Левомицетин (500 мг)

• русский
• қазақша

• Скачать инструкцию медикамента

Саудалық атауы

Левомицетин

Халықаралық патенттелмеген атауы

Хлорамфеникол

Дәрілік түрі

500 мг таблеткалар

Құрамы

Бір таблетканың құрамында

белсенді зат - хлорамфеникол 500,0 мг,

қосымша заттар: микрокристалды целлюлоза, натрий крахмалының гликоляты, гидроксипропилметилцеллюлоза, кальций стеараты.

Сипаттамасы

Ақ немесе әлсіз сарғыш реңді ақ түсті таблеткалар. Таблеткалардың бір жағында ойығы мен сызығы, екінші жағында ойығы және крест түріндегі фирмалық логотипі бар.

Фармакотерапиялық тобы

Жүйелі пайдалануға арналған бактерияға қарсы препараттар. Амфениколдар.

АТЖ коды J01BA01

Фармакологиялық қасиеттері

Фармакокинетикасы

Ішке қабылдағаннан кейін левомицетин асқазан-ішек жолынан жылдам және толық сіңіріледі. Биожетімділігі 80% құрайды. Қандағы ең жоғары концентрациясына 2-3 сағаттан кейін жетеді, қабылдағаннан кейін қандағы емдік концентрациясы 4-5 сағат бойы сақталады. Органдарға, тіндер мен ағза сұйықтықтарына өтеді, гематоэнцефалдық бөгет арқылы өтеді, жұлын сұйықтығына жақсы өтеді (қандағы құрамының 50 % дейін). Препарат плацента арқылы өтеді, ана сүтінен табылады. Препаратты ішке қабылдағанда емдік концентрациясы шыны тәрізді денеде, мөлдір қабықта, нұрлы қабықта, көздің сулы ылғалында (препарат көз бұршағына өтпейді) анықталады. Плазма ақуыздарымен байланысуы 50-60% құрайды. Бауырда метаболизденеді. Жартылай шығарылу кезеңі 1,5-3,5 сағат құрайды. Негізінен несеппен (басты түрде белсенді емес метаболиттер түрінде), ішінара - өтпен және нәжіспен шығарылады. Ішек бактериялары әсерімен ішекте белсенді емес метаболиттер түзе отырып гидролизденеді.

Фармакодинамикасы

Левомицетин – әсер ету ауқымы кең антибиотик. Ол көптеген грамоң және грамтеріс бактерияларға (іріңді жұқпа, іш сүзегі, дизентерия, менингококкты жұқпа қоздырғыштарына, гемофильді бактерияларға, бруцеллаларға және т.б.), риккетсияларға, хламидийларға, спирохеттарға қатысты тиімді. Пенициллинге, стрептомицинге, сульфаниламидтерге төзімді бактерия штаммдарына әсер етеді. Препараттың қышқылға төзімді бактерияларға, көкшіл іріңді таяқшаға, клостридия және қарапайымдыларға қатысты белсенділігі әлсіз. Микроорганизмдердің жасушаларында ақуыз синтезін бұзады. Емдік концентрацияларында бактериостатикалық әсер етеді. Микроорганизмдердің препаратқа төзімділігі салыстырмалы түрде баяу дамиды және әдетте сонымен бірге басқа да химиотерапиялық дәрілерге айқаспалы төзімділік туындамайды.

Қолданылуы

• левомицетинге сезімтал микроорганизмдерден туындаған жұқпалы-қабынбалы ауруларда, оның ішінде: іш сүзегі, паратиф, дизентерия, сальмонеллездің жайылған түрі, бруцеллез, туляремия, көк жөтел, бөртпе сүзек және басқа риккетсиоздар

• менингитте

• ми абсцесінде

• пневмонияда

• сепсисте

• остеомиелитте

• кіші жамбас мүшелерінің жұқпаларында

• хламидиозда

Левомицетиннің әсеріне сезімтал қоздырғыштар тудырған өзге де этиологиядағы инфекциялық үдерістерде, препарат басқа химиотерапиялық дәрілер тиімсіз болған жағдайда көрсетілімде.

