Меропенем - Элеас

• русский
• қазақша

• Скачать инструкцию медикамента

Саудалық атауы

Меропенем - Элеас

Халықаралық патенттелмеген атауы

Меропенем

Дәрілік түрі

Инъекция үшін ерітінді дайындауға арналған 1.0 г ұнтақ

Құрамы

Бір құтының ішінде

меропенем тригидраты мен натрий карбонатының стерильді қоспасы, оның ішінде:

белсенді зат – 1.0 г меропенем тригидраты (сусыз меропенемге баламалы)

қосымша зат – 0.220 г натрий карбонаты (натрийге баламалы).

Сипаттамасы

Ақ немесе сарғыш реңді ақ түсті кристалл ұнтақ.

Фармакотерапиялық тобы

Бактерияларға қарсы жүйелік қолдануға арналған препараттар.

Бактерияларға қарсы басқа да бета-лактамды препараттар. Карбапенемдер. Меропенем.

АТХ коды J01DH02

Фармакологиялық қасиеттері

Фармакокинетикасы

Меропенемді көктамыр ішіне 30 минут бойы енгізген кезде қан плазмасындағы ең жоғары концентрациясы 250 мг дозада шамамен 11 мкг/мл-ге, 500 мг дозада 23 мкг/мл-ге және 1 г дозада 49 мкг/мл-ге тең болады.

Алайда енгізілетін дозада ең жоғары шектегі концентрациясына (Cmax) және «концентрация-уақыт» қисығы астындағы ауданына (AUC) қатысты абсолютті фармакокинетикалық пропорционалды тәуелділігі жоқ. 250 мг-ден 2 г-ге дейінгі дозаларда плазмалық клиренстің минутына 287 мл-ден 205 мл-ге дейін азайғаны білінді.

Меропенеммен 5 минут бойы көктамырішілік болюсті инъекция жасағанда плазмада препараттың ең жоғары концентрациясы 500 мг дозада 52 мкг/мл-ге және 1 г дозада 112 мкг/мл-ге тең болады.

Қан плазмасындағы ең жоғары шектегі концентрациялары 1 г препаратты көктамыр ішіне 2 минут, 3 минут және 5 минут бойы енгізген кезде, тиісінше, 110, 91 және 94 мкг/мл құрады. Көктамыр ішіне 500 мг енгізгеннен кейін 6 сағаттан соң қан плазмасында меропенем деңгейі 1 мкг/мл және одан төмен мәнге дейін төмендейді.

Бүйрек функциясы қалыпты пациенттерге меропенемді 8 сағат аралықпен көп рет енгізген кезде препараттың жиналып қалуы байқалған жоқ. Бүйрек функциясы қалыпты пациенттерде жартылай шығарылу кезеңі шамамен 1 сағатты құрайды.

Плазма ақуыздарымен байланысуы – шамамен 2%.

Меропенемнің көктамыр ішіне енгізілген дозасының 70%-ға жуығы 12 сағаттың ішінде несеппен бірге өзгермеген күйінде шығарылады, содан кейін несеппен бірге аздаған экскрециясы анықталды. Меропенемнің несептегі 10 мкг/мл-ден асатын концентрациялары 500 мг дозаны енгізгеннен кейін 5 сағат бойы сақталады. Бауыр функциясы сақталған жағдайда, әрбір 8 сағат сайын 500 мг немесе әрбір 6 сағат сайын 1 г енгізу тәртібінде қан плазмасында және несепте меропенемнің жиналып қалуы байқалған жоқ.

Меропенемнің жалғыз метаболиті микробиологиялық тұрғыдан белсенді емес.

Меропенем организмнің көптеген тіндеріне және сұйықтықтарына, емшек сүтіне, бактериялық менингиті бар науқастарда жұлын-ми сұйықтығына жақсы еніп, көптеген бактерияларды басу үшін қажет етілетін шамадан да жоғары концентрацияларға жетеді.

Балалардағы және ересектердегі фармакокинетикасында аздаған айырмашылық бар. Меропенемнің жартылай шығарылу кезеңі 2 жасқа дейінгі балаларда – шамамен 1,5 - 2,3 сағат, дене салмағының әр кг-ге шаққанда 10 - 40 мг дозалар аралығында фармакокинетикалық параметрлерінде дозаға байланысты тәуелділік байқалады.

