық к-сі, 12 үй

Тел.: + 7 (7212) 507322; e-mail: kphk@kphk.kz