Қолдану тәсілі және дозалары

Ішке, тамақтан 30 минут бұрын (жүрек айнуы немесе құсу жағдайында – тамақтан кейін бір сағат өткен соң).

Ересектер үшін бір реттік доза 250-500 мг (1/2-1таб.), тәуліктік - 2 г (4 таб.). Ерекше ауыр жағдайларда (іш сүзегі, перитонит және басқалары) препаратты тәулігіне 4 г дейінгі дозада (8 таб.) тағайындауға болады.

Ересектер үшін ең жоғары тәуліктік доза - 4 г (дәрігердің қатаң бақылауында және қан жағдайы мен бүйрек қызметін бақылай отырып).

Қолдану дүркіндігі тәулігіне 3-4 рет.

Балаларда қолданылуы

6-8 жастағы балалар үшін бір реттік доза - 125 мг (1/4 таб.);

8 жастан асқандарға - 250 мг (1/2 таб.).

Балаларға әдетте күніне 3-4 рет тағайындайды.

Емдеу курсы 7-10 күнді құрайды.

Жағымсыз әсерлері

- лейкопения, тромбоцитопения, ретикулоцитопения,

қандағы гемоглобин деңгейінің азаюы,

бастапқы эритроцитарлық пішіннің цитоплазматикалық вакуолизациясы, агранулоцитоз, апластикалық анемия

-жүрек айнуы, құсу, диарея, метеоризм, шырышты қабықтың тітіркенуі,

ішек микрофлорасының бәсеңдеуі, дисбактериоз, салдарлы зеңдік жұқпа

- глоссит, стоматит

Сирек

- шеткергі неврит, көру жүйкесінің невриті, көру өткірлігінің және есту қабілетінің төмендеуі

-бас ауыруы, депрессия, сананың шатасуы, делирий, көру және есту

галлюцинациялары, көз алмасының салдануы, дәм сезудің бұзылуы

-тері бөртпесі, есекжем, қызба, ангионевротикалық ісіну

- салдарлы жұқпа дамуы, бактериолиз реакциясының болуы мүмкін

(Яриш-Герксгеймер реакциясы)

Жекелеген жағдайларда

- бауырдың зақымдануы, супержұқпа

- Квинке ісінуі, анафилаксия

Қолдануға болмайтын жағдайлар

- хлорамфениколға, басқа да амфениколдарға және/немесе препараттың басқа да компоненттеріне жоғары сезімталдық

- қан түзілуінің бәсеңдеуі, қан ауруы

- бауыр және/немесе бүйрек қызметінің айқын бұзылуы

- глюкозо-6-фосфатдегидрогеназа ферменттерінің тапшылығы

- тері аурулары (псориаз, экзема,зең аурулары)

- порфирия

- 6 жасқа дейінгі балалық жас

-жүктілік, лактация кезеңі

Дәрілермен өзара әрекеттесуі

Левомицетинді қан түзілуін бәсеңдететін препараттармен (сульфаниламидтер, пиразолон туындылары, цитостатиктер), сондай-ақ сәуле терапиясымен қоса тағайындауға болмайды.

Хлорамфеникол цитохром Р450 ферменттік жүйесін бәсеңсітеді, сондықтан фенитоинмен, тікелей емес антикоагулянттармен (мысалы, варфаринмен) бір уақытта қолданғанда бұл препараттардың метаболизмі әлсіреуі, шығарылуының баяулауы және олардың қан плазмасындағы концентрациясының жоғарылауы анықталған.

Левомицетинді перроральді гипогликемиялық препараттармен (толбутамид, хлорпропамид) бір уақытта қолданғанда бұл препараттардың бауырда метаболизмді бәсеңсітуі есебінен гипогликемиялық әсері күшеюі белгіленген.

Барбитураттар (фенобарбитал), рифампицин, рифабутин Левомицетиннің қан сарысуындағы концентрациясын азайтады және оның тиімділігін төмендетеді.

Левомицетин құрамында эстроген бар пероральді контрацептивтер тиімділігін төмендетуі мүмкін, темір препараттарының, фолий қышқылының, цианокобаламиннің әсерін әлсіретуі мүмкін.