Бүйрек жеткіліксіздігі

Бүйрек жеткіліксіздігі бар пациенттерде меропенемнің клиренсі креатинин клиренсімен өзара байланысты. Мұндай науқастарда дозаны түзету қажет.

Егде жастағы адамдарда меропенем клиренсінің төмендегені байқалды, ол креатинин клиренсінің жастың ұлғаюына қарай төмендеуімен өзара байланысты болды.

Бауыр жеткіліксіздігі

Бауыр ауруы бар пациенттердегі фармакокинетикасын зерттеу осы патологиялық өзгерулердің меропенемнің фармакокинетикасына ықпалын тигізбейтіндігін көрсетті.

Фармакодинамикасы

Меропенем – карбапенемдер класына жататын антибиотик, парeнтеральді түрде қолдануға арналған, адамның дегидропептидазасына-1 (ДГП-1) біршама төзімді, ДГП-1 тежегішін қосымша енгізуді қажет етпейді.

Меропенем бактериялардың жасушалық қабырғасының синтезіне әсер етуі есебінен бактерицидтік әсер береді. Меропенемнің аэробтық және анаэробтық бактерияларының кең ауқымына қарсы бактерицидтік әсер етуі меропенемнің бактериялардың жасушалық қабырғасы арқылы өту қабілетінің жоғарылығымен, көптеген -лактамазаларға тұрақтылығының жоғары деңгейде болуымен және пенициллинді байланыстыратын ақуыздарға (ПБА) елеулі аффинділігімен түсіндіріледі. Ең төмен бактерицидтік концентрациялар (ЕТБК) әдетте ең төмен тежегіш концентрациялардағыдай (ЕТТК) болады. Тестіленген бактериялар түрлерінің 76%-да ЕТБК/ЕТТК арақатынасы 2 немесе одан аз болды.

Меропенем қоздырғыштардың сезімталдығын анықтау тестілерінде тұрақты, әртүрлі антибиотиктермен синергиялық әсер береді. In vitro және in vivo тестілерінде меропенемнің постантибиотиктік әсері бар екендігі білінді.

Меропенемге ұсынылған жалғыз ғана сезімталдық критерийі препараттың фармакокинетикасына және клиникалық пен микробиологиялық деректерінің – тиісті қоздырғыштарға анықталатын аймағының диаметрі мен ЕТТК-нің өзара байланыстылығына негізделеді.

Препараттың төменде көрсетілген патогендерге қатысты тиімділігі клиникалық қолдану тәжірибесімен және бактерияларға қарсы ем жүргізу жөніндегі нұсқауларымен айғақталды.

Меропенемге сезімтал патогендер:

Грамоң аэробтар:

Enterococcus faecalis1, Staphylococcus aureus (метициллин-сезімтал)2, Staphylococcus штаммдары (метициллин-сезімтал), Staphylococcus epidermidis қоса; Streptococcus agalactiae B тобы, Streptococcus milleri тобы (S. anginosus, S. constellatus, and S. intermedius), Streptococcus pneumonia, Streptococcus pyogenes A тобы, Citrobacter freudii

Грамтеріс аэробтар:

Citrobacter koseri, Enterobacter aerogenes, Enterobacter cloacae, Escherichia coli, Haemophilus influenza, Klebsiella oxytoca, Klebsiella pneumonia, Morganella morganii, Neisseria meningitides, Proteus mirabilis, Proteus vulgaris, Serratia marcescens, Clostridium perfringens

Грамоң анаэробтар:

Peptoniphilus asaccharolyticus, Peptostreptococcus штаммдары (P. micros, P anaerobius, P. magnus қоса), Bacteroides caccae

Грамтеріс анаэробтар:

Bacteroides fragilis, Prevotella bivia, Prevotella disiens

Жүре келе пайда болған резистенттілік мәселесі өзекті болатын патогендер:

Enterococcus faecium1,3

Грамоң аэробтар:

Acinetobacter штаммдары

Грамтеріс аэробтар:

Burkholderia cepacia, Pseudomonas aeruginosa

Табиғи резистентілігі бар патогендер:

Stenotrophomonas maltophilia, Legionella spp., Chlamydophila pneumoniae

Басқа да қоздырғыштар:

Chlamydophila psittaci, Coxiella burnetii, Mycoplasma pneumoniae

1: аралық сезімталдығы бар қоздырғыштар;

2: барлық метициллин-төзімді стафилококктар меропенемге төзімді;

3: ЕО бір немесе бірнеше елдерінде резистентілік деңгейі ≥ 50% құрайды

Қолданылуы

Көктамыр ішіне енгізуге арналған меропенем балалар (3 айлықтан асқан) мен ересектерде меропенемге сезімтал бір немесе бірнеше қоздырғыштар туындатқан келесі инфекцияларды емдеу үшін қолданылады:

- пневмонияда, оның ішінде ауруханаішілік

- несеп шығару жүйесінің асқынған инфекцияларында

- құрсақ қуысының асқынған инфекцияларында

- гинекологиялық инфекцияларда, соның ішінде эндометритте, кіші жамбас ағзаларының қабыну ауруларында

- терінің және жұмсақ тіннің асқынған инфекцияларында

- жедел бактериялық менингитте

- ересек пациенттерде фебрильді нейтропения симптомдары бар инфекцияға күдіктенгенде монотерапия түрінде немесе вирусқа қарсы немесе зеңге қарсы дәрілермен біріктіріп эмпириялық емдеуде.

Қолдану тәсілі және дозалары

Ересектер

Дозасы және емдеу ұзақтығы инфекциялардың түрі мен ауырлығына және пациенттің жағдайына байланысты белгіленуі тиіс.

Келесі тәуліктік дозалар ұсынылады:

пневмонияны, несеп шығару жолдарының инфекцияларын, эндометрит сияқты гинекологиялық инфекцияларды, тері мен жұмсақ тін инфекцияларын емдеген кезде: көктамыр ішіне әрбір 8 сағат сайын 500 мг – 1 г;

ауруханалық пневмонияны, перитонитті емдегенде, нейтропения симптомдары бар науқастарда бактериялық инфекцияларға күдіктенгенде – көктамыр ішіне әрбір 8 сағат сайын 1 г.

Менингитті емдеген кезде ұсынылатын доза әрбір 8 сағат сайын 2 г құрайды.

2 г дозаны болюсті инъекция түрінде қабылдаудың қауіпсіздігі жеткіліксіз зерттелген.

Бүйрек функциясы бұзылған ересек пациенттердегі дозасы

Креатинин клиренсі минутына 51 мл-ден төмен болатын пациенттерде ұсынылатын доза келесі үлгіде азайтылуы тиіс:

Меропенем гемодиализ кезінде шығарылады. Перитонеальді диализ жасалатын науқастарға меропенемді қолдану тәжірибесі жоқ.

Бауыр жеткіліксіздігі бар науқастарда дозаны түзетуге қажеттілік жоқ («Айрықша нұсқаулар» бөлімін қараңыз).

Бүйрек функциясы қалыпты немесе креатинин клиренсі минутына 50 мл-ден асатын егде жастағы науқастарда дозаны түзету қажет емес.

Балалар

3 айлықтан 11 жасқа дейінгі балалар үшін көктамыр ішіне енгізу үшін ұсынылатын доза, инфекцияның типі мен ауырлығына, патогенді микроорганизмдердің сезімталдығы мен пациенттің жағдайына байланысты, әрбір 8 сағат сайын қабылданатын 10 - 20 мг/кг құрайды.

Менингитте ұсынылатын доза әрбір 8 сағат сайын 40 мг/кг құрайды.

40 мг/кг дозаны болюсті инъекция түрінде қабылдаудың қауіпсіздігі жеткілікті зерттелген жоқ.

Дене салмағы 50 кг-ден асатын балаларға ересектерге арналған дозаны пайдаланған жөн.

Меропенемді бүйрек функциясы бұзылған балаларға қолдану тәжірибесі жоқ.

Енгізу әдісі

Сұйылту үшін тиісті инфузиялық сұйықтықтарды пайдалана отырып, көктамыр ішіне енгізуге арналған меропенем кем дегенде 5 минут бойы көктамырішілік болюсті инъекциялар түрінде, немесе 15-30 минут бойы көктамырішілік инфузия түрінде енгізілуі мүмкін.