Левомицетин пенициллиндер мен цефалоспориндердің бактерияға қарсы әсерін төмендетеді.

Левомицетин макролидтер (эритромицин) мен линкозамидтердің (клиндамицин, линкомицин) әсерін азайтуы мүмкін.

Этанолмен бір уақытта қолданғанда дисульфирамға ұқсас реакциялар дамуы мүмкін (тері жабындыларының гиперемиясы, тахикардия, жүрек айнуы, құсу, рефлекторлық жөтел, құрысулар).

Айрықша нұсқаулар

Левомицетинмен емді тек дәрігердің тағайындауымен және дәрігер бақылауымен жүргізу керек. Емді бастар алдында емделушіде хлорамфениколға және басқа да амфениколдарға асқын сезімталдық жоқтығын анықтау керек.

Левомицетинді жүрек-қан тамыр ауруларында және аллергиялық реакцияларға бейімділік болғанда сақтықпен қабылдау керек.

Ем барысында бүйрек, бауыр және шеткергі қан құрамына жүйелі бақылау керек. Қан ұюы бұзылуының белгілері пайда болғанда препаратты тоқтату керек. Алайда апластикалық анемия симптомдары (тамақтың ауыруы, тері бозаруы, температура жоғарылауы, қан кету), әдетте, емдеу курсы аяқталғаннан кейін бірнеше аптадан соң ғана пайда болады. Сондықтан бұндай белгілер пайда болғанда дереу дәрігерге қаралу керек.

Сақтықпен, бұрын цитостатикалық препараттармен ем немесе сәулелі ем алған емделушілерге, қолданылады.

Левомицетинді бақылаусыз тағайындауға болмайды және оны жұқпа үдерістерінің жеңіл түрлерінде, әсіресе балалар практикасында қолдануға болмайды.

Этанолмен бір уақытта қабылдағанда дисульфирамға ұқсас реакциялар (тері жабындыларының гиперемиясы, тахикардия, жүрек айнуы, құсу, рефлекторлық жөтел, құрысулар) дамуы мүмкін.

Бауыр және/немесе бүйрек қызметі бұзылуында дозалау режимін түзету керек: препарат дозасын азайту немесе қабылдау аралығын ұлғайту керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері.

Автокөлік басқаратын немесе басқа да механизмдермен жұмыс істейтін адамдарға жүйке жүйесі тарапынан жағымсыз реакциялар даму мүмкіндігі қатеріне байланысты препаратты сақтықпен қабылдау керек.

Артық дозалануы

Симптомдары: терінің бозаруы, тамақтың ауыруы, температура жоғарылауы, қан кету, әлсіздік.

Балаларда артық дозаланғанда Левомицетинге тән жағымсыз реакциялар дамуы мүмкін.

Емі: препаратты тоқтату, асқазан шаю, сорбенттер қолдану, симптоматикалық ем.

Шығарылу түрі және қаптамасы

Поливинилхлоридті үлбірден және алюминий фольгадан жасалған пішінді ұяшықты қаптамада 10 таблеткадан.

Пішінді ұяшықты қаптамалар қораптық немесе гофрленген картоннан жасалған қорапқа салынған.

Топтық қаптамаға қаптама санына орай медицинада қолданылуы жөнінде мемлекеттік және орыс тілдеріндегі нұсқаулықтар салынған.

Сақтау шарттары

Құрғақ, жарықтан қорғалған жерде, 300С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін препаратты қолдануға болмайды.

Дәріханадан босатылу шарттары

Рецепт арқылы

Өндіруші

«Химфарм» АҚ, ҚАЗАҚСТАН,

Шымкент қ., Рашидов к., н/ж, т/ф : 561342

Тіркеу куәлігінің иесі

«Химфарм» АҚ, ҚАЗАҚСТАН

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Химфарм» АҚ, Шымкент қ., ҚАЗАҚСТАН РЕСПУБЛИКАСЫ,

Рашидов к., н/ж, т/ф : 560882

Телефон нөмірі 7252 (561342)

Факс нөмірі 7252 (561342)

Электрондық поштасы standart@santo.kz