Көктамырішілік болюсті инъекция үшін меропенемді инъекцияға арналған стерильді сумен (250 мг меропенемге 5 мл су) сұйылтқан жөн, мұндайда ерітіндінің концентрациясы 50 мг/мл-ге жуықты құрайды; алынған ерітінді мөлдір түссіз немесе ақшыл-сары сұйықтық болады.

Көктамырішілік инфузия үшін меропенемді 0,9% натрий хлоридінің ерітіндісінде немесе 5% глюкоза ерітіндісінде соңғы концентрация 1-20 мг/мл болғанға дейін сұйылтқан жөн.

Микробиологиялық көзқарас тұрғысынан инфузия үшін 0,9% натрий хлориді ерітіндісі пайдаланылатын меропенем ерітіндісі, препаратты ашу/қалпына келтіру/сұйылту әдістері микробпен ластану қаупін жоққа шығармаған жағдайда, дереу пайдаланылуы тиіс. Егер дайын ерітінді бірден пайдаланылмаса, онда сақтау шарттары мен ұзақтығына жауапкершілік тұтынушының мойнында болады. Меропенемнің 5% глюкозада қалпына келтірілген ерітіндісі дереу пайдаланылуы тиіс.

Меропенемді сұйылтқан кезде асептиканың стандартты режимін сақтаған жөн. Сұйылтылған ерітіндіні пайдаланар алдында сілкілеп алу қажет. Парентеральді түрде енгізуге арналған ерітіндіні қолданар алдында, онда қатты бөлшектердің бар-жоқтығын және түсінің өзгерген-өзгермегендігін көзбен тексерген жөн.

Барлық құтылар тек бір рет қолдануға арналған.

Меропенем-Элеас басқа препараттармен араластырылмауы немесе оларға қосылмауы тиіс. Ерітінді мұздатып қатырылмауы тиіс.

Жағымсыз әсерлері

Жиі

- тромбоцитемия

- бас ауыру, бас айналу, ұйқысыздық немесе ұйқышылдық

- анорексия, іштің ауыруы, жүректің айнуы, құсу, іш өту, жалған жарғақшалы колит

- трансаминазалар, сілтілік фосфатаза, лактатдегидрогеназа белсенділігінің жоғарылауы, сарғаю, холестаздық гепатит

- тері бөртпелері, қышыну

Жиі емес

- қынаптық кандидоз және ауыз қуысының шырышты қабығының кандидозы

- эозинофилия, тромбоцитопения, лейкопения, нейтропения

- парестезиялар

- гипербилирубинемия

- есекжем

- гиперкреатининемия, плазмада мочевина концентрациясының жоғарылауы

- флебит, тромбофлебит

- оң тікелей немесе тікелей емес Кумбс сынамасы, ішінара тромбопластинді уақыттың төмендеуі, гемоглобин, гематокрит деңгейлерінің төмендеуі, гемолиздік анемия

Сирек

- жоғары қозғыштық, үрейленушілік, мазасыздық, сананың бұзылуы, депрессия, елестеулер, құрысулар, эпилепсия түріндегі ұстамалар

- жүрек жеткіліксіздігінің пайда болуы немесе өршуі, жүректің тоқтап қалуы, тахикардия немесе брадикардия, артериялық қысымның төмендеуі немесе жоғарылауы, синкопальді жағдай, миокард инфарктісі, өкпе артериялары тарамдарының тромбоэмболиясы, диспноэ

- дизурия, ісінулер, гиперволемия, гипокалиемия, гематурия

Жиілігі белгісіз

- енгізілген жердің ауыруы және гиперемиясы

- көп формалы экссудативті эритема, Стивенс-Джонсон синдромы, уытты эпидермальді некролиз, ангионевроздық ісіну, анафилаксиялық шок

- агранулоцитоз

Қолдануға болмайтын жағдайлар

- меропенемге немесе карбапенемдер тобының басқа препараттарына аса жоғары сезімталдық

- басқа бета-лактамдық антибиотиктерге (пенициллиндерге немесе цефалоспориндерге) аса жоғары сезімталдық (анафилаксиялық реакциялар, ауыр тері реакциялары)

- 3 айлыққа дейінгі емшек жасындағы балалар

Дәрілермен өзара әрекеттесуі

Пробенецид белсенді өзекшелі секреция үшін, бүйректік экскрецияны тежей және меропенемнің плазмадағы концентрациялары мен жартылай шығарылу кезеңін арттыра отырып, меропенеммен бәсекелеседі. Пробенецидті меропенеммен бірге енгізуге болмайды.

Ганцикловир құрысудың пайда болу қаупін арттырады.

Меропенемнің басқа препараттардың қан плазмасы ақуыздарымен байланысуына ықтимал әсері зерттелген жоқ. Меропенемнің ақуыздармен байланысуы төмен, сондықтан олардың плазма ақуыздарымен байланысынан ығыстырып шығарылуына негізделген басқа препараттармен өзара әрекеттесуі болмауы тиіс деп болжам жасалады. Меропенем қан сарысуында вальпрой қышқылының деңгейін азайтуы мүмкін, бұл құрысуға қарсы әсерінің төмендеуіне әкелуі мүмкін. Антибиотиктерді варфаринмен бір мезгілде қолдану варфариннің антикоагуляциялық әсерін арттыруы мүмкін. Антибиотиктерді және пероральді антикоагулянттарды бірге қолдану кезінде және қолданғаннан кейін көп кешікпей ХҚҚ (халықаралық қалыптасқан қатынасты) жиі бақылау керек. Алайда ықтимал дәрілік өзара әрекеттесулер жөнінде ерекше деректер жоқ. Өзекшелік секрецияны бөгейтін дәрілік заттар меропенемнің шығарылуын баяулатады және оның қан плазмасындағы концентрациясын арттырады. Меропенемді басқа препараттарды қабылдау кезінде қолдану жағымсыз фармакологиялық өзара әрекеттесулердің пайда болуымен қатар жүрген жоқ.

Айрықша нұсқаулар

Меропенем-Элеасты монотерапия ретінде қолданғанда, басқа антибиотиктерді қолданған кездегідей, төменгі тыныс жолдарының Pseudomonas aeruginosa-дан болған инфекциялары анықталған қиын жағдайда немесе оған күдіктенген кезде пациенттердің осы антибиотикке сезімталдығына тестіні жүйелі жүргізу және қолданған кезде сақ болу керек.

Сирек жағдайларда Меропенем-Элеасты қолданған кезде, барлық дерлік антибиотиктерді қолданған кездегідей, жалған жарғақшалы колиттің пайда болғаны байқалады, ол ауырлығы бойынша жеңілден өмірге қауіп төндіретін түрге дейін өзгеруі мүмкін. Меропенем-Элеасты қабылдау аясында диарея пайда болған жағдайда жалған жарғақшалы колит пайда болуы мүмкін екендігін ескеру қажет. Зерттеулер Clostridium difficile өндіретін уыт антибиотиктерді қолданумен байланысты колиттердің пайда болуының негізгі себепшісінің бірі болып табылатындығын көрсетсе де, оның басқа да себептерінің болатындығын ескеру қажет.

Басқа карбапенемдер мен бета-лактамды антибиотиктер, пенициллиндер мен цефалоспориндер арасында айқаспалы аллергенділіктің клиникалық және зертханалық белгілері бар. Басқа да бета-лактамды антибиотиктер сияқты, меропенемді пайдаланған кезде аса жоғары сезімталдық реакциялары жөнінде (оның ішінде өліммен аяқталған) сирек мәлімдемелер бар.

Меропенеммен емдеуді бастар алдында, анамнезінде бета-лактамды антибиотиктерге аса жоғары сезімталдық реакциялардың бар-жоқтығына ерекше көңіл бөле отырып, пациентті мұқият сұрастыру қажет. Анамнезінде осындай құбылыстар көрсетілген пациенттерге Меропенем-Элеас абайлап қолданылуы тиіс. Егер меропенемге аллергиялық реакция пайда болса, онда препаратты енгізуді тоқтату және тиісті шаралар қабылдау қажет.

Меропенем-Элеасты бауыр аурулары бар пациенттерге қолдану, гепатоуыттылықтың (холестазбен және цитолизбен бауыр дисфункциясы) пайда болу қаупіне байланысты, трансаминазалар мен билирубин деңгейлерін мұқият бақылай отырып жүргізілуі тиіс.

Басқа антибиотиктерді қолданған жағдайдағыдай, сезімтал емес микроорганизмдердің өсуі басым болуы мүмкін, осыған байланысты пациентті ұдайы бақылауға алу қажет.

Метициллин-резистенті стафиллококктан болған инфекцияларда препаратты қолданбау керек.

Препаратты қолдану кезінде құрысулар пайда болуы мүмкін.

Меропенем-Элеас пен вальпрой қышқылының препараттарын бірге қолдануға болмайды.

Потенциальді нефроуытты препараттармен бір мезгілде қолданғанда сақтықпен тағайындау керек. Асқазан-ішек жолы тарапынан (диарея) шағымдары бар, әсіресе колиттерден зардап шегіп жүрген пациенттерге қолданған кезде сақ болған жөн.

Жүктілікте және лактация кезеңінде қолданылуы

Жүктілік

Препаратты жүктілік кезінде әйелдерге қолданудың қауіпсіздігі зерттелген жоқ. Жануарларға жүргізілген зерттеулер дамып жатқан ұрыққа қандай да болсын жағымсыз әсерлерді көрсеткен жоқ. Меропенем-Элеас жүктілік кезінде, оны қолданудың ана үшін әлеуетті артықшылығы шарана үшін ықтимал қауіптен басым болатын жағдайларды қоспағанда, қолданылмауы тиіс. Әрбір жағдайда препарат дәрігердің қатаң бақылауымен қолданылуы тиіс.

Лактация

Меропенем жануарлардың емшек сүтінде өте төмен концентрацияларда анықталады. Меропенем-Элеас емшек емізу кезеңінде, ана үшін препаратты қолдану үшін әлеуетті артықшылығы нәресте үшін ықтимал қаупінен басым болатын жағдайларды қоспағанда, қолданылмауы тиіс.

Ана үшін артықшылықтарына баға бере отырып, емшек емізуді тоқтату немесе Меропенем-Элеасты қабылдауды тоқтату жөнінде шешім қабылдаған жөн.

Педиатрияда қолданылуы

3 айлыққа дейінгі балаларда препараттың тиімділігі мен жағымдылығына баға берілген жоқ, осыған байланысты препаратты осы жастағы балаларға қолдануға болмайды. Препаратты бауыр және бүйрек функциясы бұзылған балаларға қолдану тәжірибесі жоқ. Препаратты педиатриялық іс-тәжірибеде нейтропениясы немесе алғашқы немесе салдарлық иммун тапшылығы бар пациенттерге қолдану тәжірибесі жоқ.

Дәрілік заттың көлік құралын немесе қауіпті механизмдерді басқару қабілетіне ықпал ету ерекшеліктері

Препараттың жағымсыз әсерлерін (бас ауыру, парестезия және құрысулар) ескеріп, көлікті немесе қауіпті механизмдерді басқарған кезде сақ болған жөн.

Артық дозалануы

Симптомдары: емдеу кезінде, әсіресе бүйрек функциясы бұзылған пациенттерде байқамай артық дозалануы мүмкін.

Емі: симптоматикалық. Бүйрек функциясы бұзылған пациенттерде гемодиализ меропенемді және оның метаболиттерін тиімді түрде жояды.

Шығарылу түрі және қаптамасы

Резеңке тығынмен тығындалған алюминий қалпақшамен қаусырылған және қорғағыш пластмасса қалпақшамен жабылған немесе қорғағыш пластмасса қалпақшасыз алюминий қалпақшамен қаусырылған, сыйымдылығы 20 мл, 30 мл, мөлдір шыны құтыларға 1.0 г-ден салынған. Бір құтыдан медициналық қолдану жөнінде мемлекеттік және орыс тілдеріндегі нұсқаулықпен бірге картон қорапқа салынған.

Картон қорапқа 40 құтыдан қапталған.

Сақтау шарттары

Құрғақ, жарықтан қорғалған жерде, 25 0С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

«Элеас» ӨФК» ЖШС, Қазақстан Республикасы

Тіркеу куәлігінің иесі

«Элеас» ӨФК» ЖШС, Қазақстан Республикасы,

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«Элеас» ӨФК» ЖШС, 040707, Қазақстан Республикасы, Алматы облысы, Іле ауданы, Боралдай кенті, тел. 8(727)3980430, факс. 8(727)3711900, e-mail: pfkeleas@gmail